KISIMNA 32 - PATHIEN LEKHABU THIENGTHO (BSI)

Jordan Suohlam panga Phungte

¹ Chun, Reuben leh Gad suonte chun ganguol tampi a nei u a: Jazer gam leh Gilead gam chuh a muh un gancha dinga mun phatak hi’n a heu a;

² Tichun Gad suonte leh Reuben suonte chun Mosi leh thiempu Eleazar leh kikhawmkhawmte lawiupa haw chuh a va hopih u a,

³ “Israel te Lalpa’n panpih a a luoh sak ding khawpi, Ataroth, Dibon, Jazer, Nimrah, Heshbon, Elealeh,

⁴ Shebam, Nebo, Beon te chuh gancha dinga gam phatak a hi a, chun, na suokte hin gancha ka hun hau u a.

⁵ Na mitmuh a deihsakna ka chan u chun, zie gam hi na suokte hi ei pie’n la, kei u hi Jordan lui ei puikai dah mai in,” a tiu a.

⁶ Chun, Mosi chun Gad suonte leh Reuben suonte kawm achun, “Na suohpihteu chuh kidona ah chieh untin, nang haw chuh zie tak ahi a na um mai ding maw?

⁷ Bang zieka Lalpa’n a piek gam lut lo dinga Israel chate lungthim na suklauh uh a?

⁸ Kadesh-barnea a pata gam va entha dinga ka sawl khan zie tawbang mah hin na puteu khan a hih u a.

⁹ Eshkol luiphai tiengin a va chieh u a, gam chuh a va muu a, himahleh a hung vaihkit phet un, Lalpa’n gam a piek na gama lutna ding chun mipite lung chuh a suklauh sak u a.

¹⁰ Tichun zie ni chun Lalpa chuh a lungnatna chuh a kuong zak a, a kihâksiel ta a.

¹¹ ‘Aigupta gam apat a hung pawt, kum sawmnih apat a chunglam mi himhim chun Abraham te, Isak te, Jakob te kawm a kipautiema ka piek gam chuh kuoma’n mu puo’n au; ei zuih takloh ziek un:

¹² Kenez mi, Jephuneh chapa Kaleb leh Nun chapa Joshua te tih loh chun, a mau chun Lalpa chuh a zuih tak tak ziekun,’ ti’n a kipautiem a.

¹³ Tichun, Israel te chungah Lalpa chuh a lungna ta a, Amah mitmuha thil phalo hihpa suon chengcheng a beihman suok ma chengun, gamthip ah kum sawmli a vakvaih sak a.

¹⁴ Israel te chunga Lalpa lungnatna lauh-um tak behlap in, nang haw suon gilo hin na puteu tha na sang tau a.

¹⁵ Tu a nang haw Reuben te leh Gad te hin na zuih nawp loh kit u chun, zie mipite hi thalek a hin umsak kit intin, a sietnau mawh na puok dinguh ahi,” a ti a.

¹⁶ Mosi kawm achun a va chieh uh a a kawmah, “Zie tak ahin ka gancha teu dingin belam huongte leh ka cha neucha cha teu dingin khuo te siem ung ka ting;

¹⁷ Keihaw vang chuh gâlvan kichawih chietin, Israel chate masangah gâl lamkai a pang in, a mun dinguh ka tun masangsieh u a pang dinga kiguozosa ka hiu ui: zie gam a mite ziek chauh ahi, ka chalenauteu chuh kulh nei khuo haw ah um leu ka tih uh ahi.

¹⁸ Israel suonte mitin in a mun luoh dinguh a luoh chiet masangsieh uh ka In lam u ah chieh puo’ng kau.

¹⁹ Ka luoh ding u chuh zie lam gâl Jordan suohlam pang ahih ziekin Jordan gâl langkhat leh a khel lam chuh luohpih puo’ng kau,” a tiu a.

²⁰ Khutichun, Mosi chun a dâwng a, “Na gen bangtak u a na hih u chun, Lalpa umna zie mun apat ngêi hin galdo dingin kisau un.

²¹ Chun, gâlvan chawi cheng chun Jordan lui kai u henla, Lalpa thupiekna nuoi ah I melmateu chuh do u henla, Lalpa’n a zawh masang sieh in leh

²² gam a lak masangsieh chuh do u hen. Zie zawh tak chuleh vaikit un na tin Lalpa chung leh Israel te chung a na mawhpuoknau chuh na hih zawh tâk ziekun. Tichun Jordan suohlam pang chuh Lalpa ma a na gochan ding u chuh hita’n a.

²³ Amahvang chuh, khutibanga chu na hihloh u chun Lalpa chunga gilo hin na tin un, na gitloh nau in hun mudawk ding ahi tih na hêtchet dinguh ahi.

²⁴ Na chalenauteu a dingin khuote siem unla, na belamteu a dingin le huongte siem unla, na gen bang u chun hih un,” a ti a.

²⁵ Chun, Gad suonte leh Reuben suonte chun Mosi kawmah, “Na suokte hin na thupiek bang chun hih ung kau.

²⁶ Ka zi leh chateu leh ka belam guolteu, ka bâwngguol teu chengcheng chu Gilead gama khuo haw a hin ana um u hen;

²⁷ amahvang chuh, na suokte kido dinga kigalvan chengcheng te hin na gen bang chun Lalpa a ding in Jordan gal ah gâl va do ung kau,” ti’n a gen u a.

²⁸ Khutichun Mosi chun, a chungchâng thuu achun thiempu Eleazar te, Nun chapa Joshua te, Israel nam inkuon lawiupate chuh thu a pie a.

²⁹ Chun, Mosi chun a kawm u ah, “Gad suonte leh Reuben suonte, kido dinga kigalvan chengcheng te hin Lalpa masang a Jordan lui a hun kaihpih u a, gam chuh na lak u chun, Gilead gam chuh amau luoh dinga na piek dinguh ahi.

³⁰ Amahvang chuh, kigalvana a hun kaihpih loh u chun Kanaan gam ah na lak u ah tel mai un au,” a ti a.

³¹ Chun, Gad nam leh Reuben namte chun a dâwng u a, “Lalpa’n na kawma a gen bang tak chun hih ung kau,

³² kigalvan in Lalpa puihna nuoia galkai in Kanaan gam ah lut ing ka ting uh, tichun ka gam luoh dinguh Jordan gâl chuh ka neih ngêi na dingun,” ti’n a dâwng u a.

³³ Tichun Mosi chun. Gad suonte leh Reuben suonte leh Joseph chapa Manasseh suon, nam kimkhatte chuh Amor leng, Sihon gam haw, Bashan leng Og gam haw leh zie gama khawpi um chengcheng chu tawh, a kimvel gama khuo um haw natieng in a pie a.

³⁴ Gad suonte chun khawpi kulh nei Dibon, Ataroth, Areor;

³⁵ Atroth-Shophan, Jazar, Jogbehah;

³⁶ Beth Nimrah leh Beth-har te chuh a tungdawk kit u a.

³⁷ Reuben suonte chun khawpi kulh nei Heshbon, Elealeh, Kiriathaim,

³⁸ Nebo, Baal-meon, (a min haw hi then ahi tai). Sibmah te a tungdawk kit u a; a khawpi siem teu chuh min thak dang a sau a.

³⁹ Manasseh chapa Makir suonte chun Gilead gam a do u a; a luoh u a, Amor te, zie gama um haw chuh a nawhdawk u a.

⁴⁰ Mosi’n Gilead gam chuh Manasseh chapa Makir chuh a pie a; zie tak achun a um ta a.

⁴¹ Manasseh chapa Jair chun zie khuote chuh a va la a, Havoth-Jair a sa a.

⁴² Chun, Nobah chuh a chieh a, Kenath chuh a luoh a, a khuopelte tawh, amah min lo in Nobah a sa tai.