MALAKI 3 - PATHIEN LEKHABU THIENGTHO (BSI)

¹ “Ngaitiem u! ka sawlchak hun sawl ding ka hi a, Ka masangah lampi hun guonggalh ina. Tichun, na hawl uh, Lalpa chuh a Ho-In ah thakhat in hung phut ina. Thuthun Sawlchak na kipahpih u chuh hung in tin, ka thu chuh hung phuong dawk ina,” Bangkim hihthei Lalpa chun a tii.

² Himahleh, a hung ni chuh kuo a thuok zo ding? A hung kilat tieng leh kuo a ding thei ding? Amah chuh hâltuina mei tawbang leh puon sawpte sahbawn tawbang ahi ngâla.

³ Dangkaguo hâltui pa leh hih thiengthopa bangin chu’n tin, Levi chate chuh hih thiengtho in tin, amau haw chuh sana leh dangkaguo hih thieng bangin amau haw hih thieng ina; diktatna thillat te Lalpa masanga lat masang un.

⁴ Khutichun, malai ni leh kumte bangin, Juda gam leh Jerusalem in thillat a hun piek dingteu chuh Lalpa dingin deihum tak hi kit ina.

⁵ Vaihawm dingin hung kit vak ding ka hi, dawithiemte, zawlsaite, lepchieh a kipautiemte chung leh, meithai leh chagah leh kithalakte lawh suchavai a, bawlsiete leh, gamdang mi nawhmangte leh, ei kihcha lote chung achun hetpihtu diktak hi ding ka hi, tih hi Bangkim hihthei Lalpa kamsuok ahi.

Sawma-khat Piek Thu

⁶ “Kei Lalpa hi ka kitheng ngei puoh a, zieziekchun nanguh, Aw Jakob chate haw, sukmangthai a umlo na hiu hi!

⁷ Nanguh hun suonte hun a kipat khan, ka thuguot te na kiheimangsan u a, zuih le na zui kha puou ui! Ka kawmah hung vaikit un la, tichun, Keile na kawm u ah hung vaikit ing ka, Bangkim hihthei Lalpa’n a tii. Nang haw chun la, ‘Bang haw ahin ahim ka hung vaihkit ding uh?’ na tiu a.

⁸ Mihing in Pathien chuh a gûk sak dinga ahim? Mahleh nang u chun nei gûk sak ngâl u a, Nang haw chun la, ‘Bangti’n ahim ka hun gûk sak uh?’ na tiu a. Sawma-khat leh thilpiek haw ahin nei guksak ui.

⁹ Hansie a sapsiet na hitau hi, nang haw leh zie nam pumpi hin kei hi nei guksak sek ngâl u a.

¹⁰ Ka In a nek ding a um theihna dingin Sawma-khat chengcheng chuh a kawihkhawmna In ah hun chawikhawm un, van tukvante chuh hun hawn sak in, vangsakna dâwn sen loh khawp hielin ka hun vuk puoh nai mawh, ei hun patep mawng tiem u! Bangkim hihthei Lalpa chun a tii.

¹¹ A ne mangte chuh hun khapsak ka ting, tichun, na lei gahteu chuh hun suksiet sak ta puou un tin, huon a na grep gahteu chuh a hût in pulh diek ta puo’n a, Bangkim hihthei Lalpa chun a tii.

¹² Tichun, nam chengcheng in Vangpha hun tiu in tin, gam deihum tak na hung hih ding ziek un, Bangkim hihthei Lalpa chun a tii.

Pathien Hehpihna Thutiem

¹³ “Nang haw’n ka chungchâng thu hi khauh takin na gen sek ui,” Lalpa chun a tii. “Himahlele, nang haw chun, ‘Na chungchâng ah bang thu a ka gen uh?’ na tiu a.”

¹⁴ “Pathien nasep hi a thâwn ahi: a thupiek I zawp u leh Bangkim hihthei Lalpa ma a I thilhih teu leh kisulungkham taka I um sek u hi banga a phatchuom na?

¹⁵ Chun, mi kiletsakte chuh mi kipâk ahiu a. Mi gilote chuh a kiphattheih chauh uh hilo in, a thilhih gitlohteu chun Pathien thuokhatna chuh a patep u a, tichun, a suokcha zel ui,” na tiu a.

Ginumte Kipahman

¹⁶ Tichun, Lalpa kihchate chuh a kihotuoh u a: Lalpa chun I thugenteu a ngaitha a, a na za a, Lalpa kihchate leh amah limbawlte a ding chun hetzing na lehkhabu chuh a masang ah zik ahi ta a.

¹⁷ Tichun, “Amau haw chuh ka mite hita’n au.” Lalpa Bangkim hihthei chun a tii. “Na ka sep ni chuleh amau haw chuh Keia chuom bîk hiu un tin, chun, nulepa’n a nasem a chateu chunga zahngaihna a neih guol un zahngaihna sulang ing ka.

¹⁸ Tichun, mi dik leh mi nunsie, Pathien nasem leh ana sem lote kibatloh dân chuh hun mu ta’n lau,” ti’n.