KISIMNA 19 - PATHIEN LEKHABU THIENGTHO (BSI)

Thil thienglo Sukthien Dân

¹ Chun, Lalpa’n Mosi leh Aron chuh a hopih a,

² Ziehi Lalpa thupiek chuh ahi, Israel chate chun bâwngla san demna bei, nasem ale mat khâk nailoh,

³ Thiempu Eleazar kawmah hun kai u hen la, giehbuk pawlam ah kaidawk u henla a masanga chuh a thah ding ahi.

⁴ Tichun Eleazar chun a khutzung in a thisan, chuh la’n tin, puon-In mai lam ah a thisan chuh sagih vei a theh ding ahi.

⁵ A vunte, a sate, a thisante, a êk te tawh thiempu umna a chuh hâl ding ahi.

⁶ Thiempu’n sidar thing leh husop leh pat ngat san la’n tin, bâwngla a hâlnau mei lak achun a paih lut ding ahi.

⁷ Zie zawh chuleh thiempu chun a puonhaw sawp intin, kisil intin, zie zawh chuleh giehbuk ah chieh intin, nitâk lam tieng in thiempu chuh thienglo hi’n a.

⁸ Chun, a hâlpa chun a puonhaw sawp intin, kisil intin, nitâk lam tiengin thienglo hi’n a.

⁹ Mi thiengtho khat in bâwngla hâlna vam chuh la khawm intin, daikieng mun thieng achun kawih intin, Israel chate mipi haw dinga kithiensakna tui a mat ding a hi, zie chuh gitloh thawihna ahi.

¹⁰ Bâwngla kihalna vam lakhawmpa chun a puon haw sawp intin, nitâk lam tiengin thienglo hi’n a; Zie hi Israel chate ding leh nam dang a kawm u a umte dingin kumlekhuo dân ding ahi.

Mithi Khawihkhate ding

¹¹ Chun, kuo hitaleh mithi luong khawihkha taphawt chuh ni sagih thienglo hi’n a.

¹² Amah chuh ni thum ni chun kithiensak intin, ni sagih ni chun thiengtho ta’n a. Amahvang chuh, ni thum ni a a kithiensak loh chun ni sagih ni chun le thieng puo’n a.

¹³ Kuo le mithi luong a sukkhak a, a kithiensak loh chun, Lalpa hobuk chuh a subuok a, zie tawbang mi chuh Israel te lak apat in satthak hi’n a. Kisukthienna tui chuh a kibuokkhum loh ziekun, thienglo a um zing ding ahiu a, a thien lohnau chuh a chung u a um zing ding ahi.

¹⁴ Chuleh, mi kuole, puon-In a a thih chun, puon-In a lut taphawt leh, puon-In sunga um taphawtte chuh ni sagih thienglo hi’n au.

¹⁵ Bel kihawng sa, a sitna a sit loh taphawt chuh a thienglo ahi.

¹⁶ Chun, kuon le, mihing gam laka chemzâma kisatlum ahim, a mawk thih luong ahim, mihiem guh ahim, thân ahim, a sukkhak chun, ni sagih thienglo hi’n a.

¹⁷ Zie tawbang thil buokna chuh sukthienna dingin, gitloh thawihna ding bâwngla kithat kihalna vam chuh neukhat lak a, bel sunga kawih a, tui luong lai hel ding ahi.

¹⁸ Mi thiengtho khatin husop la’n tin, tui achun dieh intin, puon-In te, bel chengcheng te, zie a mi um chengcheng te, mithi guh ahim, mithi luong ahim, thân ahim, khawih khate chuh theh in a.

¹⁹ Mi thiengtho khat in ni thum ni leh ni sagih ni chun mi thienglo chuh tui thehkhum intin. Ni sagih nin hih thiengtho intin, a puonhaw chuh sawp intin, kisil intin, nisa tum tieng leh thieng ding ahi.

²⁰ Kuole, a buok hi ngâl a kisuthieng lo chuh zie tawbang mi chuh Israel chate lak apat satthak hi’n a; Lalpa mun thiengtho chuh a subuok ahi. Kisukthienna tuia a kibuokkhum loh ziekin, a thienglo ahiu hi.

²¹ Hun hungtung zel ding ale zie dante hi na zawp zel dinguh ahi. Kithiensak na ding tui thehpa chun a puonte sawp intin, kuole zie tui sukha chuh nitâk lam geia thienglo hi’n a.

²² Bang hitaleh, mi thienglo sukha taphawt chuh thienglo hi’n tin, kuole a sukha taphawt chuh nitâk lam geia thienglo hi ding ahi.