KISIMNA 23 - PATHIEN LEKHABU THIENGTHO (BSI)

Balaam Hilhlawk Khatveina

¹ Balaam chun Balak kawmah, “Zie taka hin maichâm sagih ei bawlsak inla, bâwngchal sagih leh belamchal sagih ei guonsak in,” a ti a.

² Chun, Balak chun Balaam gen bang chun a hih a; chun, Balak leh Balaam chun maichâm cheng ah bâwngchal khat leh belamchal khat zel a lân u a.

³ Balaam chun Balak kawmah, “Na hâlmang thillat bul ahin ding zing in, kei va chieh chuom ing ka ting; Lalpa ei hopih dingin a hung mai thei a, chun ei hilh takphawt chuh hun hilh na’ng ka,” a ti a. Tichun tâng vum velvul chungah a va chieh a.

⁴ Pathien in Balaam chuh a na kituok pih a; Balaam chun a kawmah, “Maichâm sagih ka siem a; chun, maichâm chengcheng achun bâwngchal khat leh belamchal khat zel ka kawih hi,” a na ti a.

⁵ Lalpa’n Balaam kam achun thu a kawih a, “Balak kawm achun chieh kit inla, va gensawn in,” a ti a.

⁶ Tichun a kawm lam achun a chieh kit ta a; a hâlmang thillat bul achun amah leh Moab miliente chengcheng chuh tawh, a na ding u a.

⁷ Zie hilhlawk na hi Balaam chun a gen ta a. “Suria apat, suohlam tâng apat in, Moab leng Balak chun ei pui a. Hung inla, Israel mipite chung achun hansie ei hung lawh sak in,” a ti a.

⁸ “Pathien in hansie a lawh loh chuh bangti’n ahim hansie ka lawh ding? A hihloh leh Lalpa’n a sietna dinguh a gen loh chuh bangti’n ka gen thei dem?

⁹ Suongpi chungnung pên apat chun amau chuh ka mu theia, tâng apat chun a mau chuh ka mu thei ngâl a. Nam khat a mau chauh a um ahiu a, namdangte chunga vangsak na chang ahiu ui tih a kihe ngâl u a.

¹⁰ Israel namte chuh pîlnel banga tam ahiu a, simsen ding guol ahi puou hi. Pathien mite khat bang in ka hinna hi tawp sak in, Mi diktat thih bang in ei thih sak inla, chun, ka tawpna chuh amah a tawbang chuh hi hen,” a ti ta a.

¹¹ Ziephet chun Balak chun Balaam kawmah, “Nei bawl dân hi bangti dân ahi ta’m? Ka melmate hansie lawh ding in ka hun pui a, himahleh na vangsak zaw sem ta a,” a ti a.

¹² Amah chun a dâwng a, “Lalpa’n ka kama a kawih chuh ka gen ngêi ding hilo ahim?” a ti a.

Balaam Hilhlawk Nihvei na

¹³ Chun, Balak chun Balaam kawmah, “Mun dangah va chieh kit hi ti, zie apat chun amau mu thei in na tin; a um nau tieng in mu’n na tin, khenkhat chauh mu thei in na tin, abawn un vang mu puo’n la. Zie apat chun hansie ei lawh sak in,” a ti a.

¹⁴ Tichun Zophim lo mun, Pisgah tângsip ah a puito a, maichâm sagih a siem a, maichâm cheng achun bâwngchal khat leh belamchal khat zel a lân a.

¹⁵ Chun, Balaam chun Balak kawm achun, “Zie a khu Lalpa ka va ho pih kal in na maichâm sik ahin ana ding zing in,” a ti a.

¹⁶ Lalpa’n Balaam chuh a na kituokpih a, a kam achun thu a kawih a, “Balak kawmah chieh kit inla, a kawmah va gensawn in,” a ti a.

¹⁷ Khutichun a chieh kit a, Balak chuh hâlmang thillat bula, Moab miliente tawh a na ding zing chuh a mu a. Balak chun, a kawmah, “Lalpa’n bang ahi a gen?” ti’n a dawng a.

¹⁸ Balaam chun zie hilhlawkna hi a gen ta a, “Zippor chapa, Balak hung inla ka thugen hi hung ngaitha’n.

¹⁹ Pathien chuh mite guola lepchieh ahi puoh a; mihing guola lungthim kisang hethut ei puoi. A thutiem chuh a hih zel a, a gentak chuh hih in a um zel ahi.

²⁰ Amau haw vangsak dinga hilh in ka um a,

²¹ Pathien vangsak sa chuh ka sam kit theilo ahi; Israel chate masang ding chuh ka mu a, vangsietna leh buoina tun puo’n a; Lalpa a Pathien u chuh a kimvel u ah a um a, ka leng uh ahi ti’n a phuong uh ahi.

²² Pathien in Aigupta apat in a puidawk a, a mau chule zangsiel banga thahat ahi.

²³ Dawi thil hihtheihna himhim leh, dawithiem te himhim, Israel chate do dinga mat theih a um lo ahi.

²⁴ Israel namte chuh sakeibaknei hât tak bang ahiu a, a nek zawh masang u leh a suksiet zawh kêi masang u chun châwl puo’n au, a thah teu thisan a dâwn zawh masang cheng u chuh a hai puou hi,” a ti a.

²⁵ Balak chun Balaam kawmah, “Hansie lawh ki’n la, vangsak le vangsak diek ki’n, a ti a.

²⁶ Himahleh Balaam chun a dâwng a, a kawmah, ‘Lalpa’n a gen chengcheng chuh ka hih ding ahi,’ ti’n ka hun hilh hilo ahim?” a ti a.

Balaam Hilhlawk Thumveina

²⁷ Chun, Balak chun Balaam kawmah, “Hung tie, mun dangah hun pui ing ka; zie apat chun hansie nei lawh sak Pathien in a lemsa mawh die,” a ti a.

²⁸ Tichun Balak chun Balaam chuh thalek vak sun Peor tângsip, phaicham kigalmuh na chun a puito a.

²⁹ Balaam chun Balak kawm achun, “Zie tak ahin maichâm sagih nei siem sak inla, bâwngchal sagih leh belamchal sagih nei guonsak in,” a ti a.

³⁰ Balak chun Balaam gen bang chun a hih a maichâm cheng achun bâwngchal khat leh belamchal khat zel a kawih a.