KISIMNA 36 - PATHIEN LEKHABU THIENGTHO (BSI)

Numei Goluoh Ding Dinmun

¹ Joseph suonte laka, Manasseh cha, Makir chapa Gilead inkuon lawiupa te laka mihaw chuh Mosi leh lawiupa, Israel suon lawiupa te kawm achun a chieh uh a; a kawm u ah,

² “Lalpa’n Israel chate chuh phunsan a a luoh dinguh gam pie dingin thu a hun pie a. Ka suohpihpau Zelophehad luoh ding chuh, a chanu te pie ding inle thu a hun pie a.

³ Himahleh, Israel namdangte a kichên pih u chun, a neihlelamteu chuh zie namdangte chuh chang untin, tichun, gam pieka I um nateu hi suktawm hiding ahi, tih hezing un,

⁴ Israel te Jubili kum a hungtun tieng leh, a goluoh u chuh pasal a va neihnau achu behlap hiding ahi a, ka pileputeu goluoh apat a go u chuh lak hi’n a. Zelophehad chanute neih cheng chule, Israel nam dang a va kichênpih teu kawm a chuh piek det hi’n tin, tichun, I nam lak apat in mangthai in au,” a va tiu a.

⁵ Khutichun, Mosi’n Lalpa apat a thupiekte chuh Israel chate kawm achun a gena, tihin: Joseph suonte phung hin a gen dik hi.

⁶ Lalpa chun, Zelophehad chanute chuh a deih takphawt teu chuh kichênpih thei untin, amahvang chuh, a pulepateu suonte laka ngêi a kichênpih dinguh uh ahi.

⁷ Khutichun, Israel chate neihlelam chuh amau namte mah a hizing ding ahi.

⁸ Numei kuole, Israel te laka go luoh ding chun, amah namte laka mi mah chuh a kichênpih ding ahi. Khutibang chun Israel chate chun a pileputeu go chuh luoh to untin,

⁹ a neihlelam teu chuh nam dangte kawma piek sawn vielviel hilo ding ahi.

¹⁰ Tichun, Lalpa’n Mosi thu a piek bangtak chun Zelophehad chanute chun a hih u a.

¹¹ Zelophehad chanu Mahlah te, Tirzah te, Hoglah te, Milkah te, Noah te chun a pau suohpihpa chapate chuh tawh a kichêng u a.

¹² Joseph cha, Manasseh chapate a nei u a, tichun, a gam u chun a pau phung achun a um zing tai.

¹³ Ziehaw hi Lalpa’n Mosi manga, Jerikoh zawn Jordan kânna Moab phaicham a Israel chate a piek, thupiekte leh a dân thuguot te chuh ahi.