KISIMNA 18 - PATHIEN LEKHABU THIENGTHO (BSI)

Thiempu leh Levi te Mawhpuokna

¹ Chun, Lalpa’n Aron kawmah a gena, “Nang leh na chapate leh Levi te hin munthiengtho a gitlohna mawh chuh puou un na tin uh: chun, nang leh na chapa te hin na thiempu hihnau lam thila gitlohna mawh chuh puo’n lau.

² Na inkawte, Levi phung a mite chuh, Nang leh na chapate’n puon-In a na nasep lai u a, hun panpih dingin pui in.

³ Na sep hun kithuohpih untin, puon-In sakna na chengcheng chang untin, amahvang chuh Mun thiengtho a belhaw leh maichâm chuh khawih kha kiu hen. A khawih khâk u chun nang leh a mau haw chuh thi ding na hiu hi.

⁴ Na hun seppih un tin, puon-In nasep na mawh cheng chuh puou untin, himahleh, midang ten vang a sep loh dinguh ahi.

⁵ Nang leh na chapa te chun mun thiengtho leh maichâm na chuh sem unla, Israel chate chunga ka lungnat a puonzak kit lohna ding in.

⁶ Na inkawte, Levi chite, Israel chate lak apat a nang a dinga kawihchuom chuh kei ka hi. Puon-In nasepna a neih theih na ding u a, kei a dinga kawihchuom ahiu hi.

⁷ Himahleh, nang leh na chapa te hin maichâm leh puonzak sunga na thiempu nasep u chuh tihtakzet a nasep dinguh ahi; thiempu nasepna hi thilpiek a ka hun piek ahi a; gamdang mi a hung kigawlh khak chun suklup ding ahi” a ti a.

Thiempu te Chanvo

⁸ Chun, Lalpa’n Aron kawmah “Israel chate thilpiek thiengtho cheng leh ka kienga thillat cheng chuh nang ka hun piek a hita a; tichun, nang leh na chate cheng a dinga kumkhuo go dinga thiempu chanvo ka hun piek ahi.

⁹ Thillat thiengtho maichâm a kihal tello, ziehaw hi nanguh chanvo ahi. Changbuong thillat te, gitloh thawihna thillat te, leh chamna thillat haw hi. Kei kawma thillat thiengtho taphawt chuh nang leh na chapate chanvo hi zel in a.

¹⁰ Ziehaw hi mun thiengtho a na nek dinguh ahi a, pasal haw chauh in a nek dinguh ahi a, nanguh a dinga thil thiengtho hiding ahi.

¹¹ “Zie bân ahin, thil dang, Israel chate’n kei kawma deihchuom a a piek teu chuh nanguh chanvo ahi a. Nang leh na chapate leh na chanu te dinga kumlekhuo a na chanvo dingun ka hun piek na hiu. Na inkuon sunga mi, kuo hileh na insung a mi thieng taphawt chun ne thei unlau.

¹² “Chun, thau phapente, grep phapente, buh phapente, gah masapente Lalpa dinga a piek u chuh ka hun piei.

¹³ A lo u a gah masapen Lalpa a ding a a hun chawih u chuh nang a hi’n tin; na In a mi thiengtho chengcheng in ne thei un au.

¹⁴ “Israel chate thillat thiengtho taphawt chuh nang a hi’n a.

¹⁵ “Lalpa dinga a piek uh, sulhawng masapen taphawt chuh mihing le gancha le nanga hi’n a: amahvang chuh cha upapen chuh na tat tei ding hi’n tin, gan thiengtho lo no suok masapen chuh na tat ding ahi.

¹⁶ A tatna man ding chuh tha khat mi chu mun thiengtho sekel nga (gerah sawmnih) Ho-In a kimang sekel dungzui in sekel nga hi’n tin, zie chuh gerah sawmnih ahi.

¹⁷ Himahleh bâwngno suok masapente, belamno suok masapente, kelno suok masapente, chuh tatkit loh ding ahi, a thiengtho ahiu a; hâlmang thillat a piek ding ahi. A thisan chuh maichâm a theh ding a hi a, a thaute chuh Lalpa a dinga gimlim, mei thillat a piek ding ahi.

¹⁸ Himahleh, a sa haw chuh nang a hi’n a. Pei thillat a sa a âwm leh a mal changlam nang a a hih bang hin.

¹⁹ “Israel chate’n thilpiek thiengtho Lalpa kawma a piek cheng u chuh nang leh na chapate leh na chanute kumkhuo a a chanvo dinguh a ka hun piek ahi. Zie hi nang leh na suonte chana Lalpa ma a kumkhuo chi thugawlh chuh ahi,” a ti a.

²⁰ Lalpa’n Aron kawmah, “A gam u achun go chan nei puo’n na tin uh, a lak u a le chanvo nei diek puo’n lau: Israel chate laka na chanvo leh na go chan chuh keimah hi ka hi,” a ti a.

Levi te Chanvo

²¹ Lalpa chun, “Israel chate’n kei kawma sawma-khat a hun piekteu chuh Levi te kawma na piek ding ahi. Zie chuh ka umna puon-In enkawla na a sep man u chuh ahi.

²² Midang Israel chate chun puon-In chuh a hun naih dinguh ahi puoi; gitloh mawh puon thi kha’n au.

²³ Tu apat hin Levi te chauh hin puon-In na sem untin, a mawh chengcheng chuh puo’n au. Zie hi na suonteu tieng a dingin le zuih hi’n a. Levi te chun Israel te lak achun gochan det nei puo’n au,

²⁴ Israel chate’n Lalpa kawma a sawma-khat a piek teu chuh a chanvo ding u a ka piek ziekin.”

Levi Chite Sawma-khat

²⁵ Chun, Lalpa’n Mosi a hopih a,

²⁶ Zie thu tihloh chun le Levi te chuh hopih inla, a kawm u ah, “Na gochan ding u a Israel chate sawma-khat Lalpa hun piek, a mau apat a na lak tieng u leh, zie sawma-khat lak apat chun sawma-khat chuh Lalpa kawma pei thilpiek a na lat ding ahi.

²⁷ Tichun na pei thillat u chuh, phuol a buh leh uain tung masapen lat a ngaih hi’n a.

²⁸ Khutibang chun Israel chate lak apat a sawma-khat na muh chengcheng u apat chun Lalpa dinga thilpiek dinga na kawihchuom dinguh ahi.Lalpa kienga na thilpiek ding u chuh Aron kawma na piek dinguh ahi.

²⁹ Chun, na thil muh teu lak apat Lalpa chanvo chuh na kawihdawk ding ahi a, a phapen chuh na kawih thiengtho ding ahi.

³⁰ Chuleh, a phapen chuh na kawihchuom zawh tieng u leh, adang cheng chuh buhphuol akipat a a hun puok uh ahim, grep thawkna apat a ahun puok guol u a Levi te a dinga na pawm ding ahi.

³¹ Kihona puon-In a a nasep man uh ahih ziekin, nang haw leh na inkuoteu in khawitak mun hileh ne thei unlau.

³² A lak a phapente Lalpa kawma na piek phawt u chun thiemmawh chang puo’n na tin uh. Amahvang chuh, Israel chate thil thiengtho haw chuh, a phapente lat ahih masanga subuok lo dingin kivengphau un, na sukbuok khâk u chun thi ding na hiu hi,” ti’n a ti a.