MATTHAI 12 - PATHIEN LEKHABU THIENGTHO (BSI)

Sabbath thu a Dawtna

¹ Zielai chun, Isu chuh Chawlhni’n buh lei haw achun a chiehpai a; a sinsakte chuh a gil-uh a kiel ta a, tichun, buhvui haw chuh a sik u a, a ne tau a.

² Zie chuh Pharisaite’n a muh phet un, a kawmah, “Entie, na sinsakte’n Chawlhni’n hih ngeiloh a hih ui.” a tiu a.

³ Isu’n a dâwng a, a kawm u ah, “David a gilkiel laia, a guolte tawh a thilhih u kha na sim ngei puou maw?

⁴ Khati a Pathien In a a lut a, amah leh a guolte nek ngei loh, thiempute mai nek thieng, chângthâk zek a nek thuu kha?

⁵ Ahihloh leh, Chawlhni a Pathien Ho-In a thiempu umte chun Chawlhni a nit loh un le mawhchang in a um puou hi tih Dan thu ah na sim puou hi?

⁶ Bang hilele, Pathien Ho-In sanga lopi zaw taka hin a um hi, tih ka hun hilh na hiu hi.

⁷ ‘Chuleh, Kithawihna deih lo in, lungsietna ka deih zawi’ tih hi a na he hita leu chun, mi, a mawh lo chu mawh chansak lo ding hi veu chin,

⁸ Mihiem Chapa hi Chawlhni Lal ahi ngâl a,” a ti a.

Isu’n Khut zeng a Sukdamna

⁹ Isu’n zie mun chuh nusieh in a kikhawpnau In achun a va lut a.

¹⁰ Chun, ngaitie, mi khat khut zeng a na um a. Isu a heksiet theihna ding un, “Chawlhni’n hihdam a thieng em?” ti’n Isu a dawng u a.

¹¹ Isu’n a kawm u ah, “Nang haw lak ah kuon le belam khat nei unla, zie chuh chawlhni’n kawkhuk sung ah kie ta hen la hi leh, kuo a tu a kaidawk lo a um ding?

¹² Belam khat sang chun mihiem khat chuh a lul zaw na e! Zieziekchun, Chawlhni’n thilpha bawl a thieng hi,” a ti a.

¹³ Tichun, zie pa kawm achun, “Na khut tung ah,” a ti a. Chun, amah chun a khut a tung a, a langkhat guolin a dam kêi ta a.

¹⁴ Khutichun, Pharisaite chuh a pawt u a, amah suklup theihna ding dân ngaihtuoh in a kikhawm tau a.

Pathien tel ngêi Suok

¹⁵ Himahlele Isu’n zie chuh a het phetin zie apat chun a chieh mang ta a. Chun, mipi tamtak in amah chuh a zui u a, damlo chengcheng chuh a na hihdam suok ta a;

¹⁶ A chanchin phuon loh ding tin amau haw chuh a khap chak a.

¹⁷ Zie chuh Pathien in thiemgau Isai kawm a:

¹⁸ “Entie, keimah tel ngêi ka suok, Ka deih tak, a chunga ka lungkimna mah mah hi; A chungah ka thagau kawih ing ka ting, Tichun, Jentel te kawmah vaihawmna dik phuong ina.

¹⁹ Niel puo’n tin, ko le kiko ngei puo’n a, Khawlai a le kuoma’n a aw za kha puo’n a.

²⁰ Zo dinga vaihawmna dik a sawl dawk masang sieh chuh Luong kihek gawp chuh hekbawng pai lo ding ahi, Phita chule sumit pai puo’n a.

²¹ Amah min chuh Jentel te’n kineppih un au,” ti a a gen kha a hung guitun theihna dingin.

Isu leh Beelzebul

²² Zielai chun, mitdûk, pautheilo, thitha mat khat a kawmah a hun pui u a. Isu’n a na sudam a, tichun, hung pau thei in, khuo le ahun mu thei ta a.

²³ Ziephet chun, mipite cheng chun mak a sa tau a, “Zie pa hi David chapa kha hilo ahim?” a tiu a.

²⁴ Himahlele, Pharisaite’n zie chuh a het phet un, “Zie pa hin thitha leng Beelzebul thilhih theihna ziek hilo in thitha haw chuh delh dawk puo’n a,” a tiu a.

²⁵ Chun, Isu’n a ngaihtuoh u chuh a na he a, a kawm u ah, “Hawi gam hitaleh amau kido taphawt a mang sek ui; kuo hitaleh, inkuon khat le amau kido ta chuh ding dawk hiel puo’n au

²⁶ Zieziekchun, Setan in Setan mah a delh dawk chun amah leh amah kido ahi a, a gam chuh bangti’n a a dindawk ding?

²⁷ Chun, ken Beelzebul zieka thitha haw a na nawhdawk sek ka hih chun, na chateu in kuo ziekin a a na nawhdawk sek uh? Zieziekchun, nang haw diklo na hiu ui tih chuh a suchien tau hi.

²⁸ Amahvang chuh. Ken Pathien Thagau zieka thithate delh dawk sek ka hih chun. Pathien gam chuh na kawm u a hung tung hi ta’n a.

²⁹ “Mi’n mihat chuh a kân masak loh chun, bangti’n a mihat ina chuh lut in a sumlepai a lâksak theih ding? a kân zawh tieng le vang chuh a in chuh luh thei ina.

³⁰ “Kuole, kei lama pang lo chuh ei do ahi a, kuole ei lakkhawm pin lo chun a thehzak ahi.

³¹ Zieziekchun, ka hilh na hiu hi: mi, a gitlohna tin cheng u leh, a Pathien gensietna tin cheng u ah ngaihdam hiu untin. Himahleh, Thagau thiengtho gensie vang chuh ngaihdam hi puo’n a.

³² Chun, kuole Mihiem Chapa awimawh ta chuh a awihmawhnau achun ngaihdam hiu intin; kuole Thagau thiengtho zet gensie vang chuh, a awihmawhnau chuh tu damsung hin le, hun hung tung kit ding achun le ngaihdam hi puo’n a.

Thing leh a Gah chuh

³³ “Thing hi a phat chun, a gah le a pha a, thing a phatloh chun a gah le a pha puoi; thing chuh a gah in a kihe ngâl a

³⁴ Gûl suonte haw! bangti’n a gilo zing puma thilpha na gen theih ding uh? Lungthima dimlet chuh kam in a gen dawk sek a puo!

³⁵ Mi pha chun a gobawm apat in thilpha a ladawk sek in, migilo chun a gobawm phalo apat in thil phalo chuh a ladawk sek hi.

³⁶ “Chun, ka hilh na hiu hi, Min, thumanloh a gen chun, ziete chanchin mah chuh thupi kitan ni leh gen un au.

³⁷ Na thugen in thiem hun chansak intin, na thugen mah in thiemmawh hun chansak kit ding hilo ahim?” a ti a.

Thilmak Ngekna

³⁸ Chun, dân thuzikte leh Pharisaite laka kuote ahim in a kawmah, “Sinsak pa, nang apat a melchikna muh ka nuom ui,” a tiu a.

³⁹ Amah chun a kawm u ah, “Khangthak gilo tak leh zawlsaih hât te chun melchikna a hawl un, himahlele thiemgau Jona melchikna mai tihloh chuh a kawm u ah melchikna himhim piek hi puo’n a.

⁴⁰ Jona chuh ni thum leh zan thum ngapi gil sunga a um guol khan, Mihiem Chapa hi ni thum leh zan thum leilung sung ah um ding ahi.

⁴¹ Chun, thupi kitan ni chuleh Ninevi khuo mite chuh hung ding dawk un tin, tulai khang thakte hi mawh hun chansak ding ahiu ui. Jona thugen ziekin a lung uh a hei ngâl u a; ngaitiem u, Jona sanga lopi zaw zie hin a um a puo!

⁴² Simlam lengnu kha thupi kitan ni achun kipan in tin, tulai khangthak te hih mawh hun chansak ding ahi. Solomon chitna ngaitha dingin kâwlmawng apat in a hung a, ngaitiem u, Solomon sanga lopi zaw taka hin a um a puo!

Thagau buok Vaihkitna

⁴³ “Chun, thagau buok chuh mi sung apat a a hung pawt phetin, chawlh ngakna hawl in tui um lohna ah a vak a vak a, muh la a mu ngâl puoh a.

⁴⁴ Ziephet chun, ‘Ka hung pawtna ka In akhan vaikit mai ing ka,’ a ti a. Tichun, a vaikit ta a, In chuh a âwng leh phiet ngim san a mu ta a.

⁴⁵ Ziephet chun a va pawtdawk a, amah sanga gilo zaw thitha dang sagih a hun pui a; tak achun a cheng tau a. Zie mihiem umzie nunung chuh amasa sangin a hung phamawh zaw ta a. Tawbangmah hin tulai khangthak gilo takte chunga hin le hung um ding ahi,” ti’n a dâwng a.

Isu Nu leh a Suohpihte

⁴⁶ Isu’n mipite kawma thu a gen lai tak chun, ngaitie, a nu leh a suohpihte chuh amah hopih guo’n pawlam ah a ding u a.

⁴⁷ Chun, mi khatin a kawmah, “Ngaitie, na nu leh na suohpihte nang hun hopih guo’n pawlam ah a ding zing ui,” a ti a.

⁴⁸ Himahleh, Isu chun a dâwng a, “Ka nu chuh kuo ahi? Ka suohpihte chule kuote ahiu hi?” ti’n a dâwng a.

⁴⁹ Khutichun, a sinsakte lam ah a khut a zaka, “En tiem u, ka nu leh ka suohpihte hi!

⁵⁰ Kuole ka Pa van a um deih bang hihte chuh ka suohpihpa, ka suohpihnu leh ka nute ahiu a puo,” a ti a.