KISIMNA 28 - PATHIEN LEKHABU THIENGTHO (BSI)

Thillat haw Chunga Thupiek

¹ Chun, Lalpa’n Mosi a hopih a,

² Israel chate thu pie’n la, a kawm u ah, mei a ka An thillat, dinga gimlim thillat chuh a hunbi zela na lat dinguh ahi, ti’n la.

³ Ziehi mei thillat, Lalpa kawma na piek dingu chuh ahi; hâlmang thillat in belamno a chal, kum khat, demna bei, ni cheng in nih, na lat zing dinguh ahi.

⁴ Belamno khat chuh zinglam in pieu in na tin, khat chuh nitâk lama na piek ding uh ahi.

⁵ An thillat dingin, changbuong nêl ephah hawp sawm a khen hawp khat, sathau kithawk kawm hin hawp li a khena hawp khat tawh kihel.

⁶ Ziehi ni chenga thillat hâltum kei ding a piek, Lalpa a dinga gimlim, Sinai tânga An thillat a kipie masapen kha ahi.

⁷ Belamno khat latna a dâwn ding thillat chuh, hin hawp li a khen a hawp khat ahi ding ahi: Lalpa dinga uain, dâwn ding thillat chuh, mun thiengtho a na sunthak ding ahi.

⁸ Belamno khat chuh nitâk lam a na piek ding ahi a; zinglam a An thillat bangin leh zie a dâwn ding thillat bang mah chun Lalpa ding a gimlima lat, mei thillat chuh na kawih zing ding ahi.

Sabbath ni a Thillat

⁹ Chawlhni’n belamno, a chal kum khat, dem umlo nih mei thillat dingin, changbuong ephah hawp sawm a khen hawp nih sathau tawh kihel leh, zie a dâwn ding thillat chuh tawh na piek ding ahi.

¹⁰ Zie hâlmang thillat hi, Sabbath ni cheng leh, ni chenga dâwn ding thil kipie bân a chuh lat ding ahi.

Tha chenga Thilpiek

¹¹ Na tha thak cheng leh Lalpa kawma hâlmang thilpiek na piek dinguh ahi. chun, bâwngchal tuoi nih, belamchal khat, belamnu sagih kum khata upa, demna bei na piek ding ahi.

¹² Chun, an thillat dingin changbuong nêl hawih tak sathau tawh kihel, ephah hawp sawma khena hawp thum; chun, bâwngchal khat a ding in sathau tawh kihel chun, an thillat dingin changbuong nêl hawih tak hawp sawm a khen hawp nih belamchal khat tawh hel ding ahi.

¹³ Chun, belamno chengah an thillat in, changbuong, sathau tawh kihel hawp sawm a khen a hawp khat: ziehi hâlmang thillat Lalpa a dinga gimlim meia thilpiek chuh ahi.

¹⁴ Dâwn ding thillat chuh bâwngchal khat ah uain hin kimkhat hi’n tin, belamchal khat ah hin hawp thum a khen hawp khat, belamno khat ah hin hawp li a khen hawp khat: zie hi kum tunga tha cheng a hâlmang thillat ahi.

¹⁵ Nicheng a Lalpa kawma gitloh thawihna dingin kêlchal khat na piek dinguh ahi; hâlmang thilpiek na lat u leh, zie a dâwn ding thillat tihloh chuh.

Chawl Sawhloh Kut ni a Thillat

¹⁶ Chun, Tha khatna ni sawmleli ni chun, Lalpa limbawlna dingin Chiehkân Kut guolvakna na neih dinguh ahi.

¹⁷ Zie tha ni sawmlenga ni chun guolvakna chuh kipan intin, ni sagih sung hiding ahi; zie hun sung chun chângthâk chawl sawhloh nek ding ahi.

¹⁸ A ni khat ni chuh, khawmpi thiengtho hi’n tin, na na sep loh ding uh ahi.

¹⁹ Lalpa kawma mei thillat a, hâlmang thilpiek na lat ding uh ahi: bâwngchal tuoi nih, belamchal khat, belamno chal kum khat a upa sagih demna bei chiet na lat ding uh ahi.

²⁰ Chuleh, An thillat changbuong nêl tak chuh, thau tawh kihel: bâwngchal cheng chu tawh ephah hawp sawm a khena hawp thum chuh hi’n tin, belamchal no chu tawh mun sawm a khen a mun nih na tel sak ding ahi.

²¹ Belamno sagih chuh, belamno khat chu tawh mun sawm a khena mun khat hi ding ahi;

²² chun, gitloh thawihna dingin kêlchal khat nanguh a dinga tatna hun siem sak dingin na lat dinguh ahi.

²³ Ziehaw hi zinglam a thillat, hâlmang thilpiekte behlapna a na lat ding uh ahi.

²⁴ Zie tawbang hin Lalpa dinga gimlim mei thillat chuh ni sagih sung nicheng a na piek ding uh ahi: Zie hi hâlmang thillat na piek u leh zie a dâwn ding thillat ni chenga na piek uh simloh a chu na hih ding uh ahi.

²⁵ Ni sagih ni chun kikhawpna thiengtho nei un na tin, na na sep loh dinguh ahi.

Buh ât Kut a Thillat ding

²⁶ Chun, buh ât kut ni khat ni a, Lalpa kawma gah masa na piek tieng u leh, kikhawpna thiengtho na neih ding uh ahi a, na na sep loh ding uh ahi.

²⁷ Hâlmang thilpiek Lalpa dinga gimlim chuh na lat ding uh ahi a; bâwngchal tuoi nih, belamchal khat, belamno chal demna bei kum khat a upa sagih hi ding ahi.

²⁸ An thillat thau tawh kihel changbuong chuh bâwngchal khat ah ephah, hawp sawm a khen hawp thum, belamchal khat ah hawp sawm a khen hawp nih.

²⁹ belamno sagih, belamno khat zel ah, hawp sawm a khen hawp khat hi ding ahi.

³⁰ Chuleh, gitloh thawihna dinga kêlchal khat le na lat dinguh ahi, zie tawbang ahi mipite a dinga kithiensakna na siem sak ding ahi.

³¹ Chun, ni chenga hâlmang kithawihna na hih bân u ah, dâwn ding thillat leh an thil latte leh hâlmang thillat te na lat ding uh ahi. Ziehaw chuh demna bei hiding ahiu hi.