MATTHAI 2 - PATHIEN LEKHABU THIENGTHO (BSI)

Miching te Vehna

¹ Chun, leng Herod a lal laia, Juda gama Bethlehem khuo a Isu a hung pien in, ngaitie, suohlam apat in miching te Jerusalem khuo ah a hung u a,

² “Khawi ah ahim Judate leng hung pieng chuh? Suohlam ah a aksi ka muu a, amah chibai dinga hung ka hiu hi,” a tiu a.

³ Leng Herod in zie chuh a zak phetin a lungzîng ta a, Jerusalem a mi chengcheng inle a lungzîn pih tau a.

⁴ Tichun, thiempu liente leh dân thuzikte chengcheng chuh a sam khawm a, Krista pienna ding thu chuh a dawng a.

⁵ Amau haw chun a kawmah, “Judai gama Bethlehem khuo ah, Thiemgau chun hiti hin a zik kha:

⁶ ‘Nang, Bethlehem, Judai gama um, Juda khawpi laka hin na neupen hiel puoi! Nang apat in vaipuo khat hung pawt ding ahi ngâl a; Ka mi Israel te ching ding pa chuh,’ tih hi” a tiu a.

⁷ Zie nung chun Herod in miching te chuh a gûkin a sama, chil takin aksi dawk lai chuh a dawng dawk a.

⁸ Amau haw chuh Bethlehem khuo a chun a sawl a, “Chieh un la, nausen thu chuh chil takin dawng dawk un la ken le amah chuh ka hung chibai theihna dingin na muh tieng u leh ei hung hilh kit un,” a ti a.

⁹ Tichun, leng thu chuh za’n a chieh tau a; chun, ngaitie, suohlam ah aksi a muh u kha nausen umna chung zawn a tun a a din masang sieh chuh a mau ah a chieh zel a.

¹⁰ Tichun, aksi chuh a muh un a kipâk mah mah tau a.

¹¹ Chun, In sung ah a va lut u a, a nu Mari kawma nausen chuh a muu, a bawkkhup u a, a chibai tau a. Tichun, a go bawmteu a hawng u a, a kawm achun kipahna sanate, begaw leh Murra te a pieu a.

¹² Herod kawma kîkkit lo dinga a mang u a hilha a um ziekun, lam chuom ah, amau haw khuo lam ah a chieh tau a.

Aigupta Gama Taihmang na

¹³ Chun, a chieh nung un ngaitie, Lalpa Vânsâwlchâk khat Joseph kawmah a mang in a hung kilak a, “Tho in la, nausen leh a nu pui in la, Aigupta gam ah taimang ah, ka hun hilh kit masang chuh taka chun um zing ah; Herod in nausen sukmangthai dinga hawl ding ahi,” a ti a.

¹⁴ Tichun, a tho a, a zan a zan in nausen leh a nu chuh a pui a, Aigupta gam ah a chieh ta a; tichun Herod thih masang cheng chuh taka chun a um zing ta a.

¹⁵ Lalpa’n thiemgau kama, “Ka chapa chuh Aigupta gam apat ka sam dawk a,” ti a a gen kha a hung guitun theih na’n.

Herod in Nausen a Thahna

¹⁶ Zielai chun Herod in mipilte dawha bawla um ahih a kihetdawk phet chun a lungna mah mah a, mi a sawl a, mipilte hun a dawt dawk khan a huop ngêi dingin Bethlehem leh a kimvela um naupang chengcheng, kum nih a thâk nuoi lam cheng chuh a that vek ta a.

¹⁷ Tichun, thiemgau Jeremia’n a na genlawk cheng chuh a hung guitung tai:

¹⁸ “Ramah khuo ah thawm a zau a, mithi ngaia mau vungvung gitte, Rachel in a chate a kah a, a um tâk loh ziekun a thepbih theih puoi,” tih hi.

Aigupta apat a Vaihkitna

¹⁹ Himahlele Herod a thih phetin, ngaitie, Lalpa Vânsâwlchâk Aigupta gama chun Joseph kawmah a mang in a kilak a;

²⁰ “Tho in la, nausen leh a nu pui in la, Israel gam ah chieh in; nausen thah guote kha a thi ta ngâl u a,” a ti a.

²¹ Tichun a tho a, nausen leh a nu chuh a pui a, Israel gam ah a lut ta a.

²² Himahlele Arkelaus chuh a pa Herod thasang in Judia gam ah vaihawm in a pang hi tih a het in, zie taka chieh chuh a lau a; a mang lama hilha a um ziekin Galili lam ah a chieh zaw ta a.

²³ Tichun, a chieh a, Nazareth kiti khuo khata chun a cheng ta a; amah chuh “Nazareth mi” tih hi’n a ti a thiemgaute gen kha a hung guitun theihna dingin.