KISIMNA 5 - PATHIEN LEKHABU THIENGTHO (BSI)

Mithienglo te

¹ Chun, Lalpa’n Mosi a hopih a,

² “Israel chate phâk chengcheng leh thiput chengcheng leh, mithi sukkhak zieka thienglo taphawt chuh a giehmun u apat kawihdawk vek dingin thu pie’n:

³ Numei hi henla, pasal hileh a thienglo chengcheng chuh na nawhdawk vek ding ahi; khutia chuh ka mipite laka ka chênna giehbuk chuh sukbuok a a umloh na dingin” a ti a.

⁴ Tichun Israel chate chun khutibang chun ahih u a, amau haw chuh giehbuk pawlam ah a kawihdawk vek tau a,

Thil Sukkhelh Zieka Ditthukna

⁵ Chun, Lalpa’n Mosi a hopih a,

⁶ Israel chate kawma zie thu hi gen dingin a hilh a, pasal ahim numei ahim in, Lalpa chunga a ginna susie’n, a suohpih chunga thil diklo hih taleh, zie mihiem chuh thil hihkhiel ahi;

⁷ a gitlohna chuh phuong intin, aman chuh kim taka a piek ding ahi a, hawp nga a khena hawp khat piek behlap ding ahi.

⁸ Amahvang chuh, gitloh man ne ding pa chuh a thih a, inkuon kinaihpih a neih loh chun, Thiempute chanvo dinga Lalpa kawma piek ding ahi. Zie chuh thil gilo hih pa gitlohna thawihna dinga belamchal kimang tihloh a, a chuonga a piek ding ahi.

⁹ Chun, Israel chate thil thiengtho, pei thillat chengcheng, lat sak dinga thiempu kawma a hun chawih taphawt u chuh thiempu chanvo ding ahi,

¹⁰ Thilpiek thiengtho mitin in a hun chawih teu chuh amau a hi’n tin, thiempute kawma kipie taphawt chuh amah chan ding ahi.

Zi Ginum lo Chungchâng Thu

¹¹ Chun, Lalpa’n Mosi a hopih a,

¹² Israel suonte kawmah gen inla, Kuo ahim khat chuh a zi’n taihsan henla a pasal a dinga ginum lo in um ta leh,

¹³ Pasal khat tawh thanghuoi takin kuolkhawm u henla, zie chuh a pasal in helo hi henla, thanghuoi takin amah kisubuok mahleh mita mu la umlo, matdawk loh a um in, kuomah a gendawk ding umlo hita leh,

¹⁴ Chuleh, a pasal chun ginmawhna lungthim hun nei in, a zi chuh amah kisubuok ahi ti’n, itthikna nei henla, amah chuh ana kisubuoklo hita leh,

¹⁵ A pasal chun a zi chuh thiempu kawma a puih ding ahi, amah nu a dinga kithawihna thil piek buhmanpawl changbuong Ephah mun sawma khena mun khat chawi intin, sathau a sunkhum ding ahi puoh a, gimlim le a helloh ding ahi; itthikna an thillat ahi a, hetzingna an thillat, sukkhelh hetzingna ahi.

¹⁶ Chun, thiempu’n amahnu chuh hun pui intin, maichâm masang ah din sak in a.

¹⁷ Thiempu chun tui thiengtho chuh leibel ah sung intin, Lalpa umna puon-In tuonga leivui chuh lân tin, tui laka chun seplut in tin, hung khan a.

¹⁸ Tichun, thiempu chun numei chuh Lalpa ma ah dinsak intin, a sam phel sak intin, hetzingna changbuong thillat, itthik thawihna thillat chuh chawihsak intin, thiempu chun hansie tunsak tui kha chuh chawi ina.

¹⁹ Thiempu chun numei chuh kihâksiel sak in tin, numei kawma chun, na pasal hilo midang kuo mah in a hun kuolpih loh u a, thanhuoina lama na petmang loh chun, zie tui kha a um hansie hin hun suna puo’n a.

²⁰ Amahvang chuh zawl na saih a, na pasal hilo kuo ahim in ahun kuolpih chun suokcha puo’n la, a tih ding ahi.

²¹ Chun, thiempu chun numei chuh vau intin, kihâksiel sak intin, numei kawmah thiempu chun, Lalpa’n na malpi a sukbal a, na gil a hih vum chun, na chipihte lak ah hansie dawl in hun umsak hen;

²² Hansie tunsak zie tui kha hih na gilsung ah lut in tin, na malpi chuh kithing intin, na gilpi chuh vum ina, tin Numei chun, Amen, Amen, ti’n tin, “Lalpa’n khutibang chun hih hen a tih ding ahi,” a ti a.

²³ Chun, thiempu chun zie sapsietna thu haw chuh zik tha’n tin, tui kha a chun dieh in a.

²⁴ Chun, numei chuh hansie tunsak tui kha chuh a dâwnsak ding ahi; tichun, hansie tunsak tui chuh a sung ah lut intin, hung kha’na.

²⁵ Chun, thiempu chun itthikna thillat changbuong chuh numei khut apat chun lân tin, Lalpa kawmah an thillat chuh pei intin, maichâm achu a kawih ding ahi.

²⁶ Thiempu chun thillat hetzingna chuh a khut dim in ham intin, maichâm a chun hâl intin, zie zawh chuleh tui chuh numeinu a dâwnsak ding ahi.

²⁷ Chun, tui a vak dâwnsak tieng chuleh, a pasal chunga thil ana sukhiel ahih chun, hansie tunsak tui chuh a sung ah lut intin, hung khan tin, a gilpi hung vum in tin, a malpi hung kithing intin. Tichun a min chuh a chipihte laka hansie buokkhum in um ina.

²⁸ Amahvang numei chuh ana buok loh a, a thien chun suokcha’n tin, nau vawp zel thei ina.

²⁹ Ziehi, zi mun dang nga a, a pasal hilo midang tawh kisubuok ahim,

³⁰ Pasal in muonmawh na lungthim a neih a, a zi a muonmawh ahim a bawl dân ding chuh ahi: numei chuh maichâm masang achun puisuk intin, thiempu chun zie dân chengcheng guol hin a chunga a bawl ding ahi.

³¹ Khutichun pasal chuh gitlohna apat chun suokcha’n tin, numei chun a gitloh na mawh chuh puo’n a, ti’n a ti a.