LUKE 16 - PATHIEN LEKHABU THIENGTHO (BSI)

Sumvawp Takkhanlo

¹ Chun, Isu’n a sinsakte kawmah, “Mi neizo kuo ahim in sum vawp chuom khat a nei a. Zie pa chun a sum a vei man sakna chungchâng thu ah a hêk tau a.

² Tichun, amah chuh a sama, a kawmah, ‘Na chungchâng thu ka het hi bangti a? Na sum vawp dân chanchin kimtak in hun zik inla, ei hun pie’n, tu a kipat sum vawp in pang thei ta puo’n la,’ a ti a.

³ Chun, a suokpa chun a lungthim in, ‘Ka pu’n sum vawp kham ei haihsak ding hi bang ka lawh ta die aw? Lei laih chu la ka ngâp ngâl puo’n, khutdawh chu la, ka zak a cha ngâl a.

⁴ Sum vawp kham ei haihsak phata, a In a ei na lawp dinga guol pha siem ding dân ka he tai!’ a ti a.

⁵ Tichun, a pu sum bate chu a sam chiet a. A masapen kawm achun, ‘Nangin ka pu bang zat na ba?’ a ti a.

⁶ Amah chun, ‘Thau tehna zakhat thau,’ a ti a. Amah chun a kawmah, ‘Na zikna lehkha la’n la, sawmnga zik ah,’ a ti a.

⁷ Chun, a dang khat kawm achun, ‘Nangin bang zata na bat?’ a ti a. Amah chun, ‘buh dân zakhat,’ a ti a. Ziephet chun a kawmah, ‘Na zikna lehkha la’n la, sawmgiet zik ah,’ a ti a.

⁸ Khutia a hihna apat chun, a pu chun sum vawppa diktatlo chuh a lemhet ziek chun a pakcha ta a; khawvak chate sangin, zie khawvel leisiet chate hi, a tulai khang u ahin a chingzawu hi,” a ti a.

⁹ “Ka hilh na hiu hi: sum lêm in nang u dingin guol siem un, sum a manthai phata kumkhuo a umna a chuh a hun um sak theihna dingun.

¹⁰ Kuole, tawmcha chunga taksanum chuh, tamtak chung ale taksanum a hi sek hi. Kuole, tawmcha chunga taksanum lo chuh, tamtak chung ale taksan a um sek puoi.

¹¹ Sum lêm chunga bawn taksan na um loh u chun, kuo’n sum tak a hun vawp sak die?

¹² Mi danga chunga bawn taksan na um tâk loh u chun, nangmau a chuh kuo’na hun pie ding?

¹³ “Suok kuoma’n, pu nih na a sem kawp thei puoi; khat mudah in, khat deihchuom ding ahi ngâl a; a hihloh leh khata dingin ginum intin, khat musit ina. Pathien leh sum na na sem kawp thei puou hi,” a ti a.

Isu Thugen Khenkhatte

¹⁴ Chun, Pharisaite’n zie thu haw chuh a zak phet un, dangka ngailul a hih ziekun, Isu a nuihsan u a.

¹⁵ Ziephet chun, Isu’n a kawm u ah, “Mipi dangte mit muh a thiem kichan mai mai na hiu hi, himahleh, Pathien in na lungthim uh a he ngâl a. Mihingte’n a ngaihlul mah mah uh thilte chuh, Pathien mitmuh in bangmahlo ahi.

¹⁶ “Mosi dân leh thiemgaute lehkha zik haw chuh Baptist Johan hun gei khan mat in a um a, zie a kipat chun, Pathien gam Chanchin Pha chuh a gen u a; mitinte chuh a lut hâmhâm u a.

¹⁷ Himahlele, dân thu a sut vawm neucha beihmang sangin le, van leh leisiet beihmang a baihlam zawi.

¹⁸ “Kuole, a zi maa, zi dang nei ta chuh, zawlsai ahi; kuole, mi zi mâksa neita chule zawlsai ahi.

Mihausapa leh Lazarus

¹⁹ “Chun, mineizo kuo ahim a um a, puon sandup leh patngatpuon a silh a, ni chengin nuomsa takin a um sek.

²⁰ Chuleh, Lazarus kiti, mi chagah tak khat le tak achun a um a; meima’n a bawm a, mi neizopa kawtkhak bul achun a kuol sak sek u a,

²¹ A dawhkan a annen kie nek ding kineppih chun a pui sek u a. Uicha haw chun a meima chuh a na liek sak sek u a.

²² Chun, tihi ahi a, mi chagahpa chuh a hung thi ta a, vânsâwlchâkte’n a pui u a, Abraham angsung ah a kawih tau a. Mi neizo chule a thi ta a; vuih in a um ta a.

²³ Chun, mithi khuo achun na thuok himhim in a um ta a; tichun, a vak dâk a, gamla taka Abraham ângsung a Lazarus um chuh a vak mu ta a.

²⁴ Khutichun, a kiko a, ‘Hepa Abraham! nei lungsiet inla, Lazarus kha hun sawl ah, a khut zung mûk tui hun dieh hen la, ka lei hih daihna dingin, zie mei kuong a hin ka na mah mah hi!’ a ti a.

²⁵ Himahlele, Abraham chun, ‘Ka chapa, nangin na dam lai khan thilpha na chang a, khutibang mah in Lazarus thil phalo a chan kha hezingin! Tu’n chuh, amah taka hin lungmuong takin a um a, nang vang a gim na hi ta kha!

²⁶ Zie tihloh achun, taka pan a nang u kawma hung guote chuh a chieh theih lohna dingun, leh kuomah tak apan a kha kei u kawma a hung kaih theih lohna dingun, kei u leh nanguh kikala hin lei khi nasatak a siem ui,’ a ti a.

²⁷ Chun, mineizopa chun, ‘Ahih leh, hepa, amau haw chuh ka pa In a chieh sak ding bêkin ka hun ngên hi;

²⁸ Pienpih pasal nga ka nei ngâl a. Chieh hen la, zie gimtheihna muna hin hung kha kha’n au, phachuomngai takin va hilh hen,’ a ti a.

²⁹ Abraham chun lah, ‘Na suohpihte chun Mosi leh thiemgaute amau haw hilh dingin a nei uh hilo maw! na suohpihte chun ziete thu chuh ngai u hen,’ a ti a.

³⁰ Mineizopa chun a dâwng a, ‘Hepa Abraham, hilo e! mithi lak apat tho kit ngêi chieh u henla hi leh, lunghei un au.’ a ti a.

³¹ Himahleh, Abraham chun, ‘Mosi leh thiemgaute thu a ngaih loh u chun, mithi laka tho kit chieh mahleu le awi diek puo’n au,’” ti’n a dâwng a.