KOLOSSA 1 - PATHIEN LEKHABU THIENGTHO (BSI)

¹ Paul, Pathien deihlam a Krista Isu sawlchak leh, I suohpihpau Timothe chun:

² Kolossa Khuo a Krista a mithiengthote leh, suohpih taksanumte kawm achun: Pathien I Pau kawm apat lungsietna leh chamna na kawm u ah um hen.

Kipah Thugenna Pauchamna

³ Van ah nanguh a dingin kinepna a hun kawih sak ziek chun,

⁴ Krista Isu na taksan zieu leh, mithiengtho cheng chengte chunga hehpihna na neih zieu ka na zak uh apat, nang haw dinga paucham zingin, Pathien, I Lalpau Isu Krista Pa kawm achun kipahthu ka gen zing sek ui.

⁵ Chun, thudik, Chanchin Pha ngêi chuh na kawm u a a hungtun tung lai khan, zie kinepna a hun piek thu chuh na za tau kha.

⁶ Na lak uh a Pathien hehpihna thu tak a hungtun tung laia, a tak tak a hi tih heta a um guol khan, zie Chanchin Pha chuh khawvel muntin achun a dalh zâk zel ta a.

⁷ Chun, Epaphra, ka namkawl puokpih uh deihtak, keihaw sika Krista zenviel taksanum tak apat hin, Pathien hehpihna chuh na na za tau a.

⁸ Amah chun thagau in hehpihna a hun piek thuteu chuh kei uh ei hilh ta a.

⁹ Zieziekchun, na chanchin uh ka zak uh apat, nang haw dinga paucham leh hun nget sak ka hai puou hi. Pathien kawm achun, a Thagau in a piek, amah deihlam hetna leh, chitna tin cheng leh hetna bukima na hung dim theihna dingun ka hun nget sak sek ui.

¹⁰ Khutichun, Lalpa deihlam in hing thei un na tin uh, chun, amah kipahlam hih zing thei un lau. Tichun, na hinnau chun nasep phat tin chenga gahsuoh in, na Pathien hetna lam uh achun hung khangto thei unlau.

¹¹ Chun, a lopina thilhih theihna apat a hatna tin chenga sukhat a um in, thil bang cheng chung achun thuokhat takin um thei un lau.

¹² Chun, thuokhat tak leh kipâk takin, lenggam vakna muna mithiengthote go chuh luohpih dinga ei siempa. Pa kawm achun kipahthu gen un.

¹³ Amah chun khuothim thilhih theihna apat chun ei hukdawk a, a Chapa deihtak gam ah ei puilut ta a;

¹⁴ amah achun I kitatnau I muu a, I gitlohnau ngaihdamna ngêi chuh.

Krista Taksa leh a Nasep

¹⁵ Krista chuh muh theih loh Pathien lim, thilsiem dang cheng sanga chungnung a, chapa pieng masapen chuh ahi.

¹⁶ Amah achun bangakai siem a hi a, van a umte, leia umte, muh theih leh muh theih loh cheng tawh, lalchutphah leh lalgam hita leh, vaihawmte leh thuneihna te cheng tawh Pathien in khawvel pumpi hi amah ah leh, amah a ding mah a a siem ahi.

¹⁷ Krista chuh thil chengcheng um maa um ahi a, amah achun thil chengcheng khumsin ahi.

¹⁸ Amah chuh sapum, (zie chuh sapchuomte ahi,) luchang a hi a; taksa pumpi hinna bulpi chule ahi. Thil chengcheng sanga masapen a hih theihna dinga, thihna apat a kaihthawh a um, Chapa pieng masapen chuh ahi.

¹⁹ Pa lung hihna mawng chun, chapa chun amah achun Pathien batna bukim chuh a nei a.

²⁰ Chapa achun, Pathien in vannuoi pumpi hi amah tawh kicham in a siem ta a. Kross thisan zieka kichamna siem in, amah chun thil chengcheng leichung a thil umte hi henla, van a thil umte hitaleh amah tawh a kicham sak hi;

²¹ Malai khan nang haw le na thil gilo hihteu ziekin, Pathien apat a khenthak a um in, na lungthim u achun a melma na hiu kha.

²² Himahlele, tuhin, a Chapa sapum thihna ngêi chun, thiengtho tak leh, nuolna bei leh, paulap beia a hun siemna dingin, Pathien in amah tawh ahun kicham sak ta a.

²³ Zieziekchun, bul nei a dettaka um in, Chanchin Pha na zak uh a kinepna apana kichawn mang lo in, taksanna achun um zing un. Zie Chanchin Pha khawvel a mi chengcheng kawma tângsappih a um kha, Kei Paul ngêi hi zie zenviel nasem a chuh pang ka hi.

Zenvielna a Paul Nasep

²⁴ Tu a, nang u dinga ka thuokna ahin ka kipâk hi, Krista’n a sapum sika a dahum thuok bân chuh, ka sapum ahin ka thuok pih zel zawk ahi; a sapum chuh sapchuom haw hi a hi ngâl a.

²⁵ Nang haw phatna dinga zie nasep ei piepa Pathien mawng chun, sapchuom haw sawntawlawi dingin ei guot a hi ngâla.

²⁶ Zie nasep chuh, a thu, malai pek a mihiemte apat a a na selguk, tu a a mite kawma bukim taka phuondawk ding chuh ahi.

²⁷ Pathien thiltup chuh, thuguk hausa tak leh lopi tak, mi cheng chenga dinga a kawih, a mite kawma hetsak chuh ahi. Zie thuguk chuh Krista nangmau a um, Pathien lopina na kikawppih ding u chuh ahi.

²⁸ Mi tin, Krista a chun phabukim a ka din sak theihna dingun, mi tin hilh a, mi tin, chitna tin chenga sinsak in, Krista thu ka gen sek uh ahi.

²⁹ Zie chuh hih zo dingin, keimah a sem sek, Krista’n hatna lopitak ei piek chuh mang in ka sem hâm hâm sek a hii.