MATTHAI 15 - PATHIEN LEKHABU THIENGTHO (BSI)

Pilepute Thuguichin

¹ Zielai chun Jerusalem khuo apat in Pharisaite leh Danthuzikte Isu kawmah a hung u a,

² “Bang zieka na sinsakte’n pilepute thuguichin a palthak sek uh a? Chângthâk a nek un a khut uh a sawp kha sek puou a,” a tiu a.

³ Isu’n a dâwng a a kawm u ah, “Nang haw’n le banga ti a na thuguichin ziek u a Pathien thupiek paltha sek?

⁴ Pathien in, ‘Na nu leh na pa limbawl ah, Kuole, a nu ahim, a pa ahim gensie chuh thi tei hen,’ a ti ngâl a.

⁵ Nang haw chun chuh, Kuole, a nu ahim a pa ahim kawmah, ‘Nei thanekna ding chuh Pathien kawma piek ahi tai,’ ti ta chun,

⁶ a nu leh a pa a limbawl dinguh ei puoi, na ti sek uh a. Tichun, na thuguichin ziek u chun Pathien thu chuh na pal mang tau ahi.

⁷ Nang haw, gukhah te haw, na chungchâng thuu Isai hin a na gen dik na hi.

⁸ ‘Ziete haw hin a mûk un ei limbawl un, A lunggil unla ei gamlat ngâl un.

⁹ Bang hitalele, a mi sinsaknau ah mihiem thupiek a a hilh ziekun, Ei ho sek u hi mawk mai ahi,’ ti’n,” a ti a, a dâwng a.

Mihiemte Subuok pên

¹⁰ Chun, Isu’n mipite chuh a sama, a kawm u ah. “Ngaiun la, a na hethiem un;

¹¹ Kama lut chuh mihiem subuok ahi puoh a; kam apat a pawt chuh mihiem subuok ahi zawi,” a ti a.

¹² Zie lai tak chun a sinsakte a hung u a a kawmah, “Pharisaite’n zie thu kha a het u a, a lungkim loh thuu kha na he?” a tiu a.

¹³ Amah chun, “Kung chengcheng ka Pa van a um phuh loh chuh bawh dawkin um ina.

¹⁴ Amau haw chuh limsak kiu in, mitdûk lamkai ahiu hi. Zieziekchun, mitdûk in mitdûk mah a puih chun kawkhûk ah kie khawm un au.” ti’n a dâwng a.

¹⁵ Chun. Peter in a kawmah, “Zie tehkal thu kigen chuh kei uh nei hilhchien ta,” ti’n a dâwng a.

¹⁶ Isu’n kawm u ah, “Nang haw’n le tuchan ahih hechien nailo na hiu maw?

¹⁷ Kama lut ta chuh gil ah a lut suk a, pawsuokna ah a pawt pai sek hi tih na he puou maw?

¹⁸ Kama pawt haw chu vang lunggil a hung pawt ahi a; zie mawng chun mihiem a subuok sek hi.

¹⁹ Lunggil a hin ngaihtuoh na gilo haw, tuolthahna haw, zawlsaihna haw, kideihchakna haw, gukchakna haw, kiheksietna haw, kigensietnahaw a hung pawt sek ngâl a.

²⁰ Ziehaw chuh mihiemte subuok pên ahi; himahleh, khut sawp lo a an nêk hin chuh mi a subuok puoi,” a ti a.

Numeinu Ginna

²¹ Khutichun, Isu chuh tak apat chun a chiehdawk a, Tura leh Sidon biel ah a chieh ta a.

²² Chun, ngaitie, zie gama kipat chun Kanaan numei khat a hung a “Lalpa, David chapa, ei lungsiet in, ka chanu thitha’n a man chak kêi a,” tin a kiko a.

²³ Isu chun la kam khat chan le a dâwng puoh a. Tichun, a sinsakte a kawmah a hung u a, “I nung u ah a kiko a kiko ngâl a, sawl mang mai ta’n la,” tin a hung ngên u a.

²⁴ Isu chun la, “Israel nam laka belam mang kawm tihloh achun sawl, ka hi puoi,” ti’n a dâwng a.

²⁵ Himahlele, numei chuh a hung a, “Lalpa, ei panpih tang uo,” ti’n a chibai a.

²⁶ Isu’n a kawmah, “Chate chângthâk lâksak a, ui haw kawma piek a kilawm puoi,” a ti a, a dâwng a.

²⁷ Amah chun, “Lalpa. hih vang chu ahi a, himahlele, uichate’n le a puu dawhkhâng nuoia chângthâk nên kie a ne sek uh hilo ahim?” a ti a.

²⁸ Ziephet chun, Isu chun a kawmah, “Numei, na taksan a nasai; na ut guol takin na chungah um hen,” a ti a, a dâwng a. Tichun, a chanu chuh zie a kipat chun a na dam ta a.

Isu’n Mi Tampi a Sukdamna

²⁹ Chun, Isu tak apat chuh a chieh a, Galili dîl kieng a hung tung a; chun. tânga chun a chieh to a, tak achun a chu ta a.

³⁰ Chun, mipi nasatak a kawmah a hung u a, kêngbâite, mitdûkte, pautheilote, piengsuol haw a kawmah a hung u a, a keng bul ah a kawih u a, tichun, a na hihdam ta a.

³¹ Khutichun, mipite chun, pautheilote chuh hung pau a, piensuolte chuh hung pha a, kêngbâite chuh kenga chieh a, mitdûkte chuh khuo hun mu thei ta chuh a muh un, mak a sa ten u a; tichun, Israel te Pathien chuh a pakcha tau a.

Mipi Sangli Vakna

³² Chun, Isu’n a sinsakte chuh a sama, “Mipi haw hi tun ni thum ka kawmah a um tau a, nek ding bangmah a neih loh ziekun ka lungsiet mah mah mai hi; an ngawlin ka sawl kit nuom puoi, khutilochun, lamkal ah sawlsam vei kha’n au,” a ti a.

³³ Ziephet chun, sinsakte chun a kawmah, “ Mipi hiti zozai vahna kham ding hi chângthâk zie gamgaw ahin khawia kimu ding ahim?” a tiu a.

³⁴ Chun, Isu’n a kawm u ah, “Chângthâk bang zata na neih uh?” a ti a. Amau haw chun a kawmah, “Pêk sagih, ngasi tawmcha tawh,” a tiu a.

³⁵ Isu chun mipite chuh tuola chu dingin thu a pie a.

³⁶ Tichun chângthâk pêk sagih leh ngasi haw chu a la a, kipahthu a gen a; a phelsuoh a, sinsakte kawmah a pie a, chun, sinsakte chun mipite kawmah a pieu a.

³⁷ Tichun, a bawn un a neu a, a vah suok kêi tau a: a nek mawk u chu le bawm sagih a luok dim u a.

³⁸ A ne haw chu numei leh chapang simloh in pating chiet le sangli ahiu hi.

³⁹ Chun, Isu’n mipite chuh a sawl dawk nung in, kuong ah a lut a, Magadan gam ah a chieh ta a.