KISIMNA 16 - PATHIEN LEKHABU THIENGTHO (BSI)

Kora, Dathan leh Abiram helna

¹ Chun, Levi chapa Kohath, zie pa chapa Izhar, zie pa chapa Korah chun Mosi chung a kiphinna ding lungthim a hun nei a, Reuben suonte laka, Dathan leh Abiram Eliab chapa leh Onpeleth chapa leh,

² Israel te laka midang zanih leh sawmnga, mipite’n a mapuitu phapen a a teldawk teu chuh a kithuguolpih u a,

³ Mosi leh Aron masang achun a kikhawm tau a, a kawm u ah, “Na chiehkhiel taluo tau ui! mipite chengcheng hi a thiengtho u a, Lalpa a ahiu a, Ka bawn u a kawmah Lalpa a um ngâl a. Bang zieka Lalpa mipite chung ahi kiletsak chuom na him?” a tiu a.

⁴ Zie chuh Mosi’n a vak het chun, a khupbawk a, a paucham a.

⁵ Kora leh a lawite chengcheng kawm achun, “Zing leh Lalpa’n a mah a te chuh sulang intin, Amah va naih dingin hun gen intin, a tel te ngêi chuh maichâm va naih dingin gen in a.

⁶ Zing leh zingkal leh, na nungzui te tawh meilakna chawi unla, a chungah mei-âm leh gimlim kawih unla, maichâm ah chawi un.

⁷ Khutichun Lalpa’n a tel chuh hêi tiu. Levi chite haw, ngaithau in, nang haw hi na hiu thil hihkhiel zaw chuh!” a ti a.

⁸ Mosi chun Kora kawm achun a gen zel a. “Nang haw Levi chite haw ngaithau in!

⁹ Lalpa hobuk a nasema, mipite masanga nasem dinga Israel chate, Pathien in amah naih dinga Israel mipite lak apat a a hun kawihchuom leh;

¹⁰ Levi chapa na unaute chengcheng thiempu na sem dinga a hun umsak hi thil neuthem a na ngaih uh ahi maw, thiempu hihna na hawl naklai uh?

¹¹ Zieziekchun nang leh na lawi te chengcheng hi Lalpa dodal in na kikhawm khawm uh ahi. Aron hin bang a hih a, a chunga na phunchiek uh ahim?” a ti a.

¹² Mosi chun Eliab chapa Dathan leh Abiram a sam dingin mi a sawl a: a mau chun, “Hung to puo’ng kau;

¹³ thalek a ei sulum dinga Aigupta gam bâwngnawi leh khuoizu luonna gam apat nei puihdawk u hile hun salo na him? Ka chung u ah na kiletsak na laiset a.

¹⁴ Gam phatna leh lei phatna gam ah nei puilut puoh a, lo leh grep huon, go ding le nei pie diek puoh a; tu a hi nei thep guot naklai ahim? hung to hiel puo’ng kau,” a tiu a.

¹⁵ Tichun Mosi chuh a lung a na a, Lalpa kawmah, “A thilpiekteu chuh pawm ki’n; a sabiltung hawu khat chale ka la puoh a, kuomah le diklo tak, in ka bawl diek puoi,” a ti a.

¹⁶ Mosi’n Kora kawm achun, “Zing leh nang leh na mipi kikhawm khawm haw tawh, Aron tawh, Lalpa umna puon-In ah hung un;

¹⁷ Chun, mitin in a meilaknau chawi chiet u henla, gimlim buokkhum chiet u henla, chuleh Lalpa ânga gimlim hâlna kuong zanih leh sawmnga hun chawikhawm un la, chun, nang leh Aron inle gimlim hâlna hun chawi un,” a ti a.

¹⁸ Tichun mitin chun a meilaknau chuh a chawi u a, mei a kawih u a, gimlim a buok u a, Mosi leh Aron chu tawh puon-In kawtkhak achun a va ding u a.

¹⁹ Kora chun mipi chengcheng chuh a samkhawm a, puon-In lutna kawtkhak maia Mosi masang achun a va ding tau a. Thakhat in mipite kawm achun Lalpa lopi na vak chuh ahung kilang ta a,

²⁰ Tichun Lalpa’n Mosi leh Aron kawm achun,

²¹ “Zie mipite kawm apat hin kikhinkâng un, a mau haw hi mitphetlohkal a ka sukmang theih na dingin,” a ti a.

²² Tichun amau chuh tuol ah a khupbawk u a, “Aw Pathien, hinna nei phehlevo chengcheng te bulpi na hi a, mi khat gitloh ziekin mipite chung ahin na lungna ding a ahim,” a tiu a.

²³ Chun, Lalpa’n Mosi kawmah,

²⁴ “Mipite kawm achun, Kora te, Dathan leh Abiram te puon-In apat hin pawtmang un, ti’n gen in,” a ti a.

²⁵ Tichun Mosi chuh a kipan a, Dathan leh Abiram te kawm achun a chieh a, Israel upate chun a zui u a.

²⁶ Mipi kikhawm khawm haw kawm a chun a gena, “Zie migilo haw puon-In apat hin pawt un; a bangmah u hi khawih kiu un, khutilochun a gitloh nau hin hun tawkmang kha’n a,” ti’n a gen a.

²⁷ Khutichun, amau haw chuh Korah, Dathan leh Abiram te puon-In apat chun a pawtdawk vek u a, tichun, Dathan leh Abiram chule a puon-In apat chun a hung pawt u a, a zi leh chateu cheng tawh a puon-In kawtkhak u a chun a ding u a.

²⁸ Chun, Mosi’n, “Zie thil hi keimah deihtelna apat a hih ahi puoh a, zie thil haw hih ding hin Lalpa’n ei sawl a hi tih zie a hin he’n lau.

²⁹ Zie mihaw hi Pathien apat a gawtna bang ahim hilo a, mi dangte thih dân guola a thih u chun Lalpa’n ei sawl hi puo’n a.

³⁰ Amah vang chuh, Lalpa’n thil kihe khalo a siem a, lei hi a khitkêk a, amau haw leh a thil neihteu cheng tawh a valhtum a, thih na khawvel a a chieh u chun, zie mite hin Lalpa hi a musit ui tih he’n lau,” a ti a.

³¹ Zie thu haw chengcheng chuh a gen zawh chun, a nuoi u a lei chuh ahung khikêk phuk mai a;

³² tichun lei chun a kam a ka a, a inkuon un Kora mite chengcheng, a thuomphuou chengcheng tawh a valh vek ta a.

³³ Khutichun, amau haw leh a neih chengcheng teu chuh thihna khawvel achun a hingsan in a tum suok tau a, lei chun a kam a chih khuma, kikhawmkhawmte lak apat chun a mangthai tau hi.

³⁴ Tichun a kimvel u a Israel mi chengcheng chuh a kiko thawm u ziek chun a tai zak u a, “Lei in eihaw le ei valh khan a” a tiu a.

³⁵ Zie chun Lalpa’n mei a sawl a a kuong zak a, gimlim hâlte mi zanih leh sawmnga te chuh a kang lum ta a.

Mei lâkna Kuong

³⁶ Lalpa’n Mosi kawm achun,

³⁷ “Thiempu Aron chapa Eleazar chuh mei apat meilakna kuong chuh la dawk ding leh, mei-âmte chuh mun chuom a thehzak dingin hilh in, a ziek chuh meilakna kuong chuh a thiengtho ahi!

³⁸ Lalpa maichâm a a lut ziek chun a thiengtho ta a. Khutichun, zie a gitloh ziek u a thah a umte meilakna kuong hi la’n la, kuong pa takin sek inla, maichâm khuhna siem in, zie chuh Israel chate ding chun tiemtehna hi ding ahi.”

³⁹ Khutichun, gimlim hâlna mei in a kâktum bang haw chuh Thiempu Eleazar chun a lakhawm a, maichâm khuh na dingin kuong in a sek ta a.

⁴⁰ Israel chate dinga hetzing na dingin, Aron suon hilo, nam dang himhim in Lalpa ma a gimlim hâl dinga ahung naih loh dinguh ahi; Kora leh a lawite banga a umloh na ding un, ti a Lalpa’n Mosi kawma a gen bang khan.

Aron in Mipite a Humbitna

⁴¹ Himahleh, a zing chun, “Lalpa mite na thah uh ahi,” ti’n Israel suon mipi chengcheng chuh Mosi leh Aron chung achun a phun tau a.

⁴² Mosi leh Aron chung thu a mipi a kipunkhawm lai u chun puon-In lam chuh a ngau a; meipi’n ahun khuh a, Lalpa lopina hung kilang chuh a muu a.

⁴³ Tichun, Mosi leh Aron chuh kihona puon-In mai achun a hung u a.

⁴⁴ Chun, Lalpa’n Mosi a hopih a,

⁴⁵ “Zie mipite lak apat hin kikiengkawih un, amau chuh mitphetlohkal a ka hun sukmangthai theihna dingin,” ti’n. Chun, amau chuh tuol a chun a bawkkhup u a,

⁴⁶ Chun, Mosi’n Aron kawmah, “Na mei lâkna chawi inla, maichâm a pata mei a sung ah kawih inla; mei-âm chungah kawih in. Mipite kawmah chiehpih vak in, a mau a dingin sukthienthona siem in: Lalpa kawm a pat in lungnatna a hung pawt ahi; hi a lengpan ahi tai,” a ti a.

⁴⁷ Aron chun Mosi gen bang chun a chawia, mipite lak achun a tai luta, hipi chuh mite lak achun a leng pan hi tih a mu a, gimlim chuh a theh a, mipite ding chun sukthienthona a siem ta a.

⁴⁸ Chun, amah chuh mithi leh mihing kikala chun a dinga, hipi chuh a hai ta a.

⁴⁹ Tichun, Kora chungchâng thu a mithite sim loh in, a thi chengcheng chuh singkhat leh sangli leh zasagih ahiu hi.

⁵⁰ Hi leng a haih phet chun, Aron chuh puon-In kawtkhak a Mosi kawm a chun a chieh kit tai.