KISIMNA 31 - PATHIEN LEKHABU THIENGTHO (BSI)

Midian te tawh Kidona

¹ Chun, Lalpa’n Mosi chuh a hopih a,

² “Midian te chungah Israel chate phuba la’n la, zie zawh chuleh na chipihte kawmah puih hi ta’n la,” a ti a.

³ Tichun Mosi chun mipite chuh a hopih a, “Midian te chunga Lalpa phuba lâkna muolsuoh dingin Midian te do dingin na lak u a mi khenkhat kigalvan u hen.

⁴ Israel nam chengcheng lak ah, nam khat laka mi sangkhat zel kidona a na chieh dinguh ahi,” ti’n.

⁵ Khutichun Israel te sang tamtak lak apat in, nam khat lak ah sangkhat zel, kidona a chieh dingin sepaih singkhat leh sangnih a sawldawk u a.

⁶ Tichun Mosi’n nam khat zel sangkhat chiet leh, thiempu Eleazar chapa Phinehas chuh mun thiengtho a matchâk leh thu pie viel dingin, pengkun haw chawiin kido na ah a sawl a.

⁷ Tichun Lalpa’n Mosi thu a piek bang chun Midian te chuh a do u a; pasal chengcheng a that u a.

⁸ A mi thahteu lak achun Midian te leng nga, Evi, Rekem, Zur, Hur leh Reba te a tel u a midang dang a thah teu bân achun Beor chapa Balaam chuh le chemzâm in a that u a.

⁹ Tichun, Israel chate chun Midian numei haw cheng leh a chateu chuh salin a pui u a; a ganchateu chengcheng, a belam guolteu, leh a thuomphuo hawu chengcheng chuh a kilak u a.

¹⁰ A chênnau khuo cheng leh a giehmun teu cheng chuh a hâl sak suok kêi u a.

¹¹ Tichun, mihing leh gancha, sala mat leh gâllâk in a puo mang suok kêi u a.

¹² A salmatteu leh a gâllâk thil teu chuh Mosi leh thiempu Eleazar leh Israel suon kikhawm khawm haw kawmah, Jerikoh zawna Jordan pang Moab phai a a gieh mun u a chun a tun u a.

Gâlphuol apat Vaihkitna

¹³ Chun, Mosi leh thiempu Eleazar leh kikhawmkhawmte lawiupa chengcheng chuh sepaihte muok dingin giehbuk apat chuh a pawt u a.

¹⁴ Mosi chuh sepaih lawiupa kidona apat a hungte, sang chunga lawiupa te leh, za chunga lawiupate chung achun a lungna ta a.

¹⁵ Tichun Mosi’n a kawm u ah, “Bang zieka numeite cheng chuh na hing hawih vek uh a?

¹⁶ Zie numei te hi Balaam sinsakna zuite leh Peor a Israel mipite Lalpa a dinga ginumlo dinga puimangte ahiu tih na hetzing dinguh ahi. Lalpa mipite chunga hipi hun tunsak te kha ahiu ui.

¹⁷ Zieziekchun naupang laka pasal chengcheng chuh that unla, numei mi tawh kuolkhawm taphawt chu le that un.

¹⁸ Numei naupang leh nungak mi tawh kuolkhawm khalo te chengcheng chuh nang u dingin hâwi un.

¹⁹ Chun, khuo kieng ah ni sagih giek unla; kuole mi that leh mithi khawih taphawt chuh ni thum ni leh ni sagih nin kithiensak un, nangmau haw leh na sal matteu tawh.

²⁰ Chuleh thuomphuo cheng leh, savun a thil kisiem chengcheng te chu le na sukthien dinguh ahi,” a ti a.

²¹ Thiempu Eleazar chun, kidona apat a hung vaikit te kawm achun, “Ziehi Lalpa’n Mosi thu a piek dân thu guot chuh ahi:

²² Thil chengcheng sana haw, dangkaguo haw, sumeng haw, thik haw, langva haw, suon haw,

²³ bang hitaleh mei a hâla sie theilo taphawt te chuh meia na sukthien dinguh ahi. Thil chengcheng chuh sukthienthona tuia hih thientho ding ahi.

²⁴ A ni sagih ni’n na puon uh sawp un na tin uh, chun, hung thiengtho un na tin, zie zawh chuleh giehmun ah lut thei unlau,” a ti a.

Gâllâk Thil Hawpna

²⁵ Chun, Lalpa’n Mosi chuh a hopih a,

²⁶ “Nang tawh, thiempu Eleazar tawh, kikhawmkhawmte inkuon lawiupa te tawh gâllâk sum a lâk uh mihing leh gancha te chuh sim vek unla.

²⁷ Gâllâk thil cheng chuh mun nih in khen unla, akimkhat chuh sepaihte galdo a chieh te a ding hi’n tin, a kimkhat dang chuh mipite ding hi’n a.

²⁸ Kidona a chieh galkap mite chan lak apat chun, Lalpa ding a sieh dingin sal matte chikhat laka zanga zel ah khat, mihing hi henla, bâwng hi henla, sabiltung hileh khutibang zel chun hih un.

²⁹ Chun, ziehaw apat chuh a kimkhat la’n la, Lalpa kawma kithawihna thilpiek in thiempu Eleazar na piek dinguh ahi.

³⁰ A kimkhat Israel chate chan lak apat chuh sawmnga lak a khat zel kawihchuom zel unla mihing lak apat, bâwng lak apat, sabiltung lak apat, belam guol lak apat, gan guol lak apat, ziehaw chuh Lalpa puon-In enkawl Levi te pie’n,” a ti a.

³¹ Tichun Lalpa’n Mosi thu a piek bang chun Mosi leh thiempu Eleazar chun a hih u a.

³² Sepaihte’n a mat uh gâllâk sum simloh in a lak u chuh belam nuoigup leh singsagih leh sangnga,

³³ bâwng singsagih leh sangnih,

³⁴ sabiltung singgup leh sangkhat,

³⁵ mihing numei pasal tawh kuolkhawm khalo singthum leh sangnih ahiu ui.

³⁶ Chun, a kimkhat, kidona a chiehte chanvo chuh, belam nuoithum leh singthum leh sangsagih leh zanga ahi a:

³⁷ Lalpa a dinga sieh belam chuh zagup leh sawmsagih leh nga ahi.

³⁸ Bâwngchal chuh singthum leh sanggup ahi a; zie a Lalpa dinga sieh chuh sawmsagih leh nih ahi.

³⁹ Chun sabiltung chuh sangthum leh zanga ahi a, zie a Lalpa dinga sieh chuh sawmgup leh khat ahi.

⁴⁰ Chun, mihing chuh singkhat leh sanggup ahiu a; zie a Lalpa dinga sieh chuh mi sawmthum leh nih ahiu hi.

⁴¹ Lalpa’n Mosi thu a piek bang in sieh, Lalpa deihchuom a piek chuh Mosi’n thiempu Eleazar a pie a.

⁴² Mosi’n galdo mite apat a a hawp Israel mite chanvo kimkhat chuh,

⁴³ (Mipi chanvo kimkhat chuh belam nuoithum leh singthum leh sangsagih le zanga,

⁴⁴ bâwng singthum leh sanggup,

⁴⁵ sabiltung singthum leh zanga, mihing singkhat leh sanggup ahi a).

⁴⁶ Israel te chanvo kimkhat apat chun Mosi chun mihing leh

⁴⁷ gancha sawmnga zel ah khat a la a, Lalpa thupiek bangin Lalpa puon-In enkawl Levi te a pie a.

⁴⁸ Chun, sepaihte chunga lawiupa, sang chunga lawiupa te, za chunga lawiupa te chuh Mosi kawmah a chieh u a,

⁴⁹ a kawmah, “Na suokte hin ka khut u a um kido mite chuh ka sim u a, kuomah kimlo ka um puou hi.

⁵⁰ Khutichun, ka thil lak lak u apat in sana kicheina te, bânbuhte, khutbuhte, zungbuh te, bilbahte, khi te ka hun chawi chiet uh ahi. Ka hinnau thasang in Lalpa kawmah ka pieu a, ei humbit ina,” a va tiu a.

⁵¹ Chun, Mosi leh thiempu Eleazar chun sana a siem, a thuomphuo teu chengcheng chuh a lau a.

⁵² Sang chunga lawiupa leh za chung a lawiupa te sana, Lalpa kawma pei thillat a a lat chengcheng u chuh sekel singkhat leh sanggup leh zasagih leh sawm nga ahi.

⁵³ Tichun, gâllâk sum chuh galdo mite chun a kilak chiet u a.

⁵⁴ Chun, Mosi leh thiempu Eleazar chun sang chunga lawiupa leh za chunga lawiupate sana chuh a lau a, Israel chate hetzingna dingin kikhawpkhawm na puon-In ah Lalpa masang ah a hun chawi u a.