LUKE 8 - PATHIEN LEKHABU THIENGTHO (BSI)

Isu Nungzui Numeite

¹ Chun, hiti hi ahi a, hun chawmkhat nung chun, Isu chuh Pathien Gam Chanchin Pha gen in, khaw-lien leh khaw-neu haw chuh a fang viel a. Sinsak sawmlenih te’n le a zui u a,

² Chuleh, numei kuote ahim, thitha mat dam kitte leh, natna dam kitte’n le a zui u a; ziete chuh, Mari (Magdalin kiti), a sunga thitha sagih a nawhdawkna nu leh,

³ Joanna, a pasal Chuza, Herod sum enkawl leh, Susanna leh numei dang tamtak, amau haw neihlelama Isu leh a sinsakte panpihte ahiu ui.

Buhchi Theh Tehkalna

⁴ Chun, mipi nasatak a hung kikhawm u a; khaw tin apat mi a kawma a hungkhawm phet un, Isu’n zie tehkal thu hi a kawm u ah a gen a:

⁵ “Buhchi thehpa chuh buhchi theh dingin a kuon a, chun, a theh lai chun, khenkhat chuh lamsîk ah a kie a, mi’n a tawhden u a, chung leng vachate’n a luok zo tau a.

⁶ Chun, abang suongteu chungah a kie a, a hung kehdawk phetin, a lei a nawm loh ziekin a gawp pai ta a.

⁷ Chun, a bang hamlingnei lak ah a kie a, ham chun a kehkhawmpih a, a dep mang ta a.

⁸ Chun, abang lei pha ah a kie a, a hung kek a, a hung khang lien a, a leh za’n a hung pung ta a,” a ti a. Tichun, Isu’n zie thu haw chu a gen lai in, “Zakna dinga bil nei chun zau hen,” ti’n ngeih tak in a kiko a.

Tehkal Thu Tup pên

⁹ Chun, a sinsakte chun Isu kawmah, “Zie tehkal thu hi bang tihna a hi?” ti’n a dawng u a,

¹⁰ Chun, ama’n a kawm u ah, “Pathien gam thuguk chuh nang haw het vang phal ahi a, himahlele, mi dangte kawma chun vang tehkal thu maia piek ahi; en mah leu le a muh lohna dingun leh, ngaitha mah leu le, a zâk theih lohna dingun.

Tehkal Thu Hilhchetna

¹¹ “Tehkal thu umzie kha ziehi ahi: Buhchi chuh Pathien thu a hi a.

¹² Chun, lamsîk a kie chuh, thu hesate hi ahiu hi: himahleh Setan chuh a hung a, a ginchak loh u a, hukdam a hih theih lohna dingun a lungthim apat thu chuh a lâksak sek hi.

¹³ Chun, suongteu chunga kie chuh zie tawbang hi ahiu: a het het u a, thu chuh kipâk taka pawm zieng; himahleh zung himhim a nei puou a, chawmlo kal mai a awi u a, patepna a hung um tieng a puk mang kit sek ui.

¹⁴ Chuleh, hamlingnei laka kie chuh zie tawbang mi hi ahiu ui: thu chuh za a; himahlele, damsung khawsak lunggulhnate, neihzawhna te, nuomsakna te chun a khuhmang sek a, a gah piting sek puoi.

¹⁵ Chun, lei pha a kiete chuh zie tawbang mite hi ahiu: thu chuh a zau a, lungthim takkhan leh phatak in thu a ngai u a, a ching zing u a, a gah suoh macheng a thuok sek ui.

Thaumei a Tehkalna

¹⁶ “Kuoma’n thaumei hâl in lawh a khuh ngei puou a, chun, zâlkhun nuoi ale a kawih ngei diek puou. A lut taphawt in a muh theihna dingun a tunna ah a tung zaw sek ui.

¹⁷ Phuon loh dinga îm bangmah a um puoh a, het loh ding leh lang lo dinga selguk le bangmah a um diek puoi.

¹⁸ Zieziekchun, bang tawbang in a na ngaihthak uh, ching thei un; kuole, a neita piek behlap in um intin, kuole, a neilo chuh neih sun u chule lâksak in um un au,” a ti a a.

Isu Nu leh a Suohpihte

¹⁹ Chun, a nu leh a suohpihte chuh a kawmah a hung u a, himahlele, mipi ziek chun a kawm a tung thei puou a.

²⁰ “Na nu leh na suohpihte nang hun muh guo’n pawlama khun a ding zing ui,” ti’n a va hilh u a.

²¹ Chun, Isu’n a kawm u ah, “Zie Pathien thu za a, zawpte hi ka nu leh ka suohpihte ahiu hi,” a ti a.

Isu’n Huihpi a Sukthipna

²² Chun, tihi ahi a, ni khat chuh a sinsakte tawh kuong ah a chuu a, a kawm u ah, “Dil gâl langkhat a khun kai hitiu,” a ti a. Tichun, kuong chuh a sut u a, a chieh tau a,

²³ Chun, a kitawl lai u chun, Isu chuh a na ipmu ta a. Chun, dîl a chun huihpi hattak a hung nung suk ta a; kuong chuh tuia dim dingin a hung kisa ta a, lauhthawng-um takin a um tau a.

²⁴ Sinsakte chuh Isu kawmah a chieh u a, a va phawng tau a, “Sinsakpa, Sinsakpa, mangthai ding ka hi tau hi uo!” a tiu a. Chun, amah chuh a hung a, huih leh tui kinawk chuh a gai a; tichun, a hai a, a thipkêi ta a,

²⁵ Ziephet chun, a sinsakte kawma chun, “Na taksannau chuh khawia um ahi?” a ti a. Himahlele, maksa leh lau in, “Zie pa hi kuo ahi die? Huih leh tui kinawk te le thu a pie a, a ngaih mai u hi!” a kitiu a.

Thitha mat a Sukdamna

²⁶ Chun, Isu chuh a sinsakte tawh Gerasa gam ah a chieh u a, zie chuh Galili apat a dîl hawh pai ahi.

²⁷ Chun, lui pang a kaih phet chun, khawpi apat mi kuo ahim, thitha mat khatin a kituokpih pai zieng a. Zie pa chuh hun sawttak chuh niklepuon beiin a uma, In ale um lo in, thân haw poh ah a um sek a.

²⁸ Chun, Isu a muh phet chun, aw ngeih tak in, a kiko a, a keng bul ah a bawkkhup a, a kiko a, “Isu, Pathien Chungnung pên Chapa, kei leh nang banga I kizawlna um? Ei gawt lo dingin ka hun ngên hi,” a ti a.

²⁹ Isu’n thitha buok chuh a sung apat hung pawt dinga thu a na piek tâk ziekin zie chuh a tih ahi. Zie pa chuh tamtak vei thitha chun a man ta a, thikkhau leh kawl buh sak u henla, a khut leh kengte kân mah leu, thikkhau chuh a bawttan a; tichun gamlak ah thitha’n puimang sek ahi.

³⁰ Chun, Isu’n a kawmah, “Na min bang ahi?” a ti a. A sunga thitha tamtak a lut ziekin, “Ka min chuh, Nuoi ahi,” ti’n a dawng a.

³¹ Chun, thithate chun thampikuo-âwng a sawl lo dingin Isu kawm achun a ngên u a.

³² Chun, a kieng naih u achun tâng pang ah vawk hawn tampi a tau a. Khutichun, thithate chun vawk hawn sunga chu a lut theihna dingun Isu kawma chun a ngên u a, tichun, a phalsak ta a.

³³ Tichun, thitha haw chuh mi sung apat chun a pawt u a, vawk haw sung a chun a lut tau a. Khutichun, vawk hawn chuh kawl ah a tai suk u a, dîl ah a tailut u a, tui hapvah in a thi tau hi.

³⁴ Chun, a vulhte chun zie thil haw chuh a muh phet un, a tai u a, khawpi leh lo haw achun a thu chuh a va gen viel tau a.

³⁵ Mipite chuh, thil umdan chuh en dingin a chiehdawk u a, Isu kawm a tun phet u chun, thitha pawtsan nung pa chuh puon silh a, lungthim ngeina pua, Isu keng bula chu chuh a muu a, tichun a lau mah mah tau a.

³⁶ Chun, a mute chun thitha mat a hih dam zie chuh mihaw chuh ana hilh u a.

³⁷ Chun, Gadara kimvel a mi cheng cheng chun a lauh mah mah ziekun, Isu chuh a kawm u apat chieh mang dingin a ngên u a. Khutichun, Isu chuh kuong ah a chuh a, a taihsan ta a.

³⁸ Himahlele, thitha’na pawtsan pa khan vang Isu kawmah um den a ngên a,

³⁹ Himahlele, Isu’n “Na In ah chieh kit inla, Pathien in nang dinga thil a hun hih sak lopi zie hi va gen ah,” ti’n a sawl ta a. Tichun, a chieh a, khawpi sung chengcheng achun, Isu’n amah dinga thil a hih sak lopi zie chuh a tângsap pih ta a.

Jairus Chanu leh Numei Thiput

⁴⁰ Chun, tihi ahi a, Isu chuh hungkit phet chun, mipite chun nasa takin a na lawp u a, hun sawttak amah na ngak a hih tâk ziekun.

⁴¹ Chun, ngaitie, mi khat amin Jairus kiti chuh a hungtung a, amah chuh kikhawpna in lawiupa ahi. Isu keng bul ah a bawkkhup a, a In a chieh dingin a ngên a,

⁴² a chanu neihsun, kum sawm leh kum nih vel a upa chuh thih suol a a um ziekin. Chun, Isu a chieh phet chun, mipite chun ning tin ah a vawk hut hut u a.

⁴³ Chun, numei khat kum sawm leh kum nih thiput a damlo hi a um a, a neih cheng chuh daktorte kawmah a seng zo ta a, himahleh kuoma’n a hihdam thei ngâl puou a.

⁴⁴ Zie nu chuh mipi laka Isu nung achun a hung a, a puonmawng a tham a, tichun thakhat in a thiput chuh a hai ta a.

⁴⁵ Ziephet chun, Isu’n, “Kuo a ka puonmawng tham?” a ti a. Mi tin chun, kei ka hi puoi, a ti chiet u a, Peter chun, “Mipi’n a hun ûmkimvel u a, a hun vawk hut hut uh hilo maw?” a ti a.

⁴⁶ Himahlele, Isu’n “Kuo ahim khatin ei tham hi, thilhih theihna ka sung apat in a pawt hi tih ka hêi,” a ti a.

⁴⁷ Tichun, numei chun ki-îm theilo ding ahi tih a kihe a, kithing pum in a hung a, Isu keng bula chun a bawkkhup a. Zie taka mi chengcheng masanga chun, a khawihna ziek leh, phulo-haloa a hung dam dân chuh a gen ta a.

⁴⁸ Chun, amah chun a kawmah, “Ka chanu, na taksanna hi na dampih ahi, lungmuong takin chieh ta’n,” a ti a.

⁴⁹ Isu’n zie thu a gen lai tak chun, kikhawpna In lawiupa In apat in mi khat a hung a, “Na chanu a thi tai, Sinsakpa chuh hih châwl dah mai ta’n,” a hung ti a.

⁵⁰ Himahlele Isu chun zie thu chuh a zak phetin “Lau ki’n, gingcha mai ah, khutichun, amah chuh dam kit ina,” a ti a.

⁵¹ Tichun, In chuh ava tun u chun, Peter te, Johan te, Jakob te leh chapang nu leh pa tih loh chuh kuomah dang lut a phal sak puoh a.

⁵² Chun, abawn un naupangnu chuh ana kah vengvung u a, Isu’n a kawm u ah, “Kap kiu in, naupang chuh a thi puoi, a ipmu ahi zawi,” a ti a.

⁵³ A thi ahi tih a het chiet ziek u chun, a nuihsan tau a.

⁵⁴ Ziephet chun, Isu’n a khut in a tu a, “Bawinu, tho ah” ti’n a sama.

⁵⁵ Tichun, a thagau chuh a hung vaikit ta a, a tho dawk zieng a; tichun. bang ahim nek ding pieu in, a ti a.

⁵⁶ Chun, a nu leh a pa chun mak a sa mah mah tau a, himahlele, Isu’n a thilhih chuh kuomah hilh lo ding a ti chak kêi a.