MARK 13 - PATHIEN LEKHABU THIENGTHO (BSI)

Isu’n Jerusalem Siet ding Thu a Genna

¹ Chun, Isu chuh Pathien Ho-In apat a chiehdawk lai in, a sinsakte laka khatin a kawmah, “Sinsakpa, entie, a suonghaw leh a Inhaw hi a nasa ngêi ie,” a ti a.

² Isu’n a kawmah, “Zie in lopitak hi na mu maw? sukchip loh a suong kitieng mawng mawng taka hin um puo’n a,” ti’n a dâwng a.

Buoina leh Sukgimtheihna

³ Chun, Isu chuh olive tânga Pathien Ho-In zawna a chut lai in, Peter leh Jakob leh Johan leh Andrew te chuh a kawmah a hung u a:

⁴ “Zie thil haw chuh bangtik leh hi dinga, zie thil haw chengcheng hung tun ding tieng chu leh a tiemtehna bang hi dinga, kei uh ei hilh ah,” ti’n a dawng guu a.

⁵ Chun, Isu’n a kawm u ah, “Kuoma’n a hun dawha bawl lohna dingin chingthei un:

⁶ Mi tamtak, ‘Krista ka hi’ ti’n Ka min in hung un tin; mi tamtak hun dawha bawl ding ahiu hi.

⁷ Chuleh, kido thu leh kido thuthang na zak tieng u leh, lungzîng kiu; zie thil haw chuh a hung um ding mawng ahi; himahlele, a tawpna chuh hi tadih puo’n a.

⁸ Nam chuom leh nam chuom kido untin, gam chuom leh gam chuom kido ding ahi ngâl u a; mun chuom chuom ah inling um in tin, kiel leh buoina tung intin; ziehaw chuh nauhanat kipatna ahiu hi.

⁹ “Himahleh, chingthei u; vaihawmte hun matsak un tin, chun, kikhawpna In ah zêp hi’n na tin uh; kei ziekin vaihawmte leh lalte ma ah Chanchin pha hetsakna dingin puih hi ding na hi ngâl u a.

¹⁰ Khutichun, tawpna a tun masang in, Chanchin pha chuh mi cheng kawma gen in um ina.

¹¹ Chuleh, a hun mat u a, vaihawmna In a a hun puih hun u leh, bang ka gen die aw ti’n ngaihtuoh khawl kiu in, a hun taka hung kipie chuh gen zawu un. A gen ding chuh nanguh hilo in, Thagau Thiengtho hi zaw ding ahi ngâl a.

¹² Chun, suklup dingin suohpihpa’n a suohpih matsak in tin, pa’n a chapa matsak in tin, chate’n le a nu leh a pa do un tin. Suklup sak un au.

¹³ Kei ziekin mi chengcheng muhdah hi’n lau; himahleh, a tâwp chana thuok ngâp chuh, zie ngêi chuh hukdam in um ina.

Hapta lailung a Sukgimtheihna

¹⁴ “Amahvang chuh, thiemgau Daniel in a na gen ‘Sugampa kihdak-um’ chuh a din lohna dinga ding na muh tieng u leh, (a sim ta’n a umzie he hen.) Judia gama umte chuh tânghaw achun taimang u heh.

¹⁵ Chun, In chunga umte chule kum kiheh, a In sunga thil umte ladawk dingin lut kiheh.

¹⁶ chun, lo a umte chule, a puon la dingin vaikit kiheh.

¹⁷ Himahleh, zie nihaw a gai leh chasen pawmte chung chuh gik ina!

¹⁸ Chun, ziehaw hi phalbi laia a hung tun lohna dingin Pathien kawmah ngên un.

¹⁹ Zie nihaw achun gimtheihna hung um ding ahi a; zie bang khawpa nasa mawng mawng chuh, Pathien siem, thilsiem pat tûng apat tu chan hin a um kha ngei puoh a, um le um kha ngei puo’n a.

²⁰ Lalpa’n zie nihaw chuh suchawm kileh, kuomah suokcha puo’n a. Himahleh, a mi telte, a telchuomte ziekin nihaw chuh a suchawm ta a.

²¹ “Zie phat chu leh, mi kuo’n le na kawm u a, ‘En tiem u, zie hin Krista a um hi’ ahim, ‘En tiem u, zie khun a um hi’; a tih u chun, taksang kiu.

²² Krista lêmte leh thiemgau lêmte hung pawt ding ahi ngâl u a. Tiemtehna haw leh thilmak haw bawl un tin, hihthei vang leh telte nasan le puih mang guo’n au.

²³ Himahleh, chingthei u! a hun tun ma’n bangakai ka hun hilh masak na hiu hi.

Mihiem Chapa Hungna ding

²⁴ “Himahleh, zie nihaw, zie buoina hun zawh chu leh, nisa hung thim in tin, tha vak ta puo’n tin,

²⁵ Van apat in aksihaw chu kieu in tin, van thilhih theihna um haw chu suklîng hi’n au.

²⁶ Zie tieng chuleh, Mihiem Chapa chuh thilhih theihna nasatak leh lopina nasatak tawh meipi chunga hung mu’nau.

²⁷ Chun, vânsâwlchâkte chuh sawldawk intin, a telchuomte chuh kâwlmawng li apat, lei tâwp apat a van tâwp chanin lawlkhawm ina.

Theipi Kung a Tehkalna

²⁸ “Tichun, theipi kung a hin tehkal thu sin u; a bâk a hung dawna, a nah a hung sel tieng leh, nipi a nai tai tih na he sek ui.

²⁹ Khutibang mah chun, zie thil haw hi hung tung na muh tieng u leh, a hung nai ta a, kawt bul ngêi ah a um tai tih heu in.

³⁰ Tihtakzet in ka hun hilh na hiu hi, zie thil haw chengcheng hi a hung tun ma’n, zie khang hi beilo ding ahi.

³¹ Lei leh van bei intin, ka thu vang chuh bei puo’n a.

Ani leh Dâkkâl Kuoma’n Helo

³² “Himahlele, zie ni leh dâk thu chuh, Pa ngâllo chun, kuoma’n, van a van sawlchakte’n le, Chapa’n le a he puou hi.

³³ Chingthei unla, kiging zinga um in paucham un; a phat chuh na he puoh ngâl u a.

³⁴ Mihiem Chapa chuh, mi a In nusieh a, a suokte thuneihna pie a, mi tin amau sep ding chiet pie a, kawtkhak ngakte le kigin zing ding thu pie a, gam gamla taka zin tawbang chuh ahi.

³⁵ Zieziekchun, kiging zingin um u; Inneipa hung ding phat chuh, nitâk lam ahim, zankhang ahim, âk khuon ahim, zingkal ahim, a hih ding na he puoh ngâl u a.

³⁶ Khutilochun, hung phut in, ipmu’n hun mu kha’n a.

³⁷ Chun, na kawm u a ka gen hi, mi chengcheng kawma ka gen ahi: Kiging zingin um un,” a ti a.