MARK 5 - PATHIEN LEKHABU THIENGTHO (BSI)

Thitha Buok Vawp Sukdamna

¹ Chun, Isu leh a sinsakte chuh Galili dîl gâl lehlam, Gerasin mite gam chuh a tung u a.

² Isu chuh kuong apat a a hung pawt pawt in, mi khat, thitha buok vawp, thân apat a hung pawt in a na tuok pai zieng a,

³ Zie pa chun thân lak ah umna a nei a kuoma’n thikkhau in le a kân thei ta puou hi.

⁴ Kawl leh thikkhau inle a kân zing sek nau a, thikkhau haw chuh a bawttan a, kawl chule a sunel dimdem sek a; kuoma’n a hih nem zo puou hi.

⁵ A sun a zan in thân haw leh tânghaw achun a um zing sek a, a kiko ko sek a, suongin le amah leh amah a ki-ât sek hi.

⁶ Himahleh, gamla tak apat a Isu a vak muh phetin, a tai a, a va chibai a,

⁷ ngeih tak a kiko in, “Isu, Pathien Chungnung pên Chapa, kei leh nang banga I kitimatna um? Ei hihgimthei lo dingin Pathien min in ka hun ngên hi,” a ti a.

⁸ Chun, Isu’n a kawmah, “Nang thitha buok, mihiem sung apat hin hung pawt ah,” a ti ta ngâla.

⁹ Khutichun, Isu’n “Na min bang a?” a ti a. Ama’n a dâwng a, “Ka min chuh Nuoi ahi; tamtak ka hi ngâl u a,” a ti a.

¹⁰ Tichun, zie gam apat a chuh amau haw sawl dawk lo dingin hah nget in a ngên u a.

¹¹ Chun, taka tâng pang achun vawk hawn tamtak a tau a.

¹² Tichun, thitha buok haw chun, “Vawk haw sunga khun ei sawl ah, amau haw sunga ka lut theihna dingun,” ti’n Isu kawmah a ngên u a.

¹³ Amah chun thu a pie ta a. Tichun, thitha buok haw chuh a pawt u a, vawk hawn sung achun a lut u a; vawk hawn chuh sangnih vel ahiu a, tichun, kawl ah a taisuk u a, dîl ah a tailut u a; dîl achun tui hapvah in a thi tau hi.

¹⁴ Ziephet chun, a vulhte chuh a tai u a, khawpi leh khawneu haw achun a gen viel u a. Tichun, bang thil hungtung ahi tâm tih en dingin a taikhawm tau a.

¹⁵ Tichun, Isu kawm a hung tun phet u chun, thitha mat, nuoi in a mat khah, puon silh a, lungthim ngêi pu chun a va muu a; tichun, a lau tau a.

¹⁶ Chun, a mute chun thitha mat chunga thil tun dân leh vawk chanchinhaw chuh amau haw chuh a na hilh tau a.

¹⁷ Khutichun, amau haw chun Isu chuh a gam u apat a pawt dingin a ngên tau a.

¹⁸ Chun, Isu chuh kuong a a chut ding kuon in, thitha matsa pa khan amah kawma um den a ngên ta a.

¹⁹ Himahlele, Isu’n a phal puoh a, a kawmah, “In ah, na guolte kawmah chieh inla, Lalpa’n thil a hun hih sak lopi zie leh. a hun lungsiet zie hi amau haw le va hilh viel ah,” a ti zaw ta a.

²⁰ Tichun, a pawtdawk a, Dekapoli ah Isu’n thil a hih sak lopi zie chuh a tângsap pih ta a; chun, mi chengcheng in mak a sa tau a.

Numei Thipût leh Jairus Chanu

²¹ Chun, Isu chuh kuong a gâl lehlam a kaih kit phetin, mipi nasatak a kawmah a hung khawm u a amah chuh dîl pang ah a um a.

²² Chun, ngaitie, kikhawpna In lawiupate laka khat, a min Jairus chuh a hung a; Isu a muh phetin a keng bul ah a khupbawk a,

²³ “Ka chanu neucha a thi vangvang a; a hung dam a, a hung hin dawk theihna dingin, hung a, a chunga na khut hung nga dingin ka hun ngên hi,” ti’n a ngên a.

²⁴ Tichun, Isu’n amah chuh a zui a; khutichun, mipi nasatak in amah a zui u a, a vawk hut hut u a.

²⁵ Chun, zie tak achun numei khat kum sawmlenih thiput a damlo a na um a,

²⁶ Daktor tamtakin a na enkawl tau a, a neih chengcheng a na mang zo ta a, himahleh, phatchuom nâk sangin, a khawk zaw deuh deuh ta a.

²⁷ Amah chun Isu Chanchin a na zak phetin, a nung ah, mipi lak ah a hung a, a puon a khawih a.

²⁸ “A puon mawng khawih leng le hihdam in um ing ka” tih a ngaihtuoh ahi.

²⁹ Tichun, phulo-halo in a thiput chuh a hung hai zieng ta a; a natna chuh hihdam ahi tai tih, a sapum ah a kihe ta a.

³⁰ Chuleh, Isu’n le a sung apat in thilhih theihna a pawt hi tih a he pai zieng ta a, mipi lak achun a dâk viel a, “Kuo a ka puonhaw khawih kha?” a ti a.

³¹ Ziephet chun, sinsakte’n a kawmah, “Mipi’n a hun vawk hut hut u hi na mu ngâl a, ‘Kuo a ei khawih,’ bangti dana na tih ahim?” a tiu a.

³² Himahlele, Isu’n zie a khawih pên chuh muh guo’n a enviel a.

³³ Khutichun, numei chun a chunga thil hung tung chuh he’n, lau leh kilîng kawmin a keng bul ah a hung a, khupdin in, thudik takin a hilh vek ta a.

³⁴ Isu’n a kawmah, “Ka chanu, na taksanna hi na dampih ahi, lungmuong takin chieh in la, na natna apat in dam den ta’n,” a ti a.

³⁵ Chun, Isu’n zie thu a gen lai tak chun, kikhawpna in lawiupa pa apat chun mi kuo ahim a hung a, “Na chanu a thi tai, bang zieka sinsakpa hi subuoi nalai lai ding na him?” a hung ti a

³⁶ Isu chun lah a thugen u chuh bengkhawn lo in, kikhawpna In lawiupa pa kawm achun, “Lau ki’n, gingcha zieng ah,” a ti a.

³⁷ Chun, Peter leh Jakob leh Jakob suohpihpa Johan tihloh ngâl chuh, kuo mah dangin a zuih dinguh a phal puoh a.

³⁸ Tichun, kikhawpna In lawiupa pa In chuh a tung u a, a na buoi lieiluoi u leh, a na kah vengvung u leh, a na khuoisak vungvung u chu a mu a.

³⁹ A sung ah a va lut a, a kawm u ah, “Bang zieka navêk um taka um a, kap na hiu hi? Chapang chuh a thi puoi, a ip ahi zawi,” a ti a.

⁴⁰ Ziephet chun, amau haw chun a nuihsan mai u a, himahleh, amau haw a nawhdawk vek zawhin, chapang nu leh a pa leh a sinsak thum te chuh a pui a, naupang kuolna pindan achun a chieh lut tau a.

⁴¹ Tichun, chapang chuh a khut in a tu a, a kawmah, “Talitha kumi”; a ti a; zie chuh, “Bawinu tho ah ka tii,” tihna ahi.

⁴² Tichun a tho dawk pai zieng a, a chieh ta a; (Amahnu chuh kum sawm le nih mi ahi.) Zie banga chuh a hung um phet chun, mak a sa mah mah tau a.

⁴³ Himahlele, Isu’n kuomah hetsak lo dingin a khâm chak a; amahnu chuh bang ahim khat nek ding pie dingin thu a pie a.