KISIMNA 30 - PATHIEN LEKHABU THIENGTHO (BSI)

Thutiem na Dante

¹ Chun, Mosi’n Israel nam a lawiupate chuh a hopih a, Lalpa’n thu ei piek chuh zie hi ahi:

² Mi’n Lalpa kawma thilpiek ding thutiem ahim, a hinna a kitiemna a neih chun, a thutiem chuh a bawhsiet ding ahi puoi. A kama a gendawk bang a chuh a hih ding ahi.

³ Chun, numei khat in a nungak sunga, a pa In a a umlai a bang ahim khat Lalpa kawma pie dinga a kitiem ahim, bang ahim khat hih lo dingin kitiem henla,

⁴ a pa’n a hun hetdawk phatin bangmah nielna neita kileh, a thutiem chuh a hih ngêi ngêi ding ahi.

⁵ Amahvang chuh a pa’n a het ni a a phal loh chun a sukbutit khel a ngai puoi, a pa’n a phal loh ahih ziekin Lalpa’n amah chuh ngaidam in a.

⁶ Chun, Numei pasal nei nailo in tup mawng in ahim, pilvanglo taka thil bang ahim hih lo dinga kitiemna nei in, zie zawh chun pasal nei ta leh, a pasal in a het phata a zakdah loh chun,

⁷ a kitiemna chuh a sukbutit ngêi ding ahi.

⁸ Amahvang chuh a pasal in a het ni a a phal loh chun, a thutiem chuh hihsie’n tin, ngaihtuoh gun lo a kama a gendawk haw chule Lalpa’n ngaidam ina.

⁹ Amahvang chuh meithai ahim, mi mâksa ahim chun amah leh amah kitiemna bang ahim hih dinga thutiem a neih chun, a thu tiem cheng chuh a hih ngêi ding ahi.

¹⁰ Numei in a pasal In a bang ahim khat hih lo dinga thu a tiem ahim, bang ahim khat kihâksiel a kitiemna a neih a, a pasal in a het dawka a zakdah loh chun, a thutiem chuh sukbutit ngêi ngêi ding ahi.

¹¹ A pasal in a hetsa ale a thipsan a, a zaknawp chun a thutiem chengcheng chuh um zing intin, amah leh amah a kikanna thutiem cheng chuh le um zing ina.

¹² Amahvang chuh a pasal in a heta, sukbutit ding a zakdah chun, a sukbutit a ngai puoi, a pasal in sukbutit ding a zakdah ziekin.

¹³ Bang kitiemna hi henla, bang kihâksielna a kikan hilele, a pasal chun a sudet thei a, a subei thei hi.

¹⁴ Amahvang chuh a het ni ale bangmah zakdahna a neih loh chun a thutiem chuh a sukbutit ngêi ngêi ding ahi. A het ni ale a zakdah lohna chun, a thutiem a sudet ahi.

¹⁵ Himahleh, zie thu haw chuh a het nunga, a zakdah kit chun, a zi gitloh ziek chun ama’n thuok ina.

¹⁶ Ziehaw hi pasal leh a zi, a pa leh a chanu nungak a pa In a a um laia dân dinga Lalpa’n Mosi kawma a thupiek haw chuh ahi.