MARK 8 - PATHIEN LEKHABU THIENGTHO (BSI)

Mipi Sangli Vakna

¹ Zie nung hun sawtlo chun, mipi nasatak a hung khawm u a, mipite chun nek ding bangmah a neih loh phat un, Isu’n a sinsakte chuh a sama, a kawm u ah,

² “Tuhin, mipite hi ka kawmah ni thum a um tau a, nek ding bangmah a neih loh ziekun ka lungsiet mah mah hi:

³ Anngawla a In lam hawu a ka sawl kit chun, lamkal ah sawlsam kha’n au; a lak uh a khenkhat hi gamla tak apat a hung a hi ngâl u a,” a ti a.

⁴ A sinsakte chun, “Khawi apat in kuo’n ziehaw hi gamthip ah chângthâk in a hih tai thei die?” a tiu a.

⁵ Isu chun a kawm u ah, “Chângthâk pêk bang zat na nei u?” ti’n amau a dawng a. Amau haw chun, “Chângthâk pêk sagih,” a tiu a.

⁶ Ziephet chun, mipite chuh tuola chuh dingin thu a pie a; chângthâk pêk sagih chuh a la a, kipahthu a gen zawhin, a hekphel a, a masang uh a luih dingin a sinsakte kawmah a pie a; amau chun mipite masang achun a lui tau a.

⁷ Chun, ngasi le tawmcha a nei u a; chun, ama’n vang a pie a, ziehaw chule a masang u a luih dingin thu a pie a.

⁸ Tichun, a neu a, a vah chiet tau a; tichun, a nek val u chule bawm sagih a luok dawk ui.

⁹ Chun, amau haw chuh sangli vel ahiu a: tichun, amau haw chuh a kikhen sak ta a.

¹⁰ Tichun, amah chuh a sinsakte kawm achun kuong ah a lut pai zieng a, Dalmanutha gam ah a chieh tau a.

Pharisaite Tiemtehna Hawl

¹¹ Chun, Pharisaite khenkhat Isu kawmah a hung u a, amah zedapna’n, amah apat a van a tiemtehna hawl in a niel tau a.

¹² Isu chuh a lungthim in nasatak in a mau a, “Bang zieka tulai khang hin tiemtehna a hawl uh a? Tihtakzet a ka hilh na hiu hi, zie khang hi tiemtehna piek hi puo’n a,” a ti a.

¹³ Tichun, amau haw chuh a nusieh a, kuong ah a chu kit a, gâl lehlam ah a chieh ta a.

Pharisaite leh Herod Chawl

¹⁴ Chun, a sinsakte chun chângthâk a keng hengilh u a, chângthâk pêk khat tih loh chuh kuong achun chângthâk dang himhim a nei puoh ngâl u a.

¹⁵ Isu’n a kawm u ah, “Pharisaite chawl leh Herod chawl apat kivêng un la, chingthei un,” ti’n thu a pie a.

¹⁶ Ziephet chun, amau haw chuh a kiho tuoh pai zieng u a: “Chângthâk I neih loh ziekuh a zie chuh a gen ahi,” a tiu a.

¹⁷ Chun, Isu’n a thugen u chuh a he a, a kawm u ah, “Bang zieka chângthâk na neih loh ziekuh a kingaihtuoh na hiu hi? Tu’n le na lungthim u a he nai diek lo maw? A ngaihna le he nai diek lo maw? Na lungthim uh a ngawng zo ahi ta’m?

¹⁸ Mit nei ngâl in, na mu puou maw? Bil nei ngâl in na za puou maw? na hezing puou maw?

¹⁹ Sangnga vakna dinga chângthâk pêk nga ka phelsuoh lai khan, a nen palbawm bang zat dima na luok dawk uh?” a ti a. Amau chun a kawmah, “Sawm le nih,” a tiu a.

²⁰ “Chuleh, sangli laka chângthâk pêk sagih ka phelsuoh lai khan, anen bawm bang zata na luok dim uh?” a ti a. Amau chun, “Bawm sagih,” a tiu a.

²¹ Ziephet chun, ama’n a kawm u ah, “Tu’n le a ngaihna na he nai diek puou maw?” a ti a.

Bethsaida a Mitdûk a Sukdamna

²² Chun, Bethsaida a hung tung u a; mitdûk khat a kawmah a hun pui u a, amah khawih dingin a ngên u a.

²³ Isu’n mitdûk chuh a khut in a tu a, khuo apat in a puidawk a; chun, a mit ah chil a siet a, a chunga khut a ngak zawhin, “Khuo na mu thei hi?” ti’n a dawng a.

²⁴ Tichun, a hung dâk dawk a, “Mihiem hi thing guol in ka mu a, a vakviel hi,” a ti a.

²⁵ Zie nung chun a mit a khawih kit a, a mit a hah saka; tichun, a mit chuh a hung dam ta a, thil cheng chuh kichien takin a mu thei ta a.

²⁶ Khutichun, Isu’n “Khuo ale lut ki’n la, khuo sunga mi kuomah le hilh ki’n,” ti’n a In ah a sawl ta a.

Peter in Krista a Phuonna

²⁷ Chun, Isu leh a sinsakte chuh a pawtdawk u a, Philippi Kaisari biela khuo haw achun a chieh u a; chun, a chieh kawm un a sinsakte kawmah, “Mihaw’n kuo ahi ei tiu hi?” ti’n a dawng a.

²⁸ Amau haw chun, “Khenkhat in, Baptist Johan ahi, a hun tiu a,” “Khenkhat in Elija ahi a hun tiu hi, khenkhat in, Thiemgaute laka khat ahi,” ahun tiu hi ti’n a dâwng uh a.

²⁹ Ziephet chun, ama’n a kawm u ah, “Aleh, nangun kuo ahi nei tiu hi leh?” ti’n a dawng a. Peter in a kawmah, “Krista chuh na hi,” ti’n a dâwng a.

³⁰ Chun, amah chun a kawm u ah, “Ka chanchin kuomah hilh kiu in,” ti’n a kham chak kêi a.

Isu Thuokna leh a Thih ding Thu

³¹ Chun, Isu’n a sinsakte chuh: Mihiem Chapa’n thil tamtak a thuok ding te, upate, thiempu liente leh danthuzikte deih loh a a um ding leh thaha a um ding thu leh, ni thum nunga a thawhkit ding thute chuh a sinsak pan ta a.

³² Zie thu chuh kichien takin a kawm u ah a gen a. Khutichun, Peter in amah chu a puichuom a a hilhgaih ta a.

³³ Himahleh, Isu chuh a kihei a, a sinsakte chuh a en a, Peter chuh a gai ta a, “Setan, ka nung ah chieh ah; na ngaihtuohna chuh Pathien apat a hung ahi puoh a, mihiem apat a hung ahi zaw ngâl a,” ti’n.

³⁴ Chun, Isu’n mipite leh a sinsakte chuh a sama, a kawm u ah, “Kuo’n le, ei zuih a nawp chun, amah gimtheih khawksa lo in, a kross pu’n ei zui heh.

³⁵ Kuole, a hinna humbit nuom ta’n chan in tin; himahleh, kei ziek leh Chanchin pha zieka a hinna chân ta’n humbit ding ahi ngâl a.

³⁶ Mi’n khawvel hi a pum in nei hen la, a hinna chan hen la hileh, amah dingin banga phachuom ding?

³⁷ Ahihloh leh, mi’n a hinna sika banga a piek ding?

³⁸ Kuole tulai khang zawlsaih hatte leh thilhih gilo nuomte lak ah keimah leh ka thu zahpih ta chuh, Mihiem Chapa hin, vânsâwlchâk thiengthote tawh, a Pa lopina a kivana a hung tieng leh, zie mihiem chuh hun zahpih thuk ina,” a ti a.