KISIMNA 20 - PATHIEN LEKHABU THIENGTHO (BSI)

Kadesh muna Thil tungte

¹ Chun, Israel chate, kikhawmkhawmte chengcheng chuh, tha khat na achun Zin thalek a tung u a; chun mipite chun Kadesh ah giehmun a guonggalh u a; zie tak achun Miriam chuh a thi a, a vui tau hi.

² Tichun, a giehmun u achun tui a um ta puoh a, khutichun, Mosi leh Aron kilanpih dingin a kipunkhawm tau a.

³ “Lalpa masanga I suohpih teu a thih lai u khan ei u le ana thi zaw mai kha hita leuhing aw!

⁴ Bang zieka Lalpa mipite hi ka gan guolteu tawh thalek gamgaw a thi dinga nei puih lut ahi?

⁵ Bang ziekin ahim zie gam haksa taka ei puilut dinga Aigupta gam apat a nei puihdawk uh? Buhlebal te, theipi te, grep kungte, vaimimtheite haw chi’n na ding la umlo, tui dâwn ding nasan umlo nalai,” ti’n Mosi leh Aron chuh a kinakpih tau a.

⁶ Chun, Mosi leh Aron chuh mipite lak apat chun puon-In kawtkhak ah a chieh u a, a khupbawk u a; tichun, Lalpa lopi na chuh a kawm u ah ahung kilang a.

⁷ Tichun Lalpa’n Mosi chuh a hopih a,

⁸ “Thugawlh kawihna bawm masanga tiengkhut kha la’n la, Aron chu tawh mipite chuh samkhawm un, a masang u a suongpi um kawm achun thu gen inla, tichun tui hung kikhawh dawk ina. Zie bang chun, mipite ding leh a ganchateu dâwn ding tui muhsak inla,” a ti a.

⁹ Khutichun, Mosi chuh a chieh a, Lalpa thupiek guol chun tiengkhut chuh a la ta a.

¹⁰ Mosi leh Aron chun mipite chuh suongpi pang achun a chut khawmsak u a, a kawm u ah, “Kiphin chîngte haw, ngaitiem u, zie suong pi apat hin tui ka hun lâkdawk sak dinguh ahim?” a tiu a.

¹¹ Tichun, Mosi chun a khut chuh a lam a, a tiengkhut chun suongpi chuh nihvei a zêp a, tichun tui chuh kiting tak in a hung pawt ta a, mipite leh a ganchateu chun a dâwn tau a.

¹² Himahleh, Lalpa’n Mosi leh Aron kawm a chun, “Nei ginchak loh u a, Israel chate mitmuh a nei limbawl loh ziekun, zie mipite hi amau ka piek gam achun puilut puo’n lau,” a ti a.

¹³ Zie hi ahi Meribah a tui haw chuh; Israel chate chuh Lalpa chungah a phun u a, Amah ngêi chuh a lak u a thiengtho a a ki-etsak tâk ziekin.

Edom Leng Gitlohna

¹⁴ Chun, Mosi’n Kadesh a pat in Edom leng kawmah mi a sawl a, “Na suohpihpa Israel chun hiti hin a tii; ka chung u a thuokna hung tung chengcheng chuh na he a;

¹⁵ ka pileputeu Aigupta gam ah a chieh suk u a, sawttak Aigupta gam ah a um tau, Aigupta mite’n kei haw leh, ka pileputeu ei sukgimtheih dân teu kha.

¹⁶ Tichun Lalpa ka sam u a, ka kiko aw teu chuh a na za a, a van sawlchak a hun sawl a, Aigupta gam apat in ei puidawk a, Tuhin na gam tawppen a Kadesh a hin ka um tau hi,

¹⁷ Lungsiet takin na gam hi hawhpai ung kau; lo ahim, grep huon ahim ah chieh puo’ng ka ting uh, tui sutdawk tuite le dâwn puo’ng kau: lengpa lam lien ah chieh zel ung ka ting uh, na gam ka khelh masang sieh uh changlam ahim, veilam ahim ah pet puo’ng kau,” a ti a.

¹⁸ Himahleh Edom te chun a kawmah, “Nei hawhpai ding ahi puoi, nei hawhpai chun a hun do dingin chemzâm tawh hung pawt ing kau,” a tiu a.

¹⁹ Khutichun Israel chate chun a kawmah “Lamlien ah chiehto ung ka ting uh; chun, keihaw leh ka ganchateu in na tui ka dâwn u chun, a man chuh hun pie’ng kau; thil dang bangmah hih lo in a chieh in chiehpai ung kau,” a tiu a.

²⁰ Chun, Edom te mah chun, “Ka phal puou ui,” a tiu a. Tichun Edom te chuh mipi tamtak tawh, mi hattak tak haw tawh Israel te do ding chun a hung pawt tau a.

²¹ Khutichun, Edom te chun Israel mite’n a gam a hawhpai uh a zanuom ta puou a: tichun Israel mite chuh lam dang ah a chieh kit tau hi.

Aron Thihna

²² Israel mipite chengcheng chun, Kadesh a pawtsan u a, Edom te gamgi zul a Hor tâng a tung uh a.

²³ Lalpa’n Mosi leh Aron chuh Edom gamgi zula Hor tâng achun a hopih a.

²⁴ “Aron chun a mipite chuh samkhawm hen. Israel chate ka piek na gam achun lut puo’n a, a ziek chuh, Meribah a tui akhan ka thupiek na bawhsiet ziek un.

²⁵ Aron leh a chapa Eleazar chuh Hor tâng achun hun puito inla:

²⁶ Aron chuh a silhlechente sût sak inla, a chapa Eleazar âksak inla; Tichun, Aron chuh a chipihte lak ah chieh in tin, zie tak achun thi ding ahi,” ti’n.

²⁷ Mosi chun Lalpa thupiek bang chun ahih a, Mipi chengcheng muh chun Hor tâng achun a chiehto u a.

²⁸ Tichun Mosi chun a silhlechen haw a sût sak a, Eleazar chuh a âksak a, chun, Aron chuh tângsip achun a thi ta a; chun, Mosi leh Eleazar chuh tâng apat chun a chieh suk u a.

²⁹ Chun, mipi te chengcheng chun Aron a thii tih a het phet u chun Israel nam pumpi chun Aron chuh ni sawmthum a sûn u a.