KISIMNA 3 - PATHIEN LEKHABU THIENGTHO (BSI)

Aron Chapate

¹ Ziehaw hi Sinai tânga Lalpa’n Mosi a hopih laia Aron leh Mosi suonte haw chuh ahiu hi.

² Aron chapate min chuh a upapen Nadab ahi a, Abihu leh Eleazar leh Ithamar ahiu hi.

³ Ziehaw hi thiempu dinga sathau nuh, thiempu na sem dinga kawihchuom, Aron chate chuh ahiu a;

⁴ Nadab leh Abihu chuh Sinai gamthip a mei thienglo Lalpa kawma a lat u khan Lalpa ma ah a thiu a, cha a nei puou hi; Eleazar leh Ithamar chun a pau Aron dam lai in thiempu zenvielna na a sem ui.

⁵ Chun, Lalpa’n Mosi a hopih a,

⁶ “Levi chite chuh hun pui inla, Thiempu Aron kawmah kawih in, tichun, amah chuh panpih thei ding ahiu hi.

⁷ Chun, amau chun hobuk a zenvielna nasemin, kihona puon-In kawmah amah leh kikhawm khawm haw chengcheng a ding chuom in na sem un au.

⁸ Amau chun kihona puon-In matchâk chengcheng enkawl untin, tichun, hobuk achun Israel chate dingin hobuk na sem un au.

⁹ Chun, Levi te chuh Aron leh a chapa te kawmah la’n in na tin. Israel suonte a ding chuom in a kawma lat ahiu hi.

¹⁰ Himahleh, Aron leh a chapate chuh thiempu na sem dingin ziklut in na tin, amau chuh thiempu hihna chang zing un tin, midang hung kigawlh kha a um u chun suklup hin au,” ti’n.

¹¹ Chun, Lalpa’n Mosi kawmah a gena,

¹² “Ngaitie, Levi te hi Israel chate lak a pata cha lutîl, sûl hawng ta chuh keimah ngêi in ka lak ahiu a; Levi te chuh keia hi’n au.

¹³ Cha lutîl chengcheng chuh keia ahi ngâla, Aigupta gama cha lutîl chengcheng ka suklup ni khan Israel chate laka cha lutîl chengcheng, mihing leh gancha keia dinga ka hauh ahi; keia hi’n au; kei hi Lalpa chuh ka hi,” a ti a.

Levi Chite Simna

¹⁴ Chun, Lalpa’n Sinai gamthip ah Mosi a hopih a,

¹⁵ “Levi suonte chuh a inkuon kuon un leh a phung-aphungin sim inla; pasal taphawt chuh tha khat apat a chunglam na sim ding ahi,” ti’n.

¹⁶ Tichun, Mosi chun Lalpa’n hih dinga a kawma thu a piek bang in amau haw chuh a sim ta a.

¹⁷ Chun, ziehaw hi Levi chapate min chuh ahiu hi; Gershon, Kohath leh Merari te hi.

¹⁸ Chun, a suonpau Gershon chapa nih te min chuh Libni leh Shimei ahiu hi.

¹⁹ Amau suonpa Kohath chapate chuh, Amram te, Izhar te, Hebron te, Uzziel te ahiu hi.

²⁰ Amau suonpa Merari chapate chuh, Mahli leh Mushi ahiu hi, amau hi a pileputeu a inkuon uh minpute chuh ahiu hi.

²¹ Gershon chuh Libni te leh Shimei te suonpa ahi; Ziehaw hi Gershon haw suonte ahiu hi.

²² Tichun pasal chengcheng chuh, tha khat apat achunglam a sim hawu chuh sangsagih leh zanga a phau hi.

²³ Gershon suonte chun a puon-In u chuh hobuk tumlam pang achun a zak dinguh ahi.

²⁴ Chun, Gershon te inkuon lawiupa chu Lael chapa Eliasaph hi’n a.

²⁵ Gershon chate’n puon-In a a etkawl ding u chuh hobuk leh puon-In, a khuhna hi’n tin, a chungte leh kihona puon-In kawtkhak puonzak haw,

²⁶ A huongsung a puon zak haw, puon-In kawma a huongsung kawtkhak puonzak haw, maichâm kimvela haw, zie a mat ding khauzang haw chengcheng tawh hi’n a.

²⁷ Kohath chuh Amram te, Izhar te, Hebron te, Uzziel te suonpa ahi; ziehaw hi Kohath suonte ahiu hi.

²⁸ Pasal chengcheng; tha khat apat a chunglam a sim dân bang u chun sanggiet leh zagup ahiu hi; Mun thiengtho enkawl ding haw chuh.

²⁹ Kohath chapate haw chun hobuk simlam pang ah a puon-In uh a zak dinguh ahi.

³⁰ Kohath suon a lawiupa ding chuh Uzziel chapa Elizaphan hi’n a.

³¹ Chun, a etkawl ding u haw chuh; Thugawlh kawihna bawm, dawhkhâng haw, khuoilu thaumei kawihna haw, maichâmhaw, Mun thiengtho a nasepna matchâk chengcheng haw, puonzak haw, zie a nasepna van chengcheng chuh hi’n a.

³² Chun, thiempu Aron chapa Eleazar chuh Levi te lawiupa hi’n tin, Mun thiengtho enkawlte chunga mawhpuo hi’n a.

³³ Merari chuh Mahli haw, Mushi haw suonpa ahi. Ziehaw hi Merari suonte ahiu hi.

³⁴ Pasal chengcheng, tha khat apat achunglam a sim dân u chun sanggup leh zanih ahiu hi.

³⁵ Merari suona inkuon lawiupa chuh Abihail chapa Zuriel ahi a; hobuk mâllam pang ah a puon-In uh a zak dinguh ahi.

³⁶ Merari chapate etkawl dinga guot chuh hobuk in guhpihaw, a bâng guh haw, a khuom haw, a kingakna geikuokhaw, matchâk haw chengcheng ahi a;

³⁷ a huongsung ûmkimvel na khuom haw akingakna geikuokhaw, a kilhmatna haw leh a khauzangte tawh.

³⁸ Chun, hobuk suoh lampang achun Mosi leh Aron leh a chapate chun puon-In zak untin, mun thiengtho a Israel chate dingin a mamawh taphawt uh sem un au. Pawlam mi a va naih taphawt chuh suklup ding ahi.

³⁹ Lalpa thupiek a Levi te haw, a suon a suona pasal chengcheng tha khat apat achunglam Mosi leh Aron in a sim chengcheng u chuh singnih leh sangnih ahiu hi.

Levi te leh Cha Lutîl Tatna

⁴⁰ Chun, Lalpa’n Mosi kawmah, “Israel te laka cha lutîl, pasal tha khat apat a chunglam chengcheng sim inla, amin uh zikin, keia ahiu hi, a zah uh hen.

⁴¹ Chun, Levi te chuh Israel suonte laka cha lutîl chengcheng thasanga ka hauh ahi; chun, Levi chite, ganchate chuh Israel suonte gancha pieng masapen thasanga na lak dinguh ahi,” a ti a.

⁴² Chun, Mosi chun Lalpa’n thu a piek bangin Israel chate laka cha lutîl cheng chuh a sima,

⁴³ A min uh kizawm dân bang zelin, tha khat apat achunglam a sim hawu chuh singnih leh sangnih leh zanih leh sawmsagih leh thum ahiu hi.

⁴⁴ Chun, Lalpa’n Mosi a hopih a,

⁴⁵ “Israel chate laka cha lutîl chengcheng thasang in Levi te chuh kawih thiengtho inla, a ganchau haw thasang in Levi te gancha haw chuh kawih thiengtho in.

⁴⁶ Chun, Israel te cha lutîl chuh, Levi te sanga zanih leh sawmsagih leh thum a a tamzawk ziekun, na tat kit ding ahi.

⁴⁷ Khat tatna ding chuh dangkaguo sekel nga zel na piek ding ahi a,

⁴⁸ a val haw tatna sum chuh Aron leh a chapate kawma na piek ding ahi,” ti’n.

⁴⁹ Chun, Mosi chun Levi te’n a tatnau khela a tatnau sum chuh a la a,

⁵⁰ Israel suonte cha lutîl haw apat in sum chuh a la a, mun thiengtho sekel dungzui in sekel sangkhat leh zathum leh sawmgup leh nga a la a.

⁵¹ Chun, Lalpa’n thu a piek bangin Mosi chun tatna sum chuh Aron leh a chapate a pie ta a.