MARK 16 - PATHIEN LEKHABU THIENGTHO (BSI)

Isu Thawhkitna

¹ Chun, Chawlhni chuh a hung beih phetin, Mari Magdalin leh, Jakob nu Mari, leh Salom te chun, chieh a Isu luong chuh nuh dingin thil gimlim a chawu a.

² Chun, ni sagih ni masapen zingkal matak in, nisa suok zui in thân achun a chieh u a.

³ Lampi achun, “Thân kawt apat suong chuh kuo’n ei lik dawk sak ta die aw?” ti’n a kiho u a. (Suong lientak ahi ngâl a.)

⁴ Himahleh, a vak et phet u chun, suong chuh kilik chawnsa’n a mu tau a.

⁵ Khutichun, thân sunga chun a lut u a, tangval khat, puon vam silh, changlam panga chu a muu a; a lau tau a.

⁶ Amah chun a kawm u ah, “Lau kiu, Nazareth Isu, a khetdên u kha hawl na hiu a; a tho kit tai; zie hin a um ta puoi. En mah tiem u, a sielna mun u hih.

⁷ Tuhin chieh unla, a sinsakte leh Peter kawmah: Galili gama na mau a chieh ding ahi; na kawm u a a gen guol u khan tak achun mu’n lau, tih hilh u,” a ti a.

⁸ Khutichun, amau chuh kintak in a pawt u a, thân apat chun a tai u a, lau leh kilîng kawm in, Chun, a lauh ziekun kuomah kawmah bangmah a gen puou.

Mari Magdalin kawma Isu Kilâkna

⁹ Chun, ni sagih ni masapen a zingkal a thawhkit nung in, Mari Magdalin, a sung apat a thitha sagih a nawhdawk sak nu kawmah a kilak masapen a.

¹⁰ Amahnu chuh a lawite kawmah a chieh a, mithi sun leh kap a umte chuh a va hilh ta a.

¹¹ Himahleh, amah chuh a hing kit a, amahnu chun a mui, tih he mahleu a gingcha puou hi.

Nungzui Nih te kawma a Kilâkna

¹² Chun, zie nung chun, alak u a mi nih gam lam zuona a chieh lai un mêl zatchuom pu’n a kawm u ah a kilak a.

¹³ Amau chuh a vaikit u a, sinsak dangte chuh a hilh u a, himahlele, a gingcha diek puou hi.

Sawmlekhatte kawma Kilâkna

¹⁴ A nunung pen ah, ankuong a um lai un, sawmlekhatte kawmah a kilak a. A thawhkit nunga amah mute thugen a taksan loh ziek u leh, a lunggil hawu tâk ziek chun amau haw chuh a gai a.

¹⁵ A kawm u ah, “Khawvel pumpi ah chieh un la, thilsiem tincheng kawmah Chanchin Pha gen un.

¹⁶ A gingcha a baptistma chang chuh hukdam in um intin, a gingcha lo chuh vang mawhchang in um ina.

¹⁷ Chun, a gingchate chuh thilmak hihtheihna piek in um un au: Ka min in thithate nawhdawk un tin; pau thak in le pau un au;

¹⁸ Gulhaw chuh khut in lau intin; a hihloh leh thihna gu bang hita leh dâwn mah leu, suknat in um puo’n au; damlote chungah a khut uh ngau intin, tichun hung dam zel un au,” a ti a.

Isu Van a a Kalna

¹⁹ Khutichun, Lalpa Isu’n a kawm u a thu a gen zawhin, van a puih toh in a um a, Pathien changlam ah a va chu ta a.

²⁰ Tichun, sinsakte chuh a chieh dawk tau a, gamtin ah Chanchin Pha chuh a gen tau a; chun, Lalpa’n amau haw chuh a kithuohpih a, a thilmak hihteu chun a thugen teu chuh a hihdet zel hi. Amen.