KISIMNA 17 - PATHIEN LEKHABU THIENGTHO (BSI)

Aron Tiengkhut Sel

¹ Chun, Lalpa’n Mosi a hopih a,

² “Israel chate hopih inla, a inkuon tin u a dingin tiengkhut khat chiet in, a inkuon tam dân bang zela a inkuon lawiupateu zah, mawlh sawmlenih la’n la; chun, a tiengkhut u achun a min chiet uh zik in.

³ Levi te tiengkhut achun Aron min zik in, A phung tin lawiupa chiet a dingin mawlh khat zel ahi ding ahi.

⁴ Ka umna puon-In ka hun hopih sekna mun a, thugawlh kawihna bawm masang achun kawih in.

⁵ Tichun, ka mi tel pên pa tiengkhut chuh hung sel intin: tichun Israel chate phunchiekna, nang chunga a phunchieknau hih ka suk hai ding ahi,” ti’n.

⁶ Khutichun Mosi chun Israel chate chuh a hopih a, a inkuon lawiupa chengcheng chun a inkuon chiet uh lawiupa ding in tiengkhut khat zel, tiengkhut sawmlenih a pieu a: Aron tiengkhut chule a tiengkhut hawu lak achun a tel a.

⁷ Khutichun, Mosi chun tiengkhut cheng chuh puon-In a Lalpa Thuthun kawihna bawm masang achun a kawih ta a.

⁸ Chun, a zing chun Mosi chuh puon-In achun a va chieh a; Levi inkuon a dinga Aron tiengkhut chuh a na sel a, a mûm a, a pak a, almond min a na gah a.

⁹ Chun, Mosi’n tiengkhut chengcheng chuh Israel chate masang achun a lakhawm a, a etsak a, a mu chiet u a; lawiupa cheng chun a mau a chiet chuh a kilak kit u a.

¹⁰ Chun, Lalpa’n Mosi kawmah, “Aron tiengkhut chuh Thuthun kawihna bawm masang achun kawih kit ah; Israel chate kei chunga a phunchiek nau na suktawp theih na ding in, a khutih loh chun, thi ding ahiu hi” a ti a.

¹¹ Khutichun, Lalpa thupiek bang tak chun Mosi chun a hih ta a.

¹² Israel mipite chun Mosi kawmah, “Kuole puon-In naih taphawt thi ding ahih chun,

¹³ Ka bawnchau a thi vek ding ka hi tau chuh,” a tiu a.