KISIMNA 7 - PATHIEN LEKHABU THIENGTHO (BSI)

Phung tina Lawiupate Thilpiek

¹ Khutichun, Mosi’n hobuk chuh a tundawk zawh phet chun a suthiengtho a, a matchâk cheng leh maichâm a ûmlebel chengcheng sathau a nuh a, a sukthien ni chun hiti hi ahi a,

² Israel te lawiupa, a inkuon uh lawiupate chun thillat a lân u a, ziehaw chuh a phung uh luchang chiet a sim nau a mawhpuo te kha ahiu hi.

³ A thil lat hawu chuh, kangtalai chung nei gup leh bâwngchal sawmlenih, lawiupa nih in kangtalai khat zel, khat in bâwngchal khat zel Lalpa ma ah ahun lau a, hobuk kawm achun ahun la’n u a.

⁴ Chun, Lalpa’n Mosi kawmah,

⁵ “Hobuk a nasepna dinga mat a hih theihna dingin ziehaw hi a na pawm sak inla, Levi te le a nasep ding bang zel un na piek chiet ding ahi,” ti’n.

⁶ Tichun Mosi’n kangtalai haw leh bâwngchal haw chuh a kai a Levi chite chuh a pie a.

⁷ Kangtalai nih leh bâwngchal li chuh Gershon chapa te a nasep bang zel un a pie a.

⁸ Chun, kangtalai li leh bâwngchal giet chuh, thiempu Aron chapa Ithamar haw, Merari chapa te chuh a nasep dungzui zel un a pie a.

⁹ Kohath chapa te vang chuh a pie puoi; mun thiengtho etkawl chuh a nasep uh ahi a, a zawna zawn thawh sekte ahiu hi.

¹⁰ Lawiupate chun maichâm lutna lawpna ding chun, thilpiek pie dinga a kisakzawh phet u chun, a thilpiek hawu chuh maichâm bul ah a hun kawih u a.

¹¹ Chun, Lalpa’n Mosi kawmah, “Nicheng a lawiupa khat zelin amau chan ding ni chiet a, maichâm latna thilpiek chuh a hun chawih dinguh ahi ti’n hilh in” a ti a.

¹² Ni khat ni a thillat la’n ding chuh Juda nam a Aminadab chapa Nahson ahi a,

¹³ A thillat ding chuh dangka thik kuong khat, a giklam sekel za leh sawmthum, mun thiengtho a sekel sawm sagih tuka gik dangka thik belhbu khat, changbuong thillat dingin thau tawh mekhel changbuong nêl tak a dim gêl gêl;

¹⁴ Sekel sawm tawh kibang a gik gimlim a dim sana thikkhe khat:

¹⁵ Hâlmang thillat dingin bâwngchal tuoi khat, belamchal khat, belamno achal kum khata upa khat,

¹⁶ Gitloh thawihna dingin kêlchal khat,

¹⁷ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khat a upa nga; ziehaw hi Aminadab chapa Nahson thillat haw chuh ahi.

¹⁸ Chun, ni nih ni chun Issakar Inkuon lawiupa Zuar chapa Nethanel chun a la’na,

¹⁹ a thillat ding chuh dangka thik kuong khat, agik dân sekel za leh sawmthum, mun thiengtho sekel sawm sagih tuka gik, dangkathîk belhbu khat, changbuong thillat dingin thau tawh kihel changbuong nêl tak adim gêl gêl:

²⁰ Sekel sawm tuka gik gimlim adim sana khat,

²¹ Hâlmang thillat dingin bâwngchal tuoi khat, belamchal khat, belamno achal kum khata upa khat,

²² Gitloh thawihna dingin kêlchal khat,

²³ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khat a upa nga a la’na.Ziehi Zuar chapa Nathanel thillat te chuh ahi.

²⁴ Ni thum ni chun Zebulun suonte lawiupa Helon chapa Eliab chun a la’na,

²⁵ A thillat chuh dangkathîk kuong, a giklam sekel za leh sawmthum, mun thiengtho a sekel sawm sagih tuka gik tangkathik belhbu khat, changbuong thillat dingin thau tawh mekhel changbuong nêl tak adim gêl gêl;

²⁶ Sekel sawm tuka gik gimlim a dim sana khe khat,

²⁷ Hâlmang thillat dingin bâwngchal tuoi khat, belamchal khat, belamno achal kum khata upa khat,

²⁸ Gitloh thawihna dingin kêlchal khat,

²⁹ Chun, chamna kithawihna thillat dingin bâwngchal nih, belamchal nga, belamno achal kum khata upa nga ahi. Ziehi Helon chapa Eliab thillat te chuh ahi.

³⁰ Ni li ni chun Reuben suonte lawiupa Shedeur chapa Elizur chun a la’na,

³¹ A thillat chuh dangka thik kuong khat, agik dân sekel za leh sawmthum, mun thiengtho a sekel sawm sagih tuka gik dangkathîk belhbu khat, changbuong thillat dingin thau tawh chawhhel changbuong nêl tak adim gêl gêl;

³² Sekel sawm tuka gik gimlima dim sana khe khat,

³³ Hâlmang thillat dingin bâwngchal tuoi khat, belamchal khat, belamno achal kum khata upa khat;

³⁴ Gitloh thawihna ding kêlchal khat,

³⁵ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khata upa nga. Ziehi Shedeur chapa Elizur thillat chuh ahi.

³⁶ Ni nga ni chuh Simeon chapa Zurishaddai chapa Shelumiel chun a la’na,

³⁷ A thillat chuh dangkathîk kuong agik dân sekel za leh sawmthum, mun thiengtho a sekel sawm sagih tuka gik dangkathîk belhbu khat, changbuong thillat dinga thau chawhhel changbuong nêl tak adim gêl gêl.

³⁸ Sekel sawm tuka gik gimlim a dim sana khe khat;

³⁹ Hâlmang thillat dingin bâwngchal tuoi khat, belamchal khat, belamno chal kum khata upa khat.

⁴⁰ Gitloh thawihna dingin kêlchal khat;

⁴¹ Chun, chamna kithawihna dingin bâwngchal nih, belamchal nga, kêlchal nga, belamno achal kum khata upa nga ahi; ziehi Zurishaddai chapa Shelumiel thillat chuh ahi.

⁴² Ni gup ni chun Gad suonte lawiupa Duel chapa Eliasaph chun a la’na,

⁴³ A thillat chuh dangkathîk kuong khat, a giklam sekel za leh sawmthum, mun thiengtho a sekel sawm sagih tuk a gik tangka thik belhbu khat, changbuong thillat dinga thau a chawhhel changbuong nêl tak adim gêl gêl;

⁴⁴ Sekel sawm tuka gik gimlim a dim sana khe khat;

⁴⁵ Hâlmang thillat dingin bâwngchal tuoi khat, belamchal khat, belamno achal kum khat a upa khat;

⁴⁶ Gitloh thawihna dingin kêlchal khat;

⁴⁷ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khata upa nga ahi. Ziehi Deuel chapa Eliasaph thillat chuh ahi.

⁴⁸ Ni sagih ni chun Ephraim suonte lawiupa Amihud chapa Elisham chun a la’na,

⁴⁹ A thillat chuh dangka thik kuong khat, a gik lam sekel za leh sawmthum, mun thiengtho a sekel sawm sagih tuk a gik dangkathîk belhbu khat, hâlmang thillat dingin thau a chawhhel changbuong nêl tak adim gêl gêl;

⁵⁰ Sekel sawm tuk a gik gimlima dim sana khe khat;

⁵¹ Hâlmang thillat dingin bâwngchal tuoi khat, belamchal khat, belamno a chal kum khata upa khat;

⁵² Gitloh thawihna dingin kêlchal khat;

⁵³ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khata upa nga ahi, ziehi Amihud chapa Elisham thillat chuh ahi.

⁵⁴ Ni giet ni chun Manasseh suonte lawiupa Pedazur chapa Gamaliel chun a la’na:

⁵⁵ A thillat chuh dangka thik kuong khat, a gik lam sekel za leh sawmthum, mun thiengtho a sekel sawm sagih tuk a gik dangkathîk belhbu khat; changbuong thillat dinga thau chawhhel changbuong nêl tak a dim gêl gêl;

⁵⁶ Sekel sawm tuka gik gimlim a dim sana khe khat;

⁵⁷ Hâlmang thillat dingin bâwngchal tuoi khat, belamchal khat, belamno achal kum khata upa khat,

⁵⁸ Gitloh thawihna dingin kêlchal khat,

⁵⁹ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khata upa nga ahi. Ziehi Pedazur chapa Gamaliel thillat chuh ahi.

⁶⁰ Ni kuo ni chun Benjamin suonte lawiupa Gedeuni chapa Abidan chun a la’na,

⁶¹ A thillat chuh dangka thik kuong khat, a gik lam sekel za leh sawmthum, mun thiengtho a sekel sawm sagih tuk a gik dangkathîk belhbu khat, changbuong thillat dinga thau a chawhhel changbuong nêl tak adim gêl gêl;

⁶² Sekel sawm tuka gik gimlima dim sana khe khat;

⁶³ Hâlmang thillat dingin bâwngchal tuoi khat, belamchal khat, belamno achal kum khata upa khat;

⁶⁴ Gitloh thawihna dingin kêlchal khat;

⁶⁵ Chun, chamna kithawihna thillat dingin bâwngchal nih, belamchal nga, kêlchal nga, belamno achal kum khat a upa nga ahi; ziehi Gideon chapa Abidan thillat chuh ahi.

⁶⁶ Ni sawm ni chun Dan suonte lawiupa Ammishaddai chapa Ahiezer chun a la’na;

⁶⁷ A thillat chuh dangka thik kuong khat, a gik lam sekel za leh sawmthum, mun thiengtho a sekel sawmsagih tuka gik dangka thik belhbu khat, changbuong thillat dinga thau a chawhhel changbuong nêl tak adim gêl gêl;

⁶⁸ Sekel sawm tuka gik gimlima dim sana khe khat;

⁶⁹ Hâlmang thillat dingin bâwngchal tuoi khat, belamchal khat, belam achal kum khat a upa khat;

⁷⁰ Gitloh thawihna dingin kêlchal khat;

⁷¹ Chun, chamna kithawih thillat dingin bâwngchal nih, belamchal nga, kêlchal nga, belamno achal kum khata upa nga ahi. Ziehaw hi Ammishaddai chapa Ahiezer thillat chuh ahi.

⁷² Ni sawm leh khat ni chun Aser suonte lawiupa Okran chapa Pagiel chun a la’na:

⁷³ A thillat chuh dangka thik kuong khat, a giklam sekel za leh sawmthum, mun thiengtho a sekel sawmsagih tuka gik dangka thik belhbu khat, changbuong thillat dingin thau chawhhel changbuong nêl tak dim gêl gêl;

⁷⁴ Sekel sawm tuka gik gimlima dim sana khe khat;

⁷⁵ Hâlmang thillat dingin bâwngchal tuoi khat, belamchal khat, belamno achal kum khat a upa khat;

⁷⁶ Gitloh thawihna dingin kêlchal khat;

⁷⁷ Chun, chamna kithawih thillat dingin bâwngchal nga ahi: ziehaw Okran chapa Pagiel thillat chuh ahi.

⁷⁸ Ni sawmlenih ni chun Naphtali suonte lawiupa Enan chapa Ahira chun a la’na:

⁷⁹ A thillat chuh dangka thik kuong khat, a giklam sekel za leh sawmthum, mun thiengtho a sekel sawm sagih tuka gik dangkathîk belhbu khat, changbuong thillat dingin thau tawh chawhhel changbuong nêl tak adim gêl gêl;

⁸⁰ Sekel sawm tuka gik gimlima dim sana khe khat;

⁸¹ Hâlmang thillat dingin bâwngchal tuoi khat, belamchal khat, belamno achal kum khata upa khat;

⁸² Gitloh thawihna dingin kêlchal khat;

⁸³ Chun, chamna kithawih thillat dingin bâwngchal nih, belamchal nga, belamno achal kum khata upa nga ahi: ziehi Enan chapa Ahira thillat chuh ahi.

⁸⁴ Tichun, maichâm thaunuh ni a Israel lawiupa haw thillat chuh dangkathîk kuong sawmlenih, dangka thik belhbu sawmlenih, sana khe sawmlenih,

⁸⁵ Dangkathîk kuong chuh sekel za leh sawmthum tuk a gik chiet ahi; belhbu chuh sawm sagih chiet ahi. dangkathîk ûmlebel chengcheng chuh mun thieng tho a sekel singnih leh zali tuka gik ahi.

⁸⁶ Gimlim a dim sana khe sawmlenih chuh, mun thiengtho a sekel sawm tuk a gik chiet ahi a: sana khe chengcheng chuh sekel za leh sawmnih tuk a gik ahi.

⁸⁷ Hâlmang thillat dingin bâwngchal chengcheng chuh sawmlenih ahi a, belamchal sawmlenih, belam no achal kum khat a upa sawmlenih, changbuong thillat haw chuh tawh chun, gitloh thawihna dingin kêlchal sawmlenih:

⁸⁸ Chun, chamna kithawihna thillat dinga bâwngchal chuh sawmnih leh li ahi a, belamchal chuh sawmgup ahi a; kêlchal chuh sawmgup, belamno achal kum khat a upa sawmgup ahi. Ziehi sathau nuh zawh a maichâm lat na dinga thilpiek haw chuh ahi.

⁸⁹ Khutichun kihona puon-In a Lalpa hopih dinga Mosi a lut tieng leh, Thuthun bawm chunga zahngaihna chutphah chunglama Cherub te nih kikal apat chun amah hun hopih in aw chuh a za a, a hopih ta a.