MARK 2 - PATHIEN LEKHABU THIENGTHO (BSI)

Isu’n Zeng a Sukdamna

¹ Chun, zie nung ni sawtlo cha nung chun, Isu chuh Kapernaum khuo ah a lut kit a; chun, In achun a um hi tih thu a kithang ta a.

² Tichun, kawtkhak bul nasana umna ding awnglo khawp hielin, mi tamtak a hungkhawm tau a; a kawm u ah thu a gen ta a.

³ Chun, zeng khat mi li’n a zawn uh, a kawmah a hun pui u a.

⁴ Mipi zieka a kawm a hun naih theih loh phet un, a umna In chung chu a phel u a, chun, a vihvan zawh un, zeng chuh a zâlkhun chunga kuolsa’n a zuk khâi tha suk uh a.

⁵ Chun, Isu’n a taksan zieu a muh phetin, zeng kawm achun, “Ka cha, na gitlohna haw ngaihdam ahi tai,” a ti a.

⁶ Zie lai chun, dân thuzikte khenkhat zie tak achun a chuu a, a lunggil un a ngaihtuoh u a,

⁷ “Zie pa hin bang zieka Pathien gensie a zie tawbang thu hi a gen ahi die aw? Pathien tih loh ngâl in, kuo’n gitlohnate a ngaidam thei a a hi?” ti’n.

⁸ Chun, Isu’n, a lunggil un zie bang chun a ngaihtuoh ui tih a lungthim in a he pai zieng a, a kawm u ah, “Zie thu haw chuh bangati a na lungthim u a ngaihtuoh?

⁹ Zeng kawma hin, ‘Na gitlohte ngaihdam a hi tai’ tih leh, ‘Tho in la, na puonphah la’n la, keng in chieh ta’n,’ tih hi a khawi zawk a gen baihlam zaw?

¹⁰ Himahlele, Mihiem Chapa’n lei chunga hin gitlohte ngaihdam theihna a nei hi tih na hetna dingun,” zeng kawm achun,

¹¹ “Tho inla, na puonphah la’n la, na In ah chieh ta’n, tih ka hun hilh hi,” ti’n.

¹² A bawn u a a et zing lai u chun, amah chuh kin takin a tho a, a puonphah a la a, a chieh ta a. A bawn u chun mak a sa mah mah zieng tau a, “Zie tawbang himhim hi ka mu kha puou hi,” ti’n Pathien a pakcha tau a.

Levi (Matthai) Sapna

¹³ Chun, Isu chuh Galili dîl pang achun a chieh kit a. mipi nasatak a kawmah a hung khawm uh a, amau haw chuh a na sinsak a.

¹⁴ Chun, a chieh lai in, Levi, Alphai chapa, sieh chawihna mun achun a mu a, a kawmah, “Ei zui ah,” a ti a. Tichun, a kipan a, a zui ta a.

¹⁵ Zie nung chun, Isu, Levi In a ankuong uma a chut lai in, siehdawlte leh mi gilote tamtak in Isu leh a sinsakte chuh a umpih u a; tamtak ahiu a, amah a zui sek uh a.

¹⁶ Chun, siehdawlte leh mi gilote, Isu’n ankuong a umpih chuh, Danthuzikte leh Pharisaite’n a muh un, a sinsakte kawmah, “Bangti a, mi gilote leh siehdawlte kawma ne a, dâwn ahim?” a tiu a.

¹⁷ Isu’n zie chuh a zak phetin, a kawm u ah, “Mi damtheite’n daktor a ngai puou a, mi dammawhte’n a ngai sek ui. Mi diktatte sam dinga hung ka hi puoh a, mi gilote sam dinga hung ka hi zawi,” a ti a.

Anngawlh Thu a Dawtna

¹⁸ Chun, Johan sinsakte leh Pharisaite’n an a ngawl u a. Tichun, mi kuote ahim Isu kawmah a hung u a, a kawmah, “Bang zieka Johan sinsakte leh Pharisaite’n an ngawl sek a, nang sinsakte’n a ngawlh sek loh uh a?” a tiu a.

¹⁹ Isu’n a kawm u ah, “Mo puite kawma a pasal ding a um sung cheng, mo puite chun an a ngawl thei u a ahim? a pasal ding a kawmuh a um sung cheng an a ngawl thei puou hi.

²⁰ Himahlele, a pasal ding chuh a kawm u apat puihmang na ding ni chuh hung tung intin, zie nihaw chule vang hun ngawl un au.

Puon leh Uain pêng Tehkal Thu

²¹ “Kuoma’n puon lui, puon khaihzung nailoh them in a belh ngei puoi; belh ta leh, a belhbitna ding chun luoi ek zaw’n tin, a thak chun a lui chuh luoi ek intin, hung hah-ek zaw diek ina.

²² Chuleh, kuoma’n uain thak savun uain pêng lui haw ale a thun ngei puoi; kawih ta leh, uain thak chun savun pêng haw chuh phukêk intin, uain chuh kibuo’n tin; savun pêng haw chuh sie’n au; ahin. uain thak chuh vang uain pêng thaka kawih ding ahi,” a ti a.

Chawlhni Chungthu a Dawtna

²³ Chun, hiti hi ahi a, chawlhni’n Isu’n buhlei haw chuh a hawh malam a; a sinsakte’n a chieh kawm un buhvui haw chuh a sik tau a.

²⁴ Khutichun, Pharisaite’n Isu kawmah, “Entie, bang zieka na sinsakte’n Chawlhni a hih thien loh a hih uh a?” a tiu a.

²⁵ Chun, Isu’n a dâwng a, “David leh a lawite tâksap u a, a gilkiel lai u a a thilhih u kha na sim kha puou hi?

²⁶ Abiathar Thiempu lienpen a hih laia, Pathien In a a lut a, thiempute tih loh ngâl nek ngei loh, chângthâk kawih chuh a nek a, a lawite le a piek zie thu haw khah?” a ti a.

²⁷ Chun, Isu’n a kawm u ah, “Chawlhni chuh Mihiem a dinga siem ahi a, mihiem chuh Chawlhni ding a siem a hi puoi.

²⁸ Zieziekchun, Mihiem Chapa hi Chawlhni Lalpa le ahi,” a ti a.