LUKE 24 - PATHIEN LEKHABU THIENGTHO (BSI)

Isu Thawhkitna

¹ Chun, ni sagih ni masapen zingkal matak chun, numeite chuh, a thil gimlim guonggalhteu chuh chawiin thân achun a va chieh u a.

² Thâna suong chuh, a kawt apat lik chawnin a muu a,

³ tichun, a lut u a; himahleh Lalpa Isu luong chuh a mu puou ui.

⁴ Chun, tihi ahi a, zie lungzînpih a a din lai u chun, ngaitie, mi nih, puon tesepsup silh in a kieng u ah a hung ding u a;

⁵ Lauhna a dima, numeite chuh tuola a bawhkhup lai u chun amau chun a kawm u ah, “Bang zieka mithi laka mihing hawl na hiu hi?

⁶ Zie taka hin a um ta puoi; a thokit tai. Galili gama na kawm u a a um laia a thugen kha hezing un.

⁷ Mihiem Chapa hi mi gilote khut ah matsak in um intin, khetdên in um intin, ni thum ni leh tho kit ina,” a tih khah.

⁸ Khutichun, numeite chun a thugen chuh a hun he dawk kit tau a,

⁹ thân apat chun a kîkkit tau a, tichun, thil chengcheng chuh, sinsak sawmlekhatte kawm leh mi dangte kawma chun a gen tau a.

¹⁰ Zie numeite chuh, Mari Magdalin te, Joanna te, Jakob nu Mari te a hiu; a kawm u a numei dang te’nle, sawlchakte kawma chun zie thil haw chuh a hilh u a.

¹¹ Himahlele, sinsakte chun, numeite thugen chuh thu maimai in a ngai u a, a gingcha puou ui.

¹² Himahlele, Peter chuh a kipan a, thân lama chun a tai a; a vak khun suk a, patngat puon um haw tih loh chuh bangmah dang a mu ta puoh a. Tichun, thil umdan chuh maksa’n In lam ah a kîkkit ta a.

Emau Lampi a Chiehte

¹³ Chun, ngaitie, zie ni mah chun, Isu zuite laka mi nih, khuo khat Emau kiti a chun a chieh u a, zie khuo chuh Jerusalem apat in chîng sawmgup a hi a,

¹⁴ thil hungtung thute chuh a genkhawm zel u a.

¹⁵ Chun, tihi ahi a, a holim lai u chun, Isu ngêi chun a hun naih a, amau chu tawh a kitawn u a;

¹⁶ Himahleh, amah a hettheih lohna dingun a mit uh sukvaih in a um a bangti ahim in a he thei zieng puou hi.

¹⁷ Chun, amah chun a kawm u ah, “Chieh kawma na genkhawm u kha bang thu ahi?” a ti a. Khutichun, lungkham mel pu takin a ding zing tau a.

¹⁸ A khat zaw, Kleopas a tih u chun a kawmah, “Zie ni sawt lo cha a thil umte helo, Jerusalem a va chieh nang chauh hi na him?” ti’n a dawng a.

¹⁹ Amah chun a kawm u ah, “Bang thil e?” a ti a. Amau chun a kawmah, “Nazareth Isu chunga thil tungte khah.” “Zie pa chuh thiemgau ahi a, Pathien leh mipite ngaih a, a thugen leh a thilhih a lopi mah mah ahi a.

²⁰ Ka thiempu lienteu leh vaihawmte chun thah dinga a chung thu tan ding in a pie dawk u a, tichun, khetdên in a um ta a.

²¹ Keihaw’n la, Israel te tandawkpa ding chuh hi’n a tih ka kinep mai zên u tawh! Bang hitalele, zie thil haw tunna chu tuni hi a ni thum ni ei tai.

²² Zielo chun le, ka lak uh a numei khenkhat, zingpi’n a guolteu umkhawm chuh a va muu a, thân achun a va chieh u a;

²³ luong, chuh a va muh loh ziek un ei sulungzing ten uh ahi. Pathien vânsâwlchâk kilak ka muu a, a hing kit ahi tih a gen hi, a hun tiu a.

²⁴ Chun, ka lak u a khenkhat thana chun a va chieh u a, numeite gen guol ngêi chun a va muu a, himahleh, amah chuh a va mu ngâl puou a,” a tiu a.

²⁵ Ziephet chun, ama’n a kawm u ah, “Aw mingawlte haw! Thiemgaute thugen gingcha dinga ngawngte haw!

²⁶ Krista chun zie thil haw chuh thuok a, lopina a lut ding him hilo ahim?” a ti a.

²⁷ Tichun, Isu chun, Mosi leh thiemgaute lehkha ah a pan a, Pathien lehkha thu a amah chanchin kizik chuh amau haw a hilh chien ta a.

²⁸ A chiehna dinguh khuo a hun naih phet u chun, Isu chuh gamla deuh a chieh guo bangin a um a;

²⁹ himahleh, amau chun a thoh u a, “Kei u kawmah um ah, vai le a vaigei ta a; nisa le tum ding ei ta hi,” a tiu a. Khutichun, amau kawma um ding chun a chieh ta a.

³⁰ Tichun, an ne dingin a kawm u achun a chu a, chângthâk a la a, kipahthu a gen a; chângthâk chuh a hekphel a, a kawm u ah a pie a.

³¹ Ziephet chun, a mit uh a hung vak a, a mel a hun he tau a, himahleh, a mitmuh uh apat in a mang kit ta a.

³² Amau chun, “Lampi a ei hopih laia, Pathien lehkha thu haw ei hilhchet lai khan, I sung ah I lunggil a kuong hiel hilo maw?” a kitiu a.

³³ Tichun, zie apat chun thakhat in a kipan u a, Jerusalem khuo ah a kîkkit u a, sinsak sawmlekhatte leh a guolteu umkhawm chuh a va muu a.

³⁴ A kawm u ah, “Lalpa chuh a thokit takzet nai, Simon kawm ale a kilak hi!” a na tiu a.

³⁵ Zie mi nih te chun le, lampi a thil umdan leh, chângthâk a phelsuoh a, a mel a na het tâk zieu thu haw chuh a genchien tau a.

Sinsakte kawma a Kilâkna

³⁶ Tichun, zie mi nih te chun, zie thu haw chuh a gen lai tak un, thakhat in Lalpa ngêi chuh a laku ah a hung dinga, a kawm u ah, “Na chungu ah lungmuonna um hen,” a ti a.

³⁷ Chun, amau haw chuh a lau mah mah tau a, thagau mu a kisa hiel tau a.

³⁸ Himahleh, amah chun a kawm u ah, “Bang zieka lau na hiu hi? Bang zieka na lungthim u a ginlahna hung pawt a?

³⁹ Ka khut leh ka kengte hi en mah tiem u! hila, Keimah ngêi kha ka hi a puo! Ei chul unla, en un, nei muh guol u hin, thagau in pheh leh guh a nei puoi,” a ti a.

⁴⁰ Chun, zie thu haw chuh a gen zawh phet, a khut leh a kênghaw chuh a etsak ta a.

⁴¹ Khutichun, kipâk taluo a, taksanglah nalai leh, maksa taka a um lai u chun, a kawm u ah, “Taka hin, bang ahim khat nek ding na nei u?” a ti a.

⁴² Amau chun, nga ki-em hal khat leh khuoizu tang khat a pieu a,

⁴³ tichun, a la a, a masang u chun a ne ta a.

⁴⁴ Ziephet chun, a kawm u ah, “Ziehaw hi, na kawm u a ka um lai ngeia ka thugen, Mosi dân ale, thiemgaute lehkhabu ale, Pahchakna Labu ale, ka chanchin kizikte cheng kha, hung guitung ding ahi, ka tih khah ahi,” a ti a.

⁴⁵ Tichun, Pathien lehkhathu hethei dingin, a lungthimteu a suk-hawn sak a,

⁴⁶ a kawm u ah, “Zie tawbanga hi zik ahii: ‘Krista chun dahum thuok intin, ni thum ni’n mithi lak apat thokit intin,

⁴⁷ amah min in, lunghei na thu leh gitloh ngaihdamna thu, Jerusalem khuo a kipatin, namtin kawmah gen in um ina,’ ti’n.

⁴⁸ Ziehaw thil chengcheng chuh a hetpihte na hiu hi.

⁴⁹ Chun, ngaitiem u, Pa thil tiem chuh na chung u hun sawl ding ka hi; himahleh, chunglam apat a thilhih theihna’n a hun thuom masang sieh chuh, khawpi ahin um zingun” a ti a.

Isu Vana a Kalna

⁵⁰ Chun, khawpi apat chun Bethani daikieng tieng chun amau haw chuh a puidawk a, chun a bân a zak a, a vang sak a.

⁵¹ Chun, tihi ahi a, amau haw a vangsak lai tak chun, amau haw chuh a kikhenpih a, van a puih toh in a um ta a.

⁵² Chun, a chibai u a, kipâk mah mah kawmin Jerusalem khuo lam achun a kîkkit tau a;

⁵³ Chun, Pathien Ho-In achun, a hun cheng u chuh Pathien pakchakna leh limbawl na’n a mang tau hi.