MARK 11 - PATHIEN LEKHABU THIENGTHO (BSI)

Lopi taka Isu Jerusalem a a Lutna

¹ Chun, Jerusalem a tun ding kuon u a, olive tânga Bethphage leh Bethani khuo kieng a tun un, a sinsakte laka mi nih a sawl a,

² a kawm u ah, “Na mazawn u a khuo akhun va chieh un la; na lut phat phat u leh, sabiltungno kihên, a chunga kuomah chut khâk lohna va mu’n lau; zie chuh sut unla, hun kai u.

³ Chun, mi kuo’n le na kawm u a, ‘Zie kha bang dinga na hih uh a?’ ti a a hun dawt u leh, ‘Lalpa’n a mamawh ahi,’ ti leu chin, zie hin hun sawl sak pai zieng ina,” a ti a.

⁴ Khutichun, a chieh tau a, kawtkhak pawlama, khawlai a sabiltungno kihên chuh a va muu a, a sut tau a.

⁵ Chun, a sut lai u chun, zie taka ding mi khenkhat chun, “Sabiltung no chuh bang dinga na sût uh a?” a tiu a.

⁶ Amau chun Isu’n a kawm u a a hilh guolin a dâwng u a, tichun, a chieh sak tau a.

⁷ Tichun, sabiltungno chuh Isu kawmah a hun tun u a, a chungah a puonhawu a phah u a; chun, a chungah amah a chu ta a.

⁸ Mi tamtakin lampi ah a puonhawu a phah u a; mi dangte’n thingbawk haw a sat thau a, lampi ah a phah u a.

⁹ Mipi, amalam a chiehte leh a nunga zuite chun: “Hosanna; Lalpa min a hung chuh a hamphâi;

¹⁰ Gam hung tung ding, I pau David gam chuh a hamphâi. Chungnung pên a khun Hosanna,” ti’n a kiko u a.

¹¹ Chun, Isu chuh Jerusalem ah a lut a, Pathien Ho-In ah a chieh a; thil chengcheng chuh a en viel a. Himahleh, nitâk lam a hih tâk ziekin, sinsak sawmlenih te chu tawh Bethani ah a chieh tau a.

Isu’n Theipi Kung a Gâusapna

¹² Chun, a zing kita Bethani apat a a chiehdawk lai u chun, a gil a hung kiel ta a;

¹³ Theipi kung, a nahbawk in a khuh lieiluoi chuh gamla tak ah a vak mu a, a gah a muh khâk leh ti’n a va zuon a; himahleh a va tun phetin, a nah ngâllo chuh bangmah a mu puoh a; theipi gah hun a hi puoh him a.

¹⁴ Isu’n theipi kung kawm achun, “Tu apat in kuoma’n na gah ne ta kihen,” a ti a. A sinsakte’n a gen chuh a zau hi.

Pathien Ho-In Sukthienna

¹⁵ Chun, Jerusalem a tun phet u chun, Isu Pathien Ho-In ah a lut a; Ho-In a thil zuokte leh chawte chu a nawhdawk a, dangka theng haw dawhkân leh, vakhu zuokte chutphah haw chuh a sawnpai a.

¹⁶ Kuoma’n Pathien Ho-In huongsung a thil a chawih pai u chu a phal ta puoh a.

¹⁷ Tichun, a kawm u achun, “Ka In chuh namtin dingin ‘Pauchamna In ti’n au,’ tih zik hilo ahim? Himahlele, nang haw’n guchate kisêlna In in na siem zawu a,” ti’n a sinsak ta a.

¹⁸ Chun, Thiempuliente leh Danthuzikte chun zie chuh a zau a, tichun, Isu a thah theihna ding u chuh a hawl tau a. Mipi chengcheng in a thu sinsak chuh mak a sa ten ngâl u a.

¹⁹ Chun, nitâk lam cheng leh khawpi apat chuh a chiehdawk seka.

Theipi Kung apat a Zilding

²⁰ A zingkal kit mataka, lampi a a chieh lai un, theipi kung chuh a zung chana vuoi zo vekin a va mu tau a.

²¹ Tichun, Peter in thil umchan kha a hezing a, Isu kawmah, “Sinsakpa, en tie! theipi kung na gausap kha a vuoi zo tai,” a ti a.

²² Isu’n a kawm u ah, “Pathien taksang u.

²³ Tihtakzet a ka hilh na hiu hi, kuole, zie tâng kawma hin, ‘Na kichawn inla, tuisuohgiet ah na kipaih ah,’ ti a, a lunggil a ginglah lo a tung ngêi ina tih, gingcha ta’n a gen guol u chuh mu’n au.

²⁴ Zieziek hin ka hun hilh na hiu hi: Bang ahim khat ngên a na paucham tieng u leh, na nget u chuh a mu sa’n kingai un; tichun, na nget tâk u chuh piek in um un lau.

²⁵ Chuleh, na paucham a na din tieng u leh kuo chung hi ta leh thukhawk bang ahim na neih u chun, ngaidam un, khutichun, na Pau, van a um in hun ngaidam ina.”

²⁶ Himahlele, na ngaihdam loh u chun na Pau van a um inle na bawhsiet nau hun ngaidam diek puo’n a, a ti a.

Isu Thuneihna chunga Dawtna

²⁷ Tichun, Jerusalem a tung kit tau a. Isu Pathien Ho-In a a vak viel lai in, Thiempulien haw leh, Danthuzikte leh upahaw chuh a kawmah a hung u a, a kawmah,

²⁸ “Kuo thu a ziehaw hi na hih ahi? Zie thil haw hihna ding hin kuo a thuneihna hun pie?” a tiu a.

²⁹ Isu’n a kawm u ah, “Ken le thu kamkhat hun dawng ing ka, ei dâwng un la, tichun, ken le bang thuneihna a zie thil haw hi hih ka hih hun hilh ing ka.

³⁰ Johan baptistma kha van a kipan ahi, mihiem a kipan? ei dâwng u,” a ti a.

³¹ Amau haw chuh a kingaihtuoh u a, “Vana kipan, ti leuhing la, ‘Bang zieka Johan taksang lo?’ ti’n tin.

³² ‘Mihiem apat ti leng la.’” (Mi chengcheng in Johan chuh thiemgau tak taka a ngaih ziekun a lau ngâl u a.)

³³ Tichun, Isu a dâwng u a, “Ka he puou hi,” a tiu a. Ziephet chun, Isu’n amau chuh a dawng a, “Ken le kuo thu’n a zie thil haw hi ka hih, nanguh hun hilh diek puo’ng ka,” a ti a.