MARK 3 - PATHIEN LEKHABU THIENGTHO (BSI)

Khut Zeng Hihdamna

¹ Chun, Isu chuh kikhawpna In ah a lut kit a; zie tak achun mi khat khut zeng a na um a.

² Zie a mi khenkhatte chun amah a hêk theihna dingun. Chawlhni’n a hihdam dei mawh ti’n a chingsui u a.

³ Isu’n khut zengpa kawm achun, “Hung ding dawk ah,” a ti a.

⁴ Chun, mipite kawm achun. “Chawlhni’n hih phat a thieng hi, hih siet? hukdam a thieng hi, suklup?” ti’n a dâwng a. Himahlele, a thip kêi u a.

⁵ Isu chun a et viel lai in a lungna mah mah a, himahleh, a lunggil tâk zieu chuh a muh in khawk a sa mah mah a. Chun, mi pa kawm achun, “Na khut tung dawk ah.” a ti a. Tichun, a tung dawka, a hung dam ta a.

⁶ Ziephet chun, Pharisaite chuh a pawtdawk u a, amah a suklup theih dân dinguh ngaihtuoh in, Herod lawi a mihaw tawh a kihotuok pai zieng tau a.

Dîl panga Mipi Tamtak

⁷ Himahleh, Isu chuh dîl lam ah a sinsakte tawh a chieh mang u a; chun, mipi nasatak, Galili gam apatte, Judia gam apatte,

⁸ Jerusalem apatte, Idumai gam apatte, Jordan gala patte, Tura leh Sidon khuo vel apatte chun, a thilhih lopi zie chuh a zak un, a kawmah a hung u a.

⁹ Chun, mipi ziek chun amah a dinga kuong neu khat a na ngaihtuoh sak dingin a sinsakte a hilh a, khutilochun, amah subuoi ding ahih ziek un.

¹⁰ Mi tamtak a hihdam ta ngâl a; khutichun, natna nei taphawt in amah a tham theihna dingun a vawk hut hut u a.

¹¹ Thitha buokte’n le amah a muh tieng u leh, a ma ah a bawkkhup u a, “Nang, Pathien Chapa chuh na hi,” ti’n a kiko sek u a.

¹² Isu chun, thitha buok vawpte chuh a chanchin phuon loh ding ti’n a kham chak zel a.

Sinsak Sawmlenih te Têlna

¹³ Chun, Isu chuh tângah a chieh to a, a deih dân cheng chuh a sam dawk a, a mau chuh a kawmah ahung u a.

¹⁴ A têldawk, sâwlchak sawm le nih te kawm achun, “Ka kawma um dinga ka hun tel na hiu hi, thugen ding leh,

¹⁵ thithate nawhdawk theihna thuneihna nei dingin ka hun sawl na hiu,” ti’n.

¹⁶ Ziehaw chuh: Simon, (Peter a sak leh);

¹⁷ Zebedai chapa Jakob leh Jakob suohpih Johan te, (ziehaw chuh Boanerges a sa a, zie chuh Van gi chate tihna ahi);

¹⁸ Chun, Andrew te, Philip te, Bartholomai te, Matthai te, Thoma te, Alphai chapa Jakob te, Thaddai te, Kanaan a um Simon te,

¹⁹ a matsakpa Juda Iskariot te ahiu hi.

Ngaihdam Theih loh Gitlohna

²⁰ Chun, Isu chuh In ah a chieh ta a. Mipi nasatak a hung khawm kit u a, tichun, Isu leh a sinsakte’n chângthâk nasan le a ne thei ta puou hi

²¹ Zie chuh a inkawte’n a zak un, a ngawl ahi a tih ziekun, amah man dingin a kipan dawk tau a.

²² Chun, dân thuzikte khenkhat, Jerusalem apat a hungte chun, “Belzebul vawp ahi hi, thitha lengpa ziekin ahi, thitha haw a nawhdawk sek,” a tiu a.

²³ Khutichun, Isu’n amau haw chuh a sama, a kawm u ah, “Setan in Setan mah bangti’n a nawhdawk thei die?” ti’n, tehkal thu’n a gen a.

²⁴ “Leng gam le, amau leh amau a kido u chun zie leng gam chuh dingdawk thei puo’n au.

²⁵ Inkuon khat le amau leh amau a kido u chun, ziete Inkuon chuh dingdawk thei puo’n au.

²⁶ Setan le amah leh amah kido a, a kilan chun, dingdawk puo’n tin, hung beimang zaw mai ina.

²⁷ “Kuoma’n, mihat chuh a kân masak a, a In a suksiet sak loh ngâl chun, mihat In a lut in, a sum a lâksak thei puoi.

²⁸ “Tihtakzet in ka hun hilh na hiu hi, mihiem chate hi a gitlohna chengcheng u leh, a thil phalo genteu cheng chu ngaihdam hiu intin;

²⁹ Himahlele, Thagau thiengtho zet gensie vang chuh ngaihdam hi ngei puou intin, kumlekhuo a mawhchanna lauh-um achun um zaw’n au,” a ti a.

³⁰ (“Thagau buok vawp ahi,” a tih ziekuh a Isu’n zie chuh a gen ahi.)

Isu Nu leh a Suohpihte

³¹ Chun, Isu nu leh a suohpihte chuh a hung tung u a. Pawlam ah a ding u a, a sam dingin mi a sawl u a.

³² Chun, a kimvel achun mipi ana chuu a, chun, a kawmah, “Ngaitie, pawlama khun na nu leh na suohpihte’n a hun hawl ui,” a tiu a.

³³ Isu’n a dâwng a, “Ka nu leh ka suohpihte chuh kuote ahiu hi?” a ti a.

³⁴ Chun, mipi a kîm vela chute chuh a enviel a, “Entiem u, ka nu leh ka suohpihte hih!

³⁵ Kuole, Pathien deih guol hih ta chuh, ziete ngêi chuh ka suohpihpa, ka suohpihnu leh ka nute ahiu hi,” a ti a.