LUKE 4 - PATHIEN LEKHABU THIENGTHO (BSI)

Isu Thepa a Umna

¹ Chun, Isu chuh Thagau Thiengtho a dim in, Jordan lui apat chun a kilehkit ta a, tichun, gamthip ah Thagau puih in a um a,

² Tichun, ni sawmli sung chuh Diabol thep in a um ta a. Zie hun sung cheng chun bangmah a ne puoh a, a tâwp chun a gil a hung kiel ta a.

³ Khutichun, Diabol chun a kawmah, “Pathien Chapa na hih leh, zie suong hi chângthâk suok dingin thu pie’n,” a ti a.

⁴ Himahlele, Isu’n a dâwng a, “Mihiem hi chângthâk chauh in hing puo’n au tih zik ahi,” a ti a.

⁵ Ziephet chun, Diabol chun tângsang tak ah a puito a, mitphetlohkal in khawvel lalgam chengcheng a etsak a.

⁶ “Ziehaw chengcheng chunga thuneihna leh, hauhsakna hi hun pie’ng ka. A bawna hi ka kawma piek a hi ta a, ka nawp taphawtte kawma ka piek sek ahi.

⁷ Khutichun, kei nei ho a a hih chun, ziehaw cheng hi piek hi’n la,” a ti a.

⁸ Isu’n a kawmah, “Lalpa na Pathien ho inla, amah na chauh sem in tih a zik ahi,” ti’n a dâwng a.

⁹ Zie zawh chun Diabol chun Jerusalem ah a pui a, Ho-In sipzum ah a kawih a, a kawmah, “Pathien Chapa na hih chun, zie apat hin kie thah.

¹⁰ ‘Nang hun veng dingin Pathien in a vânsâwlchâkte hun sawl intin,

¹¹ a khut un hun dawm un tin uh tichun, na keng in suong suikha puo’n la,’ tih zik ahi,” a ti a.

¹² Chun, Isu’n a kawmah, “Lalpa na Pathien zedap kih, tih zik ahi,” ti’n a dâwng a.

¹³ Khutichun, Diabol chun thepna ding tin chenga a thep zawh phetin, hunlemchang a dingin a taihsan ta a.

Galili Gama A Nasep patna

¹⁴ Tichun, Isu chuh Galili gam ah a kîkkit ta a, Thagau Thiengtho thilhih theihna chuh a chungah a um a. A chanchin chuh zie gam chengcheng achun a kithang suok ta a,

¹⁵ Kikhawpna In haw achun a sinsak zel a, mi chengcheng pahchak in a um ta a.

Nazareth a Isu Nawlha a Umna

¹⁶ Chun, a seiletna khuo Nazareth chuh a tung a; a hihdan ngeina guolin Chawlhni’n kikhawpna In ah a lut a, Pathien lehkhathu sim dingin a ding dawk a,

¹⁷ Thiemgau Isai lehkhabu chuh a kawmah a pieu a. Tichun, lehkha ziel chuh a phel a, zie thu kizikna hi a sim a:

¹⁸ “Liengvaite kawma Chanchin Pha gen dinga nei guot ziekin, Lalpa Thagau chuh ka chungah a um; Amah chun salte kawma pawtna thu leh, Mitdûkte kawma mit vak neih kitna thu gen ding leh, Sukgimtheih thuokte pawtdawk sakna ding leh,

¹⁹ Lalpa lungkim kum thu gen ding banga ei sawl ahii,” tih hi.

²⁰ Chun, Isu’n lehkhabu chuh a ziel kit a, sawlvielpa kawm achun a pie a, chun, a chu ta a, Kikhawpna In a umte chengcheng mit chuh a chungah a chu ta a.

²¹ A kawm u ah, “Zie Pathien lehkhathu na zak u hi tuni hin a hung guitung tai,” a ti a.

²² Tichun, a bawn un amah a pakchau a, a kamsuok lungsietna thu haw chuh mak sa ten u a. tichun, “Zie pa hi Joseph chapa hilo ahim?” a tiu a.

²³ Chun, amah chun a kawm u ah, “Daktor, nangmah kihihdam ah, tih thuching hi hun gen tei un au. Chuleh, Kapernaum khuo a thil kihih na zak hawu hi, nangmah khawpi ngeia le hihin ei hun ti’n lau,” a ti a.

²⁴ Chun, amah mah in, “Thiemgau kuomah amah khuo lam ah limbawl in a um ngêi puoi, a ti a.

²⁵ Khutichun, diktaka ka hilh na hiu hi, Elijah damlai a kum thum leh tha gup van a bin a, khawvel a kiel nasatak ahung tun khan, Israel gam ah meithai tamtak a um u a;

²⁶ Himahlele, alak u a kuomah kawmah Elijah sawl ahi puoh a, Sidon gam lama Sarepta khuo a numei khat meithai kawm maia sawl ahi zaw kha!

²⁷ Chuleh, thiemgau Elisha hun lai khan le, Israel gam ah phâk tamtak a um u a, himahlele, a lak u ah kuomah hih thientho in a um puou a, Suria mi Naaman kha sukdam in a um zaw ta kha,” a ti a.

²⁸ Chun, kikhawpna In a mi chengcheng in zie chuh a zak phet un a lungna mah mah tau a.

²⁹ Tichun, a kipan u a, khawpi apat chun a sawn dawk u a, a khuou a kâwllêk a sawtthâk dingin a pui tau a.

³⁰ Himahlele, amah chuh mipi lak achun a chiehpai a, a chieh zel ta a.

Mi Khat Thithabuok Vawp

³¹ Chun, Galili gama khawpi khat Kapernaum achun a chieh a, chun Chawlhni’n mipite chuh a sinsak ta a.

³² Thunei taka mi a sinsak chuh mak a sa mah mah tau a.

³³ Chun, kikhawpna In achun thitha buok vawp mi khat a na um a; amah chun ngeih tak in,

³⁴ “E! Nazareth Isu, kei u leh nang banga I kizawlnau um? Ei sumangthai dinga hung na him? Nang ka hun hêi: Pathien mi thiengtho na hii,” ti’n ngeih tak in a kiko a.

³⁵ Chun, Isu’n a gai a, “Thip inla, a sung apat chuh hung pawt ah,” a ti a. Ziephet chun, thitha chun a masang u chun a hihpuk zet a, bangmah lawh lo in a sung apat chuh a pawt ta a.

³⁶ Mipi cheng chun maksa takin, “Ziehi bang thu ahi ta die leh? Thunei tak leh thilhih thei takin thitha buok haw le thu a pie a, a hung pawt tâk u hi,” ti’n a kiho u a.

³⁷ Tichun, zie gam cheng achun Isu chanchin kigen chuh a kithang suok ta a.

Isu’n Mipi Tamtak a Sukdamna

³⁸ Chun, Isu’n kikhawpna In chuh a taihsan a, Simon In ah a lut ta a. Simon zinu nu chuh nasatak in a na khawsik a, tichun a chanchin chuh Isu kawmah a na gen tau a.

³⁹ Tichun, a chieh a, a kieng achun a dinga, khawsik chuh a gai a, tichun a hung pha ta a. Tichun, a hung tho dawk a, amau haw chuh a zenviel ta a.

⁴⁰ Chun, nisa tum ding kuon velin, natna chuom chuom a na leh, damlote chuh Isu kawmah a hun pui u a, a bawn u a chung achun a khut a nga a, a hih dam zel ta a.

⁴¹ Chuleh, thithate’n le, “Pathien Chapa na hii,” ti a kiko in mi tamtak sung apat in a hung pawt tau a. Isu’n thitha haw chuh a gai a, Krista ahi tih a het ziekun a pau dinguh a za nuom puoi.

⁴² Chun, khuo a hung vak phetin a pawt a, mun thip ah a chieh ta a, Mipite chun a hawl u a, amah a muh phet un, amau haw taihsan lo dingin thoh a guou a.

⁴³ Himahlele, amah chun a kawm u ah, “Pathien Gam Chanchin Pha chuh khawpi dang ale ka gen ding ahi, zie dinga chuh sawl ka hi ngâl a,” a ti a.

⁴⁴ Khutichun, Galili gama kikhawpna In haw achun thu a gen ta a.