LUKE 20 - PATHIEN LEKHABU THIENGTHO (BSI)

Isu Thuneihna Dawtna

¹ Chun, tihi a hung hi a, Pathien Ho-In a mihaw a sinsak a, Chanchin Pha a gen lai in, Thiempuliente leh Danthuzikte leh, upahaw chuh a hung phut u a.

² a kawmah, “Kuo thu a zie thil haw hi na hih? Kuo thu hun pie? Kei uh nei hilh ah,” ti’n a hung dawng u a.

³ Isu’n a kawm u ah, “Ken le nang haw thu kam khat hun dawng ing ka, nei hilh un,

⁴ Johan baptistma kha van a kipan ahim, mihiem a kipan,?” ti’n a dawng a.

⁵ Ziephet chun, amau haw chuh a kingaihtuoh tau a, “Bang I gen ta ding u? Van a kipan tileu hing la, ‘Bang zieka Johan gingcha lo?’ ti’n tin.

⁶ ‘Mihiem apat,’ ti leuhing la, zie a mipi chengcheng hin, Johan chuh thiemgau ahi tih a pawm chiet ziekun suongin ei sep un tin,” a tiu a.

⁷ Tichun, a kawmah “Khawilam zaw thu ahih ka he puou hi,” a tiu a.

⁸ Ziephet chun, Isu’n a kawm u ah, “Ken le kuo thu’na zie thil haw hi ka hih, nanguh hun hilh diek puo’ng ka,” a ti a.

Grep Huon Tehkal thu

⁹ Chun, Isu’n zie tehkal thu hi mipite kawm achun a gen a: “Kuo a him in Grep huon a bawl a, a ngakte kawm achun thawhlawh dingin a pie a, sawttak châm dingin gam dangah a chieh san ta a.

¹⁰ Tichun, a gah lakkhawm phat a hung hih phet chun, huon a gah chuh a chanvo a na piek dingun, a ngakte kawm achun suok khat a sawl a. Himahleh, a ngakte chun a na zêp u a, khut ngawnin a sawl kit tau a.

¹¹ Khutichun, suok dang khat a sawl kit a, zie chule a na zêp kit u a, zahhuoi takin a na bawl u a, khut ngawn mah in a sawl kit zel tau a.

¹² Chun, a thum tinna a sawl kit a; zie chule, a ngakte chun a na hihliem u a, a paih dawk tau a.

¹³ Ziephet chun, grep huon neipa chun, ‘Bang ka lawh ta die aw? Ka chapa deihtak hi sawl mai ing ka; amah hi a na zah tei un au!’ a ti a.

¹⁴ Himahlele, a ngakte chun amah chuh a na muh phet un, ‘Zie pa hi go luoh ding chuh ahii; that hitiu, tichun, a go cheng chuh eihaw a ding hi’n a!’ a kitiu a.

¹⁵ Tichun, grep huon apat chuh a delhdawk u a, a that tau a. “Ahih leh, grep huon neipa chun ziete chung achun bang a hun hih ta die leh?” ti’n Isu’n a dâwng a.

¹⁶ “Hung intin, a ngakte chuh that intin, a grep huon chuh huon ngak dangte kawmah pie’n a,” a ti a. Mipite chun zie chuh a zak phet un, “Ziehaw lâwm lâwm chuh tung kihen!” a tiu a.

¹⁷ Isu’n amau haw chuh a en a, “Zie Pathien lehkha thu umzie hi bang ahi? ‘In sate suong deih loh kha, zie mawng chuh a ning a suong phachuom pên a na hi, a tii,’ tih hi.

¹⁸ Kuole, zie suong chunga puk ta chuh, phieh gawp intin; chun, a delh khâk vang chun, gawt nêl dimdem ina,” a ti a.

Sieh Piek Thua Dawtna

¹⁹ Chun, zie lai tak chun dân thuzikte leh thiempu liente chun, tehkal thu chuh amau haw kawknaa a gen ahi tih a het ziekun Isu chuh zie mun achun mat a guou a, himahlele, mipite chuh a lau u a.

²⁰ Khutichun, hun lemchâng a hawl tau a. Tichun, mi huntieng, mipha tak hileh kilawm taka va um dingin a gawlhguu a; Isu chuh Rome gam vaipawpa thuneihna leh, thilhih-theihna khuta a piek theihna ding u a, a thugen khiel chângtha ding leh, man dingin a sawl tau a.

²¹ Chun, amau chun a kawmah, “Sinsakpa, na thugente leh sinsakte hi a dik hi tih ka heu. Nangin mihiemte khenchuom nei lo in, mihingte a dinga Pathien thil deih chuh, diktakin na sinsak sek hi, tih le ka heu hi.

²² A leh, keihaw’n Kaisar kawma sieh ka chawih uh a thieng hi, thieng lo?” ti’n a dawng u a.

²³ Himahleh, Isu chun, a lungthimbawl ui tih a he a, a kawm u ah,

²⁴ “Dangka chuh ei hun etsak tiem u,” a ti a. “Kuo lim leh kuo min a a chuong hih?” a ti a. Amau chun a kawmah, “Kaisar,” a tiu a.

²⁵ Ziephet chun, Isu’n a kawm u ah, “Khutichu ahih leh, Kaisar thil haw chuh Kaisar kawmah pieu inla, Pathien thil haw chuh Pathien kawmah pie tau inla,” a ti a.

²⁶ Tichun, zie a mipite masang achun bangmah in a man thei ta puou a, a dawnna chuh maksa’n a thip kêi tau hi.

Thawhkitna Thua Dawtna

²⁷ Chun, Saddukai, thawhkitna a um puoi tite laka kuote ahim Isu kawmah a hung u a, a kawmah,

²⁸ “Sinsakpa, Mosi’n hiti hin dân ei na zik sak hi: ‘Mi kuole, a suohpihpa’n zi nei hen la, cha nei lo in thi ta leh, a suohpihpa’n luoh intin, a suohpihpa ding chun suon a neih sak ding ahi,’ ti’n.

²⁹ “Aw le, pasal sagih a um u a, a upapen in zi a nei a, cha nei lo in a thi a.

³⁰ Zie chuh a nihna chun a luoh kit a, cha neilo in a thi kit a,

³¹ chun, a thumna chun a kichênpih kit ta a. Khutibang chiet chun sagihte chuh cha nei lo in a thi vek tau a.

³² A tâwp chun, zie numei chule a thi ta a.

³³ Khutichun, thawhkitna ni achun, kuo pên zi chuh a hi ta die? Sagihte chun la zi’n a nei chiet ngâl u a,” ti’n a dawng u a.

³⁴ Isu’n a kawm u ah, “Tulai khanga mite hi, zi leh pasal in a kineituoh sek u a,

³⁵ himahlele, thihna apat a thokit a, hun hung tung dinga hing taka guotte chuh, zi leh pasal a kineituoh kit ding ei ta puou hi.

³⁶ Vânsâwlchâkte bang hi tau intin, thi thei ding ei ta puou. Thihna apat a a thawhkit tâk ziekun, Pathien chate a hi zaw tau hi.

³⁷ Mosi’n le mithite a thawhkit dân uh, kichien takin a hetsak kha. Nawnglaka meikuong thu a khan, Lalpa chungchâng thu gen in, ‘Abraham Pathien, Isak Pathien, Jakob Pathien,’ ti’n a gen a.

³⁸ Amah chuh mithi Pathien ahi puoh a, mihing Pathien ahi zaw ngâla, amah ngaih chun mi chengcheng a hing suok kêi ngâl u a.” a ti a.

³⁹ Danthuzikte khenkhat chun, “Sinsakpa, na gen dik zet nai,” ti’n a dâwng u a.

⁴⁰ Khutichun, bangmah a dawt beh ngam ta puou hi.

Krista Chung Thua Dawtna

⁴¹ Chuleh, ama’n a kawm u ah, “Krista chuh David chapa hi ding ahi bangti dana ti sek ahiu hi?

⁴² Pahchakna Labu ah David ngêi in: ‘Lalpa chun ka Lalpa kawmah, Na melmate na keng ngakna a ka siem masang sieh,

⁴³ Ka changlam ah chu’n,’ a ti ngâl a.

⁴⁴ David in amah chuh ‘Lalpa’ a tih ngâl chun, bangti’n a, a chapa a hih theih ding?” a ti a.

Danthuzikte Apat Kiveng un

⁴⁵ Mi chengcheng in a thugen a ngaihthak lai u chun, Isu’n a sinsakte kawmah,

⁴⁶ “Dan thuzikte apat chun kivêng phau in; amau haw chun puonâk chuol âk a, dawl mun haw a zahum taka kiho chuh a deih chuom sek ngâl un; kikhawpna In a chutphah phapen leh, guolvakna a mun phapen a tel sek u a;

⁴⁷ meithaite sum a neguu a, mi thepna’n sawttak tak a paucham sek ui! Ziehaw gawtna chuh nasa zawsem ding ahi!” a ti a.