MATTHAI 10 - PATHIEN LEKHABU THIENGTHO (BSI)

Sinsak Sawm leh nih te

¹ Chun, Isu’n a sinsak sawm le nih te chuh a kawmah a sama, amau haw chu thagau buok delhdawk theihna dingin thuneihna a pie a, chuleh, damlohna tincheng leh natna tin cheng sukdam theihna ding thuneihna le a pie a.

² Sawlchak sawm le nih te min chuh ziehaw hi ahi: A masapen in Simon (Peter kiti) leh a suohpih Andrew; Jebedai chapa Jakob leh a suohpih Johan;

³ Philip leh Bartholomai; Thoma leh siehdawlpa Matthai; Alphai chapa Jakob leh Thaddai;

⁴ Kanaan a um Simon leh a matsakpa Juda Iskariot te ahiu hi.

Sawmlenihte Sawldawkna

⁵ Zie sawmlenih te chuh Isu’n a sawl dawk a, a kawm u ah tihin thu a pie a: “Jentel te lampi ah chieh kiu inla, Samari mite khuo himhim ale lut kiu in.

⁶ Amahvang chuh, Israel nam belam mangte kawm achun chieh zawu in.

⁷ Tichun, na chieh kawm un, ‘Van gam chuh a nai tai’ ti’n gen zel un.

⁸ Damlote sudam unla, mithite kaitho unla, phâkte suthieng unla, thitha haw delh dawk unla. Man beia na san u chuh man beiin pieu in.

⁹ Na dangka dip hawu achun sana ahim, dangka ahim, paisa ahim keng kiu in la,

¹⁰ zinna a dingin sakhau ahim, puonâk nih ahim, kengtawbek ahim, tiengkhut ahim le keng kiu in; nasem chun nek ding a muh ding him ahi ngâl a.

¹¹ “Chun, khuo lien hileh, khuo neu hileh, na lutna taphawt u ah a hun tun sak thei ding hawl dawk unla, na pawt kit masang sieh u chu tak achun tung zing un.

¹² Chuleh, In a chuh na lut ding tieng u leh chibai unla.

¹³ Zie In a mite chun a hun na lawp u chun na lungmuonna thuu chuh um zing hen la, a hun lawp loh u le vang chuh na lungmuonna thuu chuh zûk kit un.

¹⁴ Kuole, hun na lawp lo a, na thugen uh ngailo te chuh, zie In a kipat ahim, zie khuo a kipat ahim a chuh na pawt tieng u leh na kêngpêk u a leivui chuh thing thau in.

¹⁵ Tihtakzet a ka hilh na hiu hi, thutan ni leh zie khuote sang chun Sodom leh Gomorra gam thuok ding chuh a dân um zaw’n a!

Gimtheihna Hung tung Ding

¹⁶ “Ngaitiem u! ngeihawn laka belam um guola ka hun sawl na hiu hi, khutichun gûl guola ching a, vakhu guola mi zakdah ding khawih lo in um un.

¹⁷ Mihiemte lak achun chingthei un, hun man un tin, vaihawmna In a hun pui in, a kikhawpna In hawu a chun hun zêp ding ahi ngâl u a.

¹⁸ Kei ziekin gam vaihawmte leh lengte masanga thutan sak ding leh amau haw kawm leh Jentel te kawma Chanchin pha gen dingin hun pui un au.

¹⁹ Himahlele, a hun matsak tieng u chu leh, ‘Bangti’n a, bang thu a ka gen ding?’ ti’n lungkham kiu; na gen ding u chuh a hun taka hetsak a um ding na hi ngâl u a.

²⁰ A gen chuh nanguh hi ding na hi puou a, na Pau Thagau in nangmau mang in gen ding ahi zaw ngâl a.

²¹ “Mi’n a suohpihpa thah dingin matsak intin, pa’n le a cha matsak in tin; chate’n le a nu leh a pa do un tin, thah le thah sak un au.

²² Ka min ziekin mi chengcheng muhdah in um un na tin uh, himahlele a tâwp tienga thuok ngâp ta chuh, zie ngêi chuh hukdam in um ina.

²³ Khutichun, zie khuo a hi a hun bawl phatloh tieng u leh, khuo dangah taihsan un. Tihtakzet a ka hun hilh na hiu hi, Mihiem Chapa a hung ma’n Israel khuo haw chu tawh suok puo’n lau.

²⁴ “Sinsak a sinsakpa chungah a um puoh a, suok le a pu chungah a um diek puoi.

²⁵ Sinsak, a sinsakpa guola hung um leh, suok, a pu guola hung um chuh a hun set hi. In nei pên pa bawn ‘Beelzebul’ a tih u chun, a inkuonpihte chuh a hah tih na ding u e!

Lauh ding pên Chuh

²⁶ “Khutichun, amau haw chuh lau kiu in, phuon loh dinga kisel bangmah a um puoh a, het loh dinga îm le bangmah a um diek puoi.

²⁷ Thimlaka ka hun hilh hi vak ah gen un; nakhanga na zak u hi In chunga chu’n tângsap pih un.

²⁸ Chuleh, sapum that a thagau that theilo haw chuh lau kiu in la; zie sang chun, Gehen a thagau leh sapum sumang thei vang chuh lau zawu in.

²⁹ Vasie nih paisa khatin a kikhawng sek hilo ahim? Himahlele a lak u a khatchale na Pau thu lo in tuol ah ta puo’n a.

³⁰ Himahleh, na luchang u a na sam zang khat cha nasan le sim suok a puo.

³¹ Zieziekchun, lau kiu in; vasie tamtak sangin na lul zaw ngâl u a.

Kiphuonna leh Krista Deihlohna

³² “Khutichun, mihiemte ma a ei uoh ta chuh, ken le ka Pa van a um ma ah amah le uoh ing ka.

³³ Himahlele, kuole mihiemte ânga ei kizuksan ta chuh, ken le ka Pa van a um ma ah kizuksan ing ka.

Chamna hilo in, Chemzâm

³⁴ “Lei chunga hin cham lên sak dinga hung hoh ahim nei ti kha’n lau: cham lên sak dinga hung ka hi puoh a, chemzâm lên sak dinga hung ka hi zawi.

³⁵ Chapa’n a pa do ding leh, chanu’n nu do ding leh monu’n a talpinu do sak dinga hung ka hi zawi.

³⁶ Mite dinga a melma lienpen chuh amah inkuonpihte ngêi hi’n a.

³⁷ “Kuole a nu ahim, a pa ahim kei sanga hehpih zaw chuh ka mi hi hâwi ahi puoi; kuole a chanu ahim, a chapa ahim kei ei hehpih sanga hehpih chule ka mi hi hâwi ahi diek puoi.

³⁸ Chun, kuole a kross pu a ei zui lo chuh ka mi hi hâwi ahi puoi.

³⁹ Kuole, a hinna mu chun chan intin; chuleh, kei min zieka a hinna chân chun mu’n a.

Kipahman Chuh

⁴⁰ “Kuole a hun lawp chuh kei ei lawp ahiu a, kuole kei ei lawp chuh ei sawlpa lawp ahi.

⁴¹ Kuole thiemgau chuh thiemgau ahih zieka lawp ta chun, thiemgau kipahman chu muntin; kuole mi diktat chuh mi diktat a hih zieka lawp chun diktat kipahman chu mu’n a.

⁴² Chun, kuole zie mi neucha haw laka khat kawma hin ka sinsak ahih zieka tui dap khawn khat mai na pie le, tihtakzet a ka hilh na hiu hi, a kipahman u chu chan hiel puo’n au,” a ti a.