MATTHAI 16 - PATHIEN LEKHABU THIENGTHO (BSI)

Thilmak hih Ngêkna

¹ Chun, Pharisaite leh Sadukaite a hung u a, amah zedapna’n van apat a melchikna amau haw etsak dingin a ngên u a.

² Himahlele Isu chun a kawm u ah, “Nisa a tum ding phat a van a hung san tieng leh, ‘Khuo pha ding ahi, kâwlmawng a san hi’ na ti sek uh a.

³ Chuleh, zingkal a hih tieng leh, ‘Tuni’n khuo sie ding ahi, kâwlmawng a san a, a thim hi,’ na ti sek ui. Van umchan na hechien thiem ngâl u a, himahlele hun melchikna haw chuh na he chien thei puou.

⁴ Khangthak gilo tak leh zawlsaih hatte chun melchikna a hawl u a, himahlele Jona melchikna ngâllo chuh a kawm u ah melchikna himhim piek hi puo’n a,” a ti a, a dâwng a. Khutichun, amau haw chuh a taihsan a, a chieh ta a.

Pharisaite leh Sadukaite Chawl

⁵ Chun, sinsakte chuh dîl gâl langkhat a kaih phet u chun, chângthâk a na keng hengilh u a.

⁶ Isu’n a kawm u ah, “Pharisaite leh Sadukaite chawl laka chun kivêng unla, chingthei un,” a ti a.

⁷ Amau haw chu la, “Chângthâk I keng hiel puou hi,” tin a kingaihtuoh u a.

⁸ Isu’n zie chu a he a, “Nang haw taksan tawmte haw, bang zieka chângthâk na neih loh ziek uh a nangmau haw kingaihtuoh na hiu hi? Tuhin le na lungthim un na he nai diek puou maw?

⁹ Mi sangnga dinga chângthâk pêk nga ka hehphel leh, na palbawm luok dim zat u kha na hezing puou maw?

¹⁰ Mi sangli dinga chângthâk pêk sagih leh na bawm luok dim zat uh kha la?

¹¹ Chângthâk thu na kawm u ah ka gen puoi tih bangti dana na het loh u a? Pharisaite leh Sadukaite chawl laka chun chingthei un,” a ti a.

¹² Ziephet chun, chawl, chângthâk laka kithak sek apat a chingthei dingin a hilh puoh a; Pharisaite leh Sadukaite Sinsakna laka chingthei dingin hilh ahiu hi tih a he dawk tau a.

Peter in Isu hihna a Phuonna

¹³ Chun, Isu chuh Philippi, Kaisari biel chuh a hung tun in, a sinsakte kawmah, “Mi haw’n Mihiem Chapa hi kuo ahi a tiu hi?” ti’n a dâwng a.

¹⁴ Amau chun, “A bangin, Baptist Johan ahi,” a tiu a, “Abang in, Elijah ahi,” a tiu a; “Abang in, Jeremia ahim thiemgau kuo ahim khat ahi, a tiu hi,” a tiu a.

¹⁵ Amah chun a kawm u ah, “A hih leh, nangun kuo ahi nei tiu hi?” a ti a.

¹⁶ Ziephet chun, Simon Peter in a dâwng a, “Krista, Pathien Hing Chapa chuh na hi,” a ti a.

¹⁷ Chun, Isu’n a kawmah, “Simon Bar Jonah, na hampha ahi; phehlevo leh thisan in a hun hetsak ahi puoh a, ka Pa van a um in a hun hetsak ahi zawi.

¹⁸ Chun, nang Peter, Peter na hi tih ka hun hilh na hi; zie suongpi chunga hin ka sapchuomte sa dawk ing ka ting, mithi khuo kulh kawtkhakhaw chun zie chuh nek zo puo’n au

¹⁹ Van gam chabi haw chuh hun pie’ng ka ting, lei chungah bang hitaleh na kân ta chuh van a kân hi’n tin, lei chungah bang hitaleh na phel ta chuh van a le phel hi’n a,” a ti a, a dâwng a.

²⁰ Zie zawh chun Isu chun a sinsakte chuh Krista ahi tih kuomah hetsak lo dingin a kham chakkêi a.

Isu’n a Thihna ding a Genna

²¹ Zie a kipat chun Isu’n Jerusalem khuo a a chieh dân ding haw, upate, Thiempuliente leh Danthuzikte laka thil tamtak a thuok zie ding haw, thah a a umzie ding haw, ni thum ni a kaihthawha a um zie ding haw chuh a sinsakte a hetsak pan ta a.

²² Chun, Peter chun amah chuh a puichuom a, “Lalpa, Pathien in hun lungsiet hen; ziehaw chu na chungah tung hiel puo’n a,” tin a hilh ta a.

²³ Isu chuh a kiheia, Peter kawm achun, “Setan, ka nung ah hung ah, keia dingin pukna na hi. Pathien thil haw ngaihtuoh lo in, mihiem thil haw na ngaihtuoh zaw ahi hi,” a ti a

²⁴ Chun, Isu’n a sinsakte kawmah, “Kuon le ei zuih a nawp leh, amah gimtheih khawksa lo in, a kross pu’n ei zui hen.

²⁵ Kuole a hinna hukbit nuom ta chun chan intin; kuole, kei zieka hinna chan tan, hukhing ina.

²⁶ Mi’n khawvel pumpi hi nei hen la, a hinna chan ngâl henla hileh, amah dingin banga phachuom ding? Ahihloh leh, mi’n a hinna sika banga a piek ding?

²⁷ Mihiem Chapa hi a vânsâwlchâkte tawh, a pa lopina a kivan a hung ding ahi ngâl a. Zie tieng chuleh vang, mitin a thilhih bang zel un din chiet ina.

²⁸ Tihtakzet a ka hilh na hiu hi, taka ding khenkhat haw hi, mihiem Chapa lenga hung a muh masangsieh uh thihna tep lo ding a um ui,” a ti a.