KISIMNA 33 - PATHIEN LEKHABU THIENGTHO (BSI)

Aigupta apat a Moab

¹ Ziehaw hi Mosi leh Aron makaihna nuoi a, Israel chate’n Aigupta a pawtsan u a, a inkuon dungzui zela, giehbuk a siem na mun teu chuh ahi.

² Chun, Mosi chun akipat na mun u apat in a giehbuk siemnau mun cheng chuh Lalpa thupiek bangin aban aban in a zik a.

³ Chiehkân Kut a mat zawh uh, tha khatna, ni sawmlenga ni chun, Israel mipite chun hangsan takin Aigupta a pawtsan u a. Lalpa venbitna nuoi ah Rameses khawpi chuh a pawtsan tau a,

⁴ Aigupta te chun a cha lutîl chengcheng uh Lalpa’n a thah sak a vuih lai ngêi u chun; a pathienteu chung haw ale Pathien in vawihawmna a tun saka

⁵ Tichun Israel chate chuh Rameses apat in a pawt u a, Sukkoth ah a kikulh u a.

⁶ Sukkoth apat in a pawt u a, gamthip tawpa Etham ah a giek u a,

⁷ Etham apat chun a pawt u a, Baal-zephon suohlam pang Pi-hahiroth lam ah a vaikit u a, Migdol kieng ah a giek u a.

⁸ Pi-hahiroth apat a pawt kit u a, Tuipi San a hawhpai u a, Shur thalek ah a lut u a: ni thum lam ah a chieh u a, Marah ah a giek u a.

⁹ Marah apat chun a pawt kit u a, Elim a tung u a, Elim achun tuinak sawmlenih leh tûm kung sawmsagih a um a, zie tak achun a giek u a.

¹⁰ Chun, Elim apat chun a pawt u a, Tuisuohgiet San ah giehbuk a sau a.

¹¹ Tuisuohgiet San apat chun a pawt u a. Sin thalek ah a giek u a.

¹² Sin thalek apat chun a pawt u a, Dopka ah a giek u a.

¹³ Dopka apat chun a pawt u a, Alush ah giehbuk a guonggalh u a.

¹⁴ Alush apat chun a pawt u a, Rephidim ah giehbuk a guonggalh u a, zie tak achun mipite dâwn ding tui a um puoh a.

¹⁵ Rephidim apat chun a pawt u a, Sinai thalek ah giehbuk a sau a.

¹⁶ Sinai thalek apat chun a pawt u a, Kibroth-hattavah ah giehbuk a sau a.

¹⁷ Kibroth-hattavah apat chun a pawt u a, Hezeroth ah giehbuk a sau a.

¹⁸ Hezeroth apat chun a pawt u a, Rithmah ah giehbuk a sau a.

¹⁹ Rithmah apat chun a pawt u a, Rimmon-perez ah giehbuk a sau a.

²⁰ Rimmon-perez apat chun a pawt u a, Libnah ah giehbuk a sau a.

²¹ Libnah apat chun a pawt u a, Rissah ah giehbuk a sau a.

²² Rissah apat chun a pawt u a, Kehelath ah giehbuk a sau a.

²³ Kehelath apat chun a pawt u a, Sepher tâng ah giehbuk a sau a.

²⁴ Sepher apat chun a pawt u a, Haradah ah giehbuk a sau a;

²⁵ Haradah apat chun a pawt u a, Makheloth ah giehbuk a sau a.

²⁶ Makheloth apat chun a pawt u a, Tahath ah giehbuk a sau a.

²⁷ Tahath apat chun a pawt u a, Terah ah giehbuk a sau a.

²⁸ Terah apat chun a pawt u a, Mitkah ah giehbuk a sau a.

²⁹ Mitkah apat chun a pawt u a, Heshmon ah giehbuk a sau a.

³⁰ Heshmon apat chun a pawt u a, Moseroth ah giehbuk a sau a.

³¹ Moseroth apat chun a pawt u a, Bene-Jaakan ah giehbuk a sau a.

³² Bene-Jaakan apat chun a pawt u a, Hor-hagidgad ah giehbuk a sau a.

³³ Hor-hagidgad apat chun a pawt u a, Jotbathah ah giehbuk a sau a.

³⁴ Jotbathah apat chun a pawt u a, Abron ah giehbuk a sau a.

³⁵ Abron apat chun a pawt u a, Ezion-geber ah giehbuk a sau a.

³⁶ Ezion-geber apat chun a pawt u a, Zin thalek ah giehbuk a sau a. (zie chuh Kadesh le a kitii).

³⁷ Kadesh apat chun a pawt u a, Edom gam tawp Hor tâng ah giehbuk a sau a.

³⁸ Thiempu Aron chuh Lalpa thupiek bang in Hor tâng achun a va kalto a, Israel chate Aigupta gam apat a a hung pawt uh kum sawmli kum, tha ngana, ni khat ni’n zie tak achun a thi ta a.

³⁹ Aron Hor tânga a thih chun kum za leh sawmnih leh thum ahi.

⁴⁰ Kanaan mi, Arad leng, Kanaan gam simlam pang a cheng chun Israel chate a hung ui tih chuh a na he a.

⁴¹ Hor tâng apat chun a pawt u a, Zalmon ah giehbuk a sau a.

⁴² Chun, Zalmon apat chun a pawt u a, Punon ah giehbuk a sau a.

⁴³ Chun, Punon apat chun a pawt u a, Oboth ah giehbuk a sau a.

⁴⁴ Chun, Oboth apat chun a pawt u a, Moab gamgi Ije-barim ah giehbuk a sau a.

⁴⁵ Chun, Ije-abarim apat chun a pawt u a, Dibon-gad ah giehbuk a sau a.

⁴⁶ Chun, Dibon-gad apat chun a pawt u a, Almon diblathaim ah giehbuk a sau a.

⁴⁷ Almondiblathaim apat chun a pawt u a, Nebo kawma Abarim tânghaw achun giehbuk a sau a.

⁴⁸ Chun, Abarim tânghaw apat chun a pawt u a, Jerikoh zawna lui panga Moab phai ah giehbuk a sau a.

⁴⁹ Jordan pang Beth Jeshimoth apat a Abel-shittim tiengin Moab phai ah giehbuk a sau a.

Jordan Lui Kân Dinga Kisakna

⁵⁰ Chun, Jerikoh zawna Jordan lui kaihna, Moab phaizawl achun Lalpa’n Israel chate dingin zie dante hi Mosi kawmah a pie a:

⁵¹ “Jordan lui na kân u a, Kanaan gam na lut tieng u leh,

⁵² zie gama mite chengcheng chuh nawhdawk suok un la, a milim siemteu chuh suksiet sak unla, a suong milimteu chuh susieu inla, a pathien hona mun teu le na sukchim sak vek dinguh ahi:

⁵³ A gam chuh luoh unla, zie tak achun um un, na luoh ding un gam chuh ka hun piek na hiu hi.

⁵⁴ A gam chuh phunsân a inkuon bang zela na hawp dinguh ahi a, a tam deuhte chuh gam lien deuh pieu unla, a tawm deuh te chuh gam neu deuh pieu un: Phunsân a a kiekna taphawt chuh a chan uh hi’n tin; na pileputeu inkuon chiehdan bang zelin na luoh ding uh ahi.

⁵⁵ Amahvang zie gam a umte chuh na nawhdawk loh u chun, na umsak teu chuh na mit uh a dingin buoksie leh na taksau a dinga ling hiu untin, na chênna gam u achun hun subuoi zing ding ahiu hi.

⁵⁶ Chun, amau haw chunga ka hih guot haw chuh nang u chunga hih ding ka hi,” ti’n a ti a.