KISIMNA 27 - PATHIEN LEKHABU THIENGTHO (BSI)

Zelophehad Chanute

¹ Tichun, Zelophehad chanute chuh a hung kipan u a; Zelophehad chuh Herper chapa ahi a, Herper chuh Gilead chapa ahi a; Gilead chuh Makir chapa ahi a Makir chuh Manasseh chapa ahi: tichun, Zelophehad chuh Joseph chapa Manasseh phung a mi ahi.A chanute min chuh Malah, Noah, Hoglah, Milkah leh Tirzah ahiu hi.

² Chun, ziete chuh Lalpa umna puon-In kawtkhak ah, Mosi leh thiempu Eleazar leh phung tina milien haw leh, ki khawm khawmte chengcheng masang achun a va ding u a.

³ “Gamthip a khan ka pau a thi a, Lalpa do dinga kikhawm lawi, Korah lawi lak a khan a tel puoh a; himahlele amah gitloh ziekin a thi a, chapa a nei puoh a.

⁴ Chapa a neih loh ziek mai in bang ti’n a ka pau min chuh a suonte laka pata a beih mai ding? a pau suohpihte lak ah keihaw le chanvo nei pieu in,” a tiu a.

⁵ Mosi’n a thuu chuh Lalpa kawmah a tun a.

⁶ Lalpa chun Mosi a hopih a,

⁷ “Zelophehad chanu te chun a hih dik ui: a pau suohpih te laka chanvo na siem sak tei ding ahi a, a pau chanvo chuh na piek ding ahi.

⁸ Israel chate kawmah, ‘Mi, chapa neilo a a thih chun a go chuh a chanute na piek dinguh ahi.

⁹ Chanu a neih loh chun a go chuh a suohpihte na piek ding ahi.

¹⁰ Chuleh suohpih neilo ahih a ahih chun, a go chuh a pa suohpihte na piek dinguh ahi.

¹¹ A pan suohpih a neih loh chun, a go chuh amau phung sunga a chanau nai pên pie’n na tin uh, a man nei in a. Lalpa’n Mosi thu a piek bangin, Israel chate dingin dân dettak hi’n a,’ ti’n gen in,” a ti a.

Mosi Thasang dinga Joshua Telna

¹² Chun, Lalpa’n Mosi kawmah, “Zie Abiram tâng achun chiehto inla, Israel chate ka piek ding gam vak thil in.

¹³ Na vak muh zawh tak chuleh na suohpihpa Aron bangin nangle na pilepute kawmah puih hita’n la;

¹⁴ Zin thalek a kikhawm khawm haw a phunchiek lai u khan ka thu kalh a na hel ziekin.” (Zin thalek a Meribah-kadesh tui akhan ahi),

¹⁵ Chun, Mosi chun Lalpa a hopih a,

¹⁶ “Lalpa Pathien hinna nei chengcheng hinna bulpi chun, mipite puitu ding leh,

¹⁷ a makai dinguh, a mau haw puidawk a puilut ding guot hen, khutichun, mipite hi chingpa neilo belamte banga a um lohna dingun,” a ti a.

¹⁸ Khutichun, Lalpa’n Mosi kawmah, “Nun chapa, a chunga thagau umna pa, Joshua chuh pui in la, a chungah na khut nga’n la,

¹⁹ Thiempu Eleazar leh mipi kikhawm haw masang ah dinsak inla, a mitmuh un thuneihna pien.

²⁰ Israel suon, kikhawm khawm haw chengcheng in a thu a mat theih na dingun a chungah na lopina nga’n.

²¹ Tichun, amah chuh thiempu Eleazar masangah ding intin, ama’n Lalpa masangah Urim leh Thumim mang in vaihawm sak intin: a thu’n pawt untin, a thu’n lut un au. Amah leh Israel suon chengcheng te, kikhawm khawm haw chengcheng tawh,” a ti a.

²² Mosi chun Lalpa thupiek bang chun a hih a: Joshua chuh a pui a, Eleazar leh kikhawm khawm haw chengcheng masang achun a dinsak a:

²³ a chungah a khut a nga a, Mosi manga Lalpa’n a gen bang khan thuneihna a pie ta a.