MARK 12 - PATHIEN LEKHABU THIENGTHO (BSI)

Grep Huon Enkawlte

¹ Chun, Isu’n tehkal thu’n a kawm u ah thu a gen a: “Mi kuo ahim in huon a bawl a, pal in a um kimvela, grep thâwkna ding khuk a lai a, venna insang a sa a. Tichun, huon enkawlte kawmah thawhlawh dingin a pie a, tichun, gam gamla tak ah a chieh ta a.

² Tichun, grep lâkkhâwm phat ahih phetin huon enkawlte haw apat a a chanvo la dingin a suokte laka khat a sawl ta a.

³ Huon enkawlte chun amah chuh a na man u a, a zêp u a; khutngawn in a sawl kit tau a.

⁴ Huon neipa chun a suokte dang a sawl kit a; zie chu le a luchang a na khet gawp sak u a, zahhuoi takin a na bawl tau a.

⁵ A dang a sawl kit a, amah chuh a na that u a, a dang tamtak le a sawl a; khenkhatte chuh a zêp u a, khenkhatte chuh a that tau a.

⁶ Chun, chapa khat, a deih tak chuh a nei na lai a, ‘Ka chapa hiel hi chuh a na zah un au,’ ti’n amah chuh a nunung pên in a kawm u ah a sawl a.

⁷ Himahleh, zie huon enkawlte chun, ‘Zie pa hi go luoh ding chuh ahi,’ that hitiu. Tichun, a goluoh ding hi ei a himai ina, a kitiu a.

⁸ Tichun, amah chuh ana man u a, a that u a. grep huon apat chun a paih dawk tau a.

⁹ “Zieziekchun, grep huon neipa chun bang a hun bawl ta die? Amah chuh hung intin, a grep huon enkawlte chuh sumangthai intin, tichun, grep huon chuh midang te khut ah pie’n a.

¹⁰ Zie Pathien lehkhathu hi na sim puou a ahim? ‘Insate suong deih loh chuh, A ning a suong phachuom pên a hung hi tai;

¹¹ Ziehi Lalpa hih ahi a, I mitmuh un a mak ahi,’ tih hih,” a ti a.

¹² Tichun, Juda lawiupate chun Isu chuh mat a guo tau a, zie tehkal thu chuh amau haw chungthu genna ahi tih a het ziekun. Himahleh, mipite chuh a lau u a, khutichun, a nusieh uh a, a chieh mang tau hi.

Sieh Chawihna Thu a Dawtna

¹³ Chun, Pharisai khenkhatte leh Herod lawi a mi kuote ahim in, Isu chuh a thugena man dingin mi a sawl u a.

¹⁴ A kawm a tun phet un a kawmah, “Sinsakpa, mi diktat na hi a, kuomah khenchuom na nei puoi tih ka heu a; kuomah khenchuom nei lo in, tihtakzet in Pathien lam thu na sinsak sek hi; Kaisar kawma sieh chawih hi a thieng hi, thieng lo? Ka piek dinguh ahi ka piek loh dinguh?” a tiu a.

¹⁵ Himahlele, Isu’n a a gukhah zieu chuh a he a, a kawm u ah, “Bang zieka ei zedap na hiu hi? Makhai hun lau inla, ei etsak un,” a ti a.

¹⁶ Tichun, a hun lau a, chun, ama’n a kawm u ah, “Zie hi kuo lim leh kuo min ahi?” a ti a. Amau chun. “Kaisar” a tiu a.

¹⁷ Isu’n a kawm u ah, “Kaisar thil haw chuh Kaisar kawmah pieu inla, Pathien thil haw chuh Pathien kawmah pie tau u” ti’n a dâwng a. Tichun, mak a sa ten u a.

Thawhkitna Thua Dawtna

¹⁸ Chun, Sadukaite thawhkitna a um puoi tite chuh Isu kawmah a hung u a, a kawmah,

¹⁹ “Sinsakpa, Mosi’n mi khat in cha nei lo a a zi a thih san chun, asuohpihpa chun a zi chuh luoh in tin, a suohpihpa a ding chun suon a neih sak ding ahi, ti’n ei zik sak a.

²⁰ Awle, unau pasal sagih a um u a, a upapen in zi a nei a; suon nei lo in a thi a.

²¹ A nihna chun a luoh a; suon nei diek lo in a thi a, a thumna le zie tawbang mah chun a um a

²² Tichun, sagihte chun a kichênpih chiet u a; suon himhim a nei puou a, a tâwp chun numei chule a thi ta a.

²³ Aleh thawhkitna ah, a thawhkit tieng u leh a laku ah kuo pên zi ahi ta die leh sagihte chun zi’n a nei chiet ngâl u a?” ti’n a dawng u a.

²⁴ Isu’n amau chuh a dâwng a, a kawm u ah, “Zieziek hin hilo maw na ngaihkhelh sek uh, Pathien lehkhathu leh Pathien thilhih theihna na het loh ziek u hin?

²⁵ Mithi lak apat a a thawhkit tieng u leh, zi leh pasal a kichêng ding ahi ta puoh ngâl u a; van a vânsâwlchâkte banga um ding ahi zawu hi.

²⁶ Mithi haw kaihthawha a um ding thuu chuh: Mosi lehkhabu a, hambawk laka meikuong thu akhan na sim kha puou maw? Zie taka khan, Pathien in, ‘Kei Abraham Pathien, Isak Pathien, Jakob Pathien ka hi, ti’n Mosi kawmah a gen ngâl a,’ ti’n.

²⁷ Amah chuh mithi Pathien a hi puoh a, mi hing Pathien ahi zawi na ngai khiel nasa mah mah ui,” a ti a.

Thupiek Lopipen

²⁸ Chun, dân sinsaktu khat a hung a, a kiniel u chuh a na za a. Isu’n Sadukaite chuh phatak in a dâwng hi tih a mu a, khutichun; “Thupiek lak lak ah a khawi hi a lopipen die?” ti a dawng dingin a kawmah a hung a.

²⁹ Isu’n, “Thupiek chengcheng laka a lopipen chuh, ‘Ngaiin, Israel: Lalpa I Pathien u chuh Lalpa khat mai ahi a;

³⁰ Lalpa na Pathien chuh na lunggil chengcheng, na thagau chengcheng, na ngaihtuohna chengcheng in leh na hatna chengcheng in na hehpih ding ahi’; ziehi thupiek lopipen chuh ahi.

³¹ A bana chuh ziehi ahi: ‘Nangmah na kihehpih guolin na vengte le na hehpih ding ahi,’ tih hi. Zie sanga thupiek lopi zaw hi a um puoi,” ti’n a dâwng a.

³² Ziephet chun, dân sinsakpa chun Isu kawmah, “Ahi ngut hi, Sinsakpa, na gen dik hi: Pathien khat chauh a um a, amah lo chuh pathien dang a um puoi.

³³ Mi’n Pathien chuh a lunggil chengcheng leh, a ngaihtuohna chengcheng leh, a hatna chengchenga a hehpih ding ahi a; chuleh, amah a kihehpih guola a invengte le a hehpih ding ahi. Zie thupiek nih te zawp hi, hâlmang thilpiek leh kithawihna dang cheng sanga pawimawh zaw ahi,” a ti a.

³⁴ Khutichun, ching takin a dâwng hi tih Isu’n a het in, a kawmah, “Pathien gam tawh na kigamla puoi,” a ti a. Zie nung chun kuoma’n bangmah a dawng ngam ta puou hi.

Messiah Chungthu a Dawtna

³⁵ Chun, Isu chun Pathien Ho-In a a sinsak lai in, amau haw chuh a dâwng a, “Bangtia dân sinsaktute chun Krista chuh David suon ahi ti sek ahiu a?

³⁶ Thagau Thiengtho hatkhum in David ngêi chun: ‘Lalpa chun ka Lalpa kawmah, Na melmate na kêngpêk nuoia ka kawih masang sieh ka changlam ah chu’n,’ a ti ngâl a.

³⁷ David ngêi in amah chuh ‘Lalpa’ a ti ngâl a; bangti’n Krista chuh David chapa ahi thei die?” a ti a. Chun, mipi nasatakte chun Isu thugen chuh kipâk takin a ngaithau a.

Isu’n Dân Sinsaktute a Gaihna

³⁸ “Danthuzikte lak ah chingthei un, amau chun puonâk chuol âk a khawlailen a nuom sek u a; dawl muna chibai piek bang,

³⁹ Kikhawpna In a chutphah phapen leh, guolvakna haw a mun sangpen a chut a ngek sek u a.

⁴⁰ Meithai sum a neguu a, a inteu a lâksak u a, a lim maimai in sawt tak tak a paucham sek uh a; ziehaw hin gawtna nasazaw mu ding ahiu hi,” a ti a.

Meithainu Tuoklawm

⁴¹ Chun, Isu chuh tuoklawm bawm zawn achun a chu a, tuoklawm bawma mipite dangka khiek zie chuh a en a; mi neizo tamtak haw chun tampi pi a khieu a.

⁴² Zie chun, meithai neilah tak khat a hung a, matiek nih a khie a, zie chuh paisa khat hu ahi.

⁴³ Tichun. sinsakte a kawmah a sam khawm a, a kawm u ah, “Tihtakzet a ka hun hilh na hiu hi, tuoklawm bawma khie chengcheng te sangin, zie meithai neilah tak hin a khie tam zawi.

⁴⁴ Amau haw chun a neih val u apat a khiek uh ahi a, amah hin vang a deih lai tak, a neih chengcheng, a kitundinna ding chengcheng chuh a khiek zawh vek a hih ziekin,” a ti a.