KISIMNA 22 - PATHIEN LEKHABU THIENGTHO (BSI)

Balak in Balaam a Chielna

¹ Khutichun, Israel chate chuh a chieh zel u a, Jerikoh zawn, Jordan suohlam Moab phaizawl achun giehmun a guonggalh u a.

² Moab leng, Zippor chapa Balak chun, Israel chate’n Amor te chunga a thilhih teu leh, a tam dân teu a na het chun,

³ amah leh a mipite chengcheng chuh a lau mah mah tau a.

⁴ Tichun Moab te chun Midian te upa haw kawm achun, “Zie mipite haw hin bâwng in hampa a peh zawh bangin ka kimvel u a mite hi ne zo ding ahiu hi,” a tiu a.

⁵ Khutichun Moab leng Balak chun, amau gama luipi panga cheng, Pethor mun a Beor chapa Balaam sam ding chuh mi a sawl ta a. “Ngaitie, nam lientak Aigupta gam apat a hung pawt a um u a, leichung a dâp suok u a, ka gam na tieng uh lak din ei vau uh ahi.

⁶ Zieziekchun lungsiet takin hung inla, zie mite hi hansie ei va lawh sak in, keia dingin a hât taluou a, ka thah u a, ka zawh u a, ka gam u apat hin nawhdawk thei kha mawh ding u! Aziek chuh mi na vangsak te chuh vangsak in a um zel sek ui tih leh, na hansiet taphawt chuh hansie buokkhum in a um zel sek ui tih ka hêi,” a ti a.

⁷ Moab upate leh Midian upate chuh phunsân man ding chawi in a pawt tau a; Balaam kawm chuh a va tung u a; Balak thu vaithak chuh a hilh u a.

⁸ Balaam chun a kawm u ah, “Tu zan chuh zie hin giek unla, zing leh Lalpa’n ei hilh bang bang in na kawm u ah thu hun tun ing ka,” a ti a: tichun Moab milien te chuh Balaam kawm achun a giek tau hi.

⁹ Chun, Balaam kawmah Pathien a hunga, “Na kawma mite hi kuote ahiu hi?” a ti a.

¹⁰ Balaam chun Pathien kawmah, “Zippor chapa Moab leng, Balak chun ka kawmah,

¹¹ ‘Ngaitie, Aigupta gam apat a hung namte chun, lei hi a luoh suok u a; hung inla hansie nei hung buok sak in ka do thei in ka nawhdawk thei kha mawh die?’ ti’n mi a hun sawl ahi,” a ti a.

¹² Pathien in Balaam kawm achun, “A kawmuh a na chieh ding ahi puoi. Zie mite chuh hansie na lawh ding le ahi puoi. mi hampha ahiu hi,” a ti a.

¹³ Tichun Balaam chuh zingkal in a tho a, Balak miliente kawm achun, “Na gam u ah chieh kit tau in; Lalpa’n na kawm u ah ka hung ding a phal puoi,” a ti a.

¹⁴ Khutichun Moab miliente chuh a tho u a, Balak kawmah a chieh u a, “Balaam chuh I kawm u a hung a nuom puoi,” a tiu a.

¹⁵ Ziephet chun, Balak chun milien tam zawsem a mau sanga lopi zaw a sawl kit a.

¹⁶ Balaam kawm a va tung u a, a kawmah, “Zippor chapa Balak chun hiti hin a tii, ‘Ka kawma na hung ding hi bangmân dal kihen;

¹⁷ Mi zahum takin hun siem ing ka ting, ka kawma na gen taphawt chuh hih zel ing ka: zieziekchun, hung tei inla, zie mite hi hansie ei va buok sak tie,’ a tii,” a tiu a.

¹⁸ Balaam chun Balak mite chuh a dâwng a, a kawm u ah, “Balak chun a In dim dangka leh sana ei pie ding hilele, bangti dân inle Lalpa ka Pathien thu bawhpel in, a tinglo ahim a tamzaw ahim in ka hih thei puoi.

¹⁹ Zieziekchun Lalpa’n ka kawmah bangti’n a a gen kit ding tuzan chuh zie tak ahin giek kit phawt unla,” a ti a.

²⁰ Zan chun Balaam kawmah Pathien chuh a hung a, a kawmah, “Zie mite hi nang hung sama hung a hih u chun, kipan inla, a kawm u ah chieh in; amahvang chuh na kawma ka gen chauh hi na hih ding ahi,” a ti a.

²¹ Tichun Balaam chuh zingkal in a tho a, a sabiltung a guong a, Moab miliente kawm achun a chieh ta a.

Balaam Sabiltung leh Vânsâwlchâk

²² Chun, Balaam a chieh ziek chun Pathien chuh a lungna ta a, Balaam chuh a sabiltung chung ah a chuh a, a suokte nih tawh kitawn lai chuh a lampi khâk ding chun Lalpa vânsâwlchâk chuh lampi achun a na ding ta a.

²³ Sabiltung chun Lalpa Vânsâwlchâk, chemzâm chawia lampi a ding chuh a mu a; tichun sabiltung chuh lampi apat chun a peta, gam lak ah a chieh a. Balaam chun sabiltung chuh lampi a chieh sak kit guon a zêp a.

²⁴ Chun, Lalpa Vânsâwlchâk chuh grep huonpal leh khobâng kikal a lampi chîpna lai tak achun a dinga.

²⁵ Chun, Sabiltung chun Lalpa Vânsâwlchâk chuh a muh phetin, huonpal chuh a nêk a, Balaam keng chuh pal achun a nekden a; tichun a zêp kit a.

²⁶ Lalpa Vânsâwlchâk chuh a khel deuh ah a chieh a, mun chîp na lai tak, changlam ahim, veilam ahim a pet theih loh na lai tak achun a ding a.

²⁷ Ziephet chun sabiltung chun Lalpa Vânsâwlchâk a muh chun, Balaam chuh a bawhpih ta a; tichun Balaam lung chuh a hung na ta a, a mawlh in sabiltung chuh a zêp a.

²⁸ Khutichun Lalpa’n sabiltung chuh a pau sak a, Balaam kawm achun “Bang ka hun lawh a, hiti a hi thum vei hiel nei zêp ahim?” a ti a.

²⁹ Balaam chun sabiltung kawm achun, “Nei muhsit ziek ahi: chemzâm a na chawi hi vang leng ka hun that hiel ta puoh die,” a ti a.

³⁰ Sabiltung chun Balaam kawmah, “Tuni tienga na chutna zing, na sabiltung hilo ka him? Hiti bang hin ka hun bawl kha’m?” a ti a. Amah chun, “Bawl khalo e,” a ti a.

³¹ Tichun, Lalpa’n Balaam mit chuh a sukvak sak a, tichun Lalpa Vânsâwlchâk chemzâm chawi a lampi a ding chuh a mu ta a, a khun a, mai a lei si’n a bawkkhup a.

³² Lalpa Vânsâwlchâk chun a kawmah, “Bang a ti a zie bang a chuh na sabiltung thumvei hiel na zêp ahim? Ngaiin, ka masang apat na chiehkhelh tâk ziekin a hun dal dinga hung dawk ka hi;

³³ Sabiltung chun ei mu a, ka masangah thumvei hiel a pet ahi kha: pet lo hile chuh amah chuh hing hawih ing ka ting, nang chuh hun that mai ding ka hi,” a ti a.

³⁴ Balaam chun Lalpa Vânsâwlchâk kawmah, “Ka na gilo ahi tai, ei dal dingin lampi ah na ding hi tih ka he puoh ngâl a; zieziekchun diklo na sak chun vaikit mai ing ka,” a ti a.

³⁵ Himahleh, Lalpa Vânsâwlchâk chun Balaam kawmah, “Zie mite kawm ahin chieh inla; amahvang chuh, na kawma ka thugen mai hi na gen ding ahi,” a ti a. Khutichun Balaam chuh Balak miliente kawm achun a chieh ta a.

Balak in Balaam a Muokna

³⁶ Chun, Balak chun Balaam chuh a hung hi tih a het phet in Arnon lam a a gamgi tieng uh, Moab khawpi tieng in a va muok a.

³⁷ Balak chun Balaam kawmah, “Nang hun sam dingin mi ka hun sawl hilo ahim? Bang zieka ka kawma hung zieng lo na hi? Kipahman hun pie theilo ding ka hi a ahim?” a ti a.

³⁸ Balaam chun Balak kawmah, “Ngaitie, na kawmah ka hung tung ta a; thil chengcheng gen theihna ka nei a ahim? Pathien in ka kama thu a kawih chauh chuh ka gen ding ahi,” a ti a.

³⁹ Tichun Balaam chuh Balak kawm achun a chieh ta a, Kirath-huzoth khawpi a tung u a.

⁴⁰ Balak chuh bâwngchalte, belam te chun a kithawi a, a sa chuh Balaam leh a kawma a miliente haw chuh a pie ta a.

⁴¹ A zingkal kit chun, Balak chun Balaam chuh Bamoth-Baal munsang, Israel mipite a nai lam chauh muh phakna mun achun a puito ta a.