KISIMNA 21 - PATHIEN LEKHABU THIENGTHO (BSI)

Kanaan Mite Zawh na

¹ Chun, Kanaan mi, Arad leng, simlam a um chun Israel mite Atharim lampi ah a hung ui tih mi gen a na za a, tichun a na do a, khenkhat chuh sal in a man ta a.

² Israel mite chun Lalpa kawmah thu a tiem u a, “Zie mite hi ka khut u a nei piek chun a khawteu hi sumangthai kei ung kau,” a tiu a.

³ Tichun Lalpa’n Israel mite thugen chuh a zawp a, Kanaan mite chuh a pie a, amau haw leh a khawteu chuh a sumang kei u a; zie mun min ding chun Hormah a sau a.

Sumeng Dâk gûl

⁴ Chun, Hor tâng apat chun Tuipi San lam zuonin Edom gam kimvel in a chieh u a; lampi achun mipite chuh a lungkim lo mah mah tau a.

⁵ Mipite chun Pathien leh Mosi kalh in, “Gamthip a thi dinga bang a ti a Aigupta apat a nei puih dawk uh a? Chângthâk la umlo, tui la um lo; zie an mantheihlo hile ka kihdak ui,” a tiu a.

⁶ Khutichun Lalpa’n mipite lak achun gûl gu na chi a sawl a, mipite chuh a chu a, tichun, Israel mite tamtak thalek achun a thiu a.

⁷ Mipite chuh Mosi kawmah a chieh u a, “Lalpa leh nangmah kalh a ka na pau tâk ziek u hin ka na gilo tau hi, gûl haw hi ka lak u apat sumang dingin Lalpa kawmah paucham in,” a tiu a. Khutichun mipite a ding chun Mosi chuh a paucham ta a.

⁸ Chun Lalpa’n Mosi kawmah, “Gûl gu na chi lim sumeng in siem inla, khuom ah khâi inla; gûl chuk taphawt chun en un tin, dam un au,” a ti a.

⁹ Khutichun Mosi chun sumeng gûl lim a siem a, khuom ah a khâi ta a; kuole, gûl chuk taphawt chun sumeng gul lim chuh a et u leh, a dam zel tau hi.

Hor Tang apat Moab Phaizawl

¹⁰ Chun, Israel chate chuh a chieh zel u a Oboth ah giehmun a guonggalh u a.

¹¹ Oboth apat chun a chieh kit u a, ni suohna lam Moab thalek achun Ije-abarim ah giehbuk a guonggalh tau hi.

¹² Zie apat chun a chieh kit u a, Zared guom ah giehmun a guonggalh u a.

¹³ Zie apat chun a chieh kit u a, Amor te gamgi apat a hung kikhawh phei thalek Arnon lehlam pang ah giehmun a guonggalh u a; (Arnon chuh Moab gamgi, Moab leh Amor te kikala um ahi.)

¹⁴ Zieziekchun Lalpa galdona bu achun, “Vaheb khawpi Supha a um, leh Arnon luiguom te,

¹⁵ guom ken kai te Ar khawpi umna geia kikhawh phei, Moab gamgi a kinga chuh,” ti’n a kizik hi.

¹⁶ Zie apat chun Beer ah a chieh kit u a; zie mun chuh Lalpa’n Mosi kawma, “Mipite chuh sam khawm inla, tui pie’ng ka,” a tihna tuilaihdawk chuh ahi.

¹⁷ Tichun, zie la hi Israel ten a sau a: “Aw, tuikhuk hung kichikdawk inla, na kawmah la sa’ng kau,

¹⁸ Lengte’n a laih uh tuikhuk chuh a lal mawlh u leh khetbuk a, mipite mi lien hawn a laih u chuh.” Tichun, gamthip apat chun Matannah ah a chieh kit tau hi;

¹⁹ Chun, Matannah apat chun Nahali-el ah; Nahali-el apat chun Bamoth ah:

²⁰ Bamoth apat chun Moab luiguom leh thalek vak suk et gam âwng Pisgah tâng achun a chieh u a.

Leng Sihon Zawhna

²¹ Israel mite chun Arnon te leng Sihon kawmah mi a sawl u a, “Na gam a hin nei chiehpai sak ah; lo ahim, grep huon ahim ah pet hiel puo’ng kau; tuilaihdawk tui haw le dâwn puo’ng ka ting uh;

²² Na gam ka khelh masangsieh uh lam lien ah chieh zel ung kau,” tiin mi a sawl u a.

²³ Himahleh Sihon chun Israel mite chuh a gam a chiehpai a phal puoh a: a mite chengcheng chuh a samkhawm a, Israel mite do ding chun thalek achun a pawt tau a, thalek a Jahaz a va tung u a; Israel mite chuh a do u a.

²⁴ Israel mite chun chemzâm in a do uh a, a gam chuh Arnon apat in Jabok mâllam tiengin, Ammon suonte chênna a hi a, a luoh tau: Ammon suonte gamgi chuh phatak a ven ahih ziek in.

²⁵ Israel mite chun Amor te khawpi chengcheng chuh a luoh u a, Heshbon leh a khawpel chengcheng u chuh tawh a luoh u a, a cheng tau hi.

²⁶ Heshbon khuo chuh Amor te leng Sihon khawpi a hi a, amah chuh zie masang a Moab leng na do a a khut apat a a gam chengcheng, Arnon luipi tienga ana lâksakpa chuh ahi.

²⁷ Zieziekchun la phuokte chun, “Leng Sihon khawpi, Heshbon chan hung unla; Tundin kit leh sakphat kit chuh ka mu nuom ui.

²⁸ Khatvei chuh zie Heshbon khawpi a hin, Sihon sepaihte chun mei guol mai in; Moab Ar khawpi chuh a susieu a, Arnon tâng sang te chuh a na susie zo tau hi.

²⁹ Aw Moab na chung a gik hi, Kemosh mite haw, na kisazo puoi; A chapate chuh suok in a lut saka, a chanute le Amor lengte sal in tâng u hen,

³⁰ Tuhin a suonteu chuh sukchimit in a um tau a, Heshbon apat Dibon tieng in, Medeba kawma, Nashim apat Nophah tieng hiel in,” ti’n a sau a.

³¹ Khutibang chun ahi Amor te gama Israel te a um uh.

³² Mosi’n Jazer dona dinga phapen lam va entha dingin mi a sawl a. Israel te chun khuo haw chuh a lau a. chun, zie taka Amor te haw chuh a nawhdawk u a.

Leng Og Zawhna

³³ Chun, a vaikit u a, Bashan lampi lam ah a chiehto u a: chun, Bashan leng Og chuh amau haw do dingin, amah, leh a mite chengcheng, Edrei a ana do dingin a pawt u a.

³⁴ Lalpa’n Mosi kawmah, “Amah chuh kihcha ki’n: amah le, a mite chengcheng le, a gam le na khuta ka hun piek a hi tai; Heshbon a um; Amor te leng Sihon chunga na hih bang khan na hih ding ahi,” a ti a.

³⁵ Khutichun amah leh a chapate leh a mipite chengcheng, sit himhim nei lo in a that u a; a gam chuh a luoh tau hi.