MATTHAI 1 - PATHIEN LEKHABU THIENGTHO (BSI)

Isu Krista Khanggui

¹ Isu Krista hun suontute Abraham leh David suonte khanggui kizawt zie chuh:

² Abraham in Isak a hing a, Isak in Jakob a hing a; Jakob in Juda leh a suohpihte a hing a.

³ Juda’n Tamar tawh Perez leh Jera a hing a; Perez chun Erom a hing a, Erom in Aram a hing a.

⁴ Aramin Aminadab a hing a; Aminadab in Nahson a hing a, Nahson in Salmon a hing a.

⁵ Salmon in Rahab tawh Boaz a hing a, Boaz in Ruth tawh Obed a hing a, Obed in Jessai a hing a.

⁶ Jessai in leng David a hing a; chuleh, David in Uria zi apat in Solomon a hing a.

⁷ Solomon in Rehoboam a hing a; Rehoboam in Abijah a hing a; Abijah chun Asa a hing a.

⁸ Asa’n Jehoshaphat a hing a; Jehoshaphat in Joram a hing a; Joram in Uzia a hing a.

⁹ Uzia’n Jotham a hing a; Jotham in Ahaz a hing a; Ahaz in Hezekia a hing a.

¹⁰ Hezekia’n Manasi a hing a; Manasi’n Amon a hing a; Amon in Josia a hing a.

¹¹ Babulon lama sala puih a a um lai vel u khan Josia’n Jekonia leh a suohpihte a hing a.

¹² Babulon sala puih a a um nung un Jekonia’n Salathiel a hing a; Salathiel in Jerubabel a hing a.

¹³ Jerubabel in Abiud a hing a; Abiud in Eliakim a hing a; Eliakim in Azor a hing a.

¹⁴ Azor in Sadok a hing a; Sadok in Akim a hing a, Akim in Eliud a hing a; Eliud in Eleazar a hing a.

¹⁵ Eleazar in Matthan a hing a; Matthan in Jakob a hing a, Jakob in Joseph, Mari pasal chuh a hing a.

¹⁶ Zie Mari sunga hin Isu Krista kiti hi a hung pieng tai.

¹⁷ Khutichun khang chengcheng chuh Abraham apat in David tieng in khang sawm leh khang li ahi a; David apat in Babulon lama sala puih a hih tiengun khang sawm leh khang li mah ahi a, Babulon lama sala puih a hih uh apat Krista tiengin khang sawm leh khang li mah a hi kit hi.

Isu Krista Pienna

¹⁸ Isu Krista hung pien zie chuh hiti hi ahi: A nu Mari chuh Joseph tawh kihuol ahiu a, himahlele a kichên mau in Thagau thiengtho in a gaihsak hi tih het a hung hi ta a.

¹⁹ Tichun a pasal Joseph chuh mi diktat ahi a; tângpi heta sukmuolpho a nuom puoh a, a gûka haihsan a guo ta a.

²⁰ Himahlele zie thu haw chuh a ngaihtuoh lai in ngaitie, a mang in Lalpa Vânsâwlchâk a kawmah a hung kilak a, a kawmah, “Joseph, nang David chapa, na zi Mari chuh kichênpih lau kih, a nauvawp chuh Thagau thiengtho apat ahi.

²¹ Chapa hun hing in tin, a min dingin ISU sa’n la: amah chun a mite a thil hihkhelh nau apat hukdam ding ahi ngâl a,” a ti a.

²² Ziehaw chengcheng hi Lalpa’n a thiemgau manga a gen kha a hung guitun theihna dinga um ahi.

²³ “Ngaitie, nungak thiengtho chuh gai intin, chapa hing intin, a min dingin Immanuel sa’n au,” ti a a gen kha. (Zie chuh “I kawmah Pathien a um” tihna ahi.)

²⁴ Tichun, Joseph ipmu lai chuh a tho a, Lalpa Vânsâwlchâk in a kawma thu a piek guol chun a hih a, a zi chuh a kichênpih ta a.

²⁵ Himahleh, chapa a hin ma cheng chuh a kuolpih puoi; tichun Joseph chun a min dingin ISU a sa ta a.