KOLOSSA 4 - PATHIEN LEKHABU THIENGTHO (BSI)

Thuhilhna

¹ Lawiupate haw, nangun le van ah lawiupa na nei ui tih he’n, na suokteu chungah a thutak leh a kilawm hun phetin hih un.

² Paucham hâm hâm unla, zie achun kipahthu gen kawmin khawningai un.

³ Ei kân lawhnau, Krista thuguk chuh gen dingin Pathien in thu adingin kawt ei hawn sak theihna’n,

⁴ kei u le nei paucham pih zingun, ka gen ding bang tak u a ka phuon theihna dingun.

⁵ Phat kizen pêtcha kichawk in, awilote lak achun chingthei takin um un.

⁶ Mitin, bangti dâwn chiet dinga tih na het theihna dingun, na aw suoh uh chuh chi sawh al, lungsietna tel hi zing zieng hen.

Chibai bûkna

⁷ Lalpa a suohpih deihtak, zenvielpa taksanum, ka suok chanpih uh Tukika hin ka chanchin cheng chenguh, nanguh hun hetsak ina.

⁸ Zieziek tak hin amah chuh na kawm u a ka hun sawl uh a hi: ka chanchin uh na het theihna dingun leh, na lunggil uh a sukbih theihna dingin.

⁹ A taksanum dingin, suohpih taksanum leh deihtak, nangmau haw laka mi ngêi Onesma hi tawh. Amau chun, zie lama thil umzie chengcheng hi nanguh hun hetsak na’nau.

¹⁰ Aristarkas, ka suongkul lutpih pa hin a hun chibai na hiu hi; Mark, Barnabas tupapa hin le a hun chibai na hiu hi, (amah chungchâng thu a thuhilhna haw kha na mu tau a, na kawmuh a hungtun tieng leh a na lawp un.)

¹¹ Joshua, Justas a tihpau hinle a hun chibai na hiu hi. Zie mi thum te hi zektan, Pathien gama dinga ka seppih leh, ei subih pente chuh ahiu hi.

¹² Epaphra, nangmau haw laka khat, Krista Isu suokpa hin a hun chibai na hiu hi. Amah chun, Pathien deihlam tin chenga buting leh taksan detna nei a na din det theihna dingun, phachuomngai takin a hun paucham sak zing sek hi.

¹³ Nang haw dingin le, Laodikei khuo a um haw dingin le, Hierapoli khuo a um haw dingin le, a phachuomngai mah mah hi tih le ka hetpih a puo.

¹⁴ Luke, daktor deihtak leh Dema hinle a hun chibai na hiu hi.

¹⁵ Laodikei khuo a sapchuom umte leh Nimpha leh a In a Sapchuom umte khah nei hun chibai sak un.

¹⁶ Chun, zie lehkhathâk hi na lak uh a na sim zawh tieng u leh, Laodikei sapchuom haw le sim sak un. Nang haw’n le Laodikei khuo a suohpih umte lehkhathâk kha a na sim thuk kit un.

¹⁷ Chuleh, Arkippa kawma khan, “Zenvielna, Lalpa kawm apat na muh kha muolsuoh tei in,” a na tiu in.

¹⁸ Kei Paul in, keimah khut mâwnga nanguh ka hun chibai na lehkha ka hun zik a hi hi. Ka bulput haw hi hezing un. Lungsietna na kawm u ah um ta hen.