KISIMNA 34 - PATHIEN LEKHABU THIENGTHO (BSI)

A Gamsung Gamgi

¹ Chun, Lalpa’n Mosi chuh a hopih a,

² “Israel chate chuh thupie’n la, a kawm u ah,” Kanaan gam chuh na lut tieng u leh, na gamgi ding u chuh zie tawbang hi hi ding ahi;

³ simlam a na gamgi ding u chuh Zin thalek apat a Edom zul ah chieh intin, a simlam a gamgi chuh Tuisuohgiet-al mawng tâwp a kipata suohlam pang ah chieh intin,

⁴ Chuleh, Akrabim kaltohna, simlam pang ah kâwi intin, Zin hawhpai intin, chun, a hung pawtna chuh Kadesh-barnea simlam ah hi’n a, Hazar-adar ah chieh intin, Azmon ah chieh zel ina.

⁵ Chuleh, Azmon apat in Aigupta gamgi tiengin kâwi intin, a tâwp na chuh tuisuohgiet hi’n a.

⁶ A tumlam pang achun Tuisuohgiet lien chuh a gamgi din chang un na tin, ziehi tumlam a na gamgiu hi’n a.

⁷ A mâllam a na gamgiu chuh tuisuohgiet lien apat in Hor tâng huop in huol in na tin;

⁸ Hor tâng apat a Hamath lutna tiengin huolkhum intin, Zedah ah chieh pek intin,

⁹ Chun, Zephron ah chieh zel intin, Hazar-Enan sun intin, ziehi mâllam panga na gamgiu hi’n a.

¹⁰ A suohlam a na gam giu chuh Hazar-Enan apat in Shepham tiengin siem in na tin:

¹¹ Chun, gamgi chuh Shepham apat in Riblah chanin Ain suohlam pang ah chieh suk intin, tichun, gamgi chuh chieh suk zel intin Chinereth dîl suohlam panga ken lak tieng in kithun ina.

¹² Chun, Jordan lam ah chieh suk intin, a tawpna chuh Tuisuohgiet-al tieng hi’n a. “Ziehi a kimvela gamgi ning li te chuh ahi, ti’n,” a ti a.

¹³ Tichun Mosi chun Israel chate kawmah, “Ziehi Lalpa’n nam kuote leh nam kimkhat te piek dinga thu a piek, Phunsân a na luoh dinguh gam chuh ahi.

¹⁴ Reuben suonte, a inkuon u bang zel leh Gad suonte, a inkuon uh bang zelin, Manasseh nam kimkhat te’n le,

¹⁵ a gam luoh dinguh Jordan gala Jerikoh saklam pang, ni suohna lam chuh a chang tau a,” ti’n.

Tanggam a Lawiupate

¹⁶ Chun, Lalpa’n Mosi a hopih a,

¹⁷ “Gam na luoh dinguh hun hawp sak dingte chuh Thiempu Eleazar leh Nun chapa Joshua te hi ding ahiu hi.

¹⁸ Chun, gam luoh ding u chuh hun khen pih dingin nam khata lawiupa khat chiet na tel ding ahi,” ti’n.

¹⁹ Ziete min haw chuh ziehaw hi ahi: Juda nam ah Jephuneh chapa Kaleb.

²⁰ Simeon suonte nam ah Ammihud chapa Shemuel,

²¹ Benjamin nam ah Kislon chapa Elidad,

²² Dan suonte nam ah lawiupa Jogli chapa Buki,

²³ Joseph suonte nam lawiupa, Manasseh suonte lawiupa Ephod chapa Hanniel,

²⁴ Ephraim suonte nam ah lawiupa Shiphtan chapa Kemuel,

²⁵ Chun, Zebulun suonte nam ah lawiupa Parnak chapa Elizaphan,

²⁶ Issakar suonte nam ah lawiupa Azan chapa Paltiel,

²⁷ Aser suonte nam ah lawiupa Shelomi chapa Ammihud,

²⁸ Naphtali suonte nam ah lawiupa Ammihud chapa Padahel,

²⁹ Kanaan gama Israel chate gam luoh dinga hawm dinga Lalpa’n thu a piek te chuh amau haw hi ahiu hi.