KISIMNA 14 - PATHIEN LEKHABU THIENGTHO (BSI)

Mipite Phunchiekna

¹ Tichun, mipite chuh ngeih tak in a kiko u a, zie zan chun mipite chuh zan khuo’n a kap tau hi.

² Chun, Mosi leh Aron kawm achun a phun tau a, Pathien in Aigupta gam akhan ei na sulum zaw mai leh aw, a hihloh leh, thalek akhan Pathien in ei na sulum zaw mai leh phazaw ding a,

³ Bang zieka Lalpa’n zie gam ahi chemzâm a thah a um ding leh I zi leh chateu hi galhing a mat dinga ei puihdawk ahi? Aigupta gama vaihkit chuh pha zaw lo ding ahim? ti’n a phunchiek tau a.

⁴ Tichun, a kiho u a, “Lawiupa ding tel hiting un, Aigupta gam ah vaikit hitiu,” a tiu a.

⁵ Khutichun, Mosi leh Aron chuh Israel chate kikhawm khawm haw chengcheng masang achun a bawkkhup uh a.

⁶ Chun, gam va entha te lak a Nun chapa Joshua leh Jephuneh chapa Kaleb chun a puon uh a bawtthêk u a;

⁷ Mipite kawm achun, “Ka va etthâk u a, ka va tawh suok u chuh gam phatak mai ahi.

⁸ I chung u a Lalpa a kipah chun zie gam achun ei pui intin, bâwngnawi leh khuoizu a luong gam chuh ei pie ngêi ina,

⁹ Lalpa chung ah kiphin kiu unla, zie gam mi haw chuh le kih cha diek kiu, I an ding chauh uh ahi ngâl u a; a kivenbit nau chuh lâkdawk ahi ta a, Lalpa chuh I kawm u ah a um a, amau chuh lau hiel kiu in” a tiu a.

¹⁰ Himahlele mipite chengcheng chun suong a sehlup zieng ding in a vau u a. Tichun, Israel chate kawm achun Lalpa lopina chuh kihona puon-In chung achun a hung kilang kit ta a.

Mipite dinga Mosi Pauchamna

¹¹ Tichun, Lalpa’n Mosi kawmah, “Zie mipite hin bang chan ahim ei muhsit u a, a lak u a thilmak ka hih sak sa ale bang chan ahim ei ginchak lah ding uh?

¹² Hipi’n gawt ing ka ting, sumang ing ka ting, nang hi amau haw sanga nam lien zaw leh thupi zaw a hun siem ding ka hi,” a ti a.

¹³ Chun, Mosi’n Lalpa kawmah, “Mipite hi Aigupta gam apat a na thilhih theihna a na puihdawk ahi a, Na mipite chunga na thilhih hi Aigupta mite’n a na he leu,

¹⁴ Zie gama chêngte hi hilh ding ahiu hi. Zie mipite hin, Lalpa chuh ka kawm u ah na um a, ka chung u a meipi a na um chuh a muu a, sun a meipi leh zan a meikuong a ka masang u a na chieh sek dante a mu vek ngâl u a.

¹⁵ Zie mipi haw hi na thah vek chun na minthanna hete nam haw chun,

¹⁶ ‘Lalpa chun zie mipite haw hi kipautiem a A tiem na gama chuh a puih theih loh ziekin thalek a a thah ahi ti’n gen kha’n au.

¹⁷ Na thilhih theihna chuh a kieng u a na tiemsa guolin hih piting dingin ka hun ngên hi.

¹⁸ Lalpa chuh lungchuol tak lungsietna hau, gitlohnate, sukkhelhnate ngaidam sek, mihelte gawt loh a kawih lo; pate gitlohna ziek a chate leh tute suon thumna leh suon lina tienga le gawt sek ahi,’ ti a na gen bang khan.

¹⁹ Na zahngaihna a nasat dungzui in leh Aigupta gama pata na puihdawk akipat tuni chan a na ngaihdam bang hin, mipi haw gitlohna hi ngaidam in,” a ti a.

²⁰ Chun, Lalpa chun, “Na nget bang chun ka ngaidam hi, a ti a.

²¹ Ahih ziekin, ka hin zing bang leh Lalpa lopi na’n lei a luoh dim bang hin, thu ka tiem hi,

²² Zie mipite lak ahin ka lopina leh Aigupta gama melchikna haw mu ngâla ei ginchak loh u a sawm vei hiel ei patep a, ka thu awilote lak ahin,

²³ a pileputeu kawma piek dinga ka kipautiem na gam achun mu puou intin, ei musitte chuh khat chale lut hiel puo’n au,

²⁴ Himahleh, ka suokpa Kaleb vang hi chuh, thagau dang nei a, ei zuih takzet ziekin, a mah hi chuh a va chiehna gam achun puilut ing ka ting, a suonte chun zie gam chuh luoh un au.

²⁵ Tuhin, Amalek te leh Kanaan te chuh luiphai achu a chên ziekun; kihei kit unla zing leh Akaba Tuipi San zawtna lama kihei in thalek lam zuon in kipandawk un,” a ti a.

Mipite Phunchiekna leh Gawtna

²⁶ Chun, Lalpa’n Mosi leh Aron chuh a hopih a,

²⁷ “Zie migilo kikhawmhaw ka chunga phunchiek sek haw hin bang chan ahim ei gensiet dinguh? Israel chate ka chunga a phunchiek na hawu chuh ka za ta ngâla.

²⁸ A kawm u ah hiti hin gen in, ‘A hin a ka hin zing bangin, Lalpa’n a tii, ka nakhang ngeia na gen bang tak un na chung u ah hih ing ka ting,

²⁹ na luong hawu chuh zie thalek ngêi ahin kithehzâk intin; kum sawmnih apat a chunglam kisimna a tel cheng leh ka chunga phunchiek cheng te tawh;

³⁰ Jephuneh chapa Kaleb leh Nun chapa Joshua tih loh chuh na chênna ding u a ka hun piek na gam achun khat chale lut hiel puo’n lau,

³¹ Amahvang chuh, na chateu chuh sala mat in um in au na tih hawu na chateu hi chuh puilut ing ka ting, na deihloh uh gam chuh chang un au.

³² Nang haw vang chuh zie thalek ahin na luongteu chuh kital lemlum ina.

³³ Chun, na chateu chuh thalek ah kum sawmli vakvai untin, a thih u a a beihmang masangsieh u chuh, ginna na neih loh ziek chun thuok unlau.

³⁴ Gam na va etthâknau ni sawmli chuh, ni khat chuh kum khat zela sim in, kum sawmli sung chuh na gitlohnau thawk lawh un na tin, tichun ka lung-awihloh na chuh hun he’n lau.

³⁵ Kei Lalpa hin, ei dodal a migilo kikhawmkhawmte chung achun ziehi hih ing ka, ka na ti ta a: zie thalek a hin beimang untin, zie tak achun thi’n au, Lalpa’n a tii’ tiu un” ti’n.

³⁶ Chun, gam entha dinga Mosi’n a sawl hung vaikit, gam chanchin aphalo lam chauh a gena, Mosi chunga mipi phunchiek sakte,

³⁷ Zie mite, gam chanchin a phalo lama hun gen haw chuh Lalpa masang ah hipi’n a thiu a.

³⁸ Gam entha dinga chiehte laka Nun chapa Joshua leh Jephuneh chapa Kaleb chauh chuh a dam tau hi.

Gam lak Guot Khatveina

³⁹ Chun, zie thu haw chengcheng chuh Mosi’n Israel te kawma a gen phet chun mipite chuh nasatak in a lungkham tau a.

⁴⁰ Khutichun zingkal matak in a tho u a, tângsip ah a kal to u a, “Zie hin ka um ui, Lalpa’n ei tiem nau gam achun chieh ung kau, ka na gilo tau ahi hi,” a tiu a.

⁴¹ Himahleh, Mosi chun, “Lalpa thupiek chuh bang zieka na ngaih loh zing uh ahim? Lawhting hiel puo’n lau.

⁴² Chieh to dah mai un, Lalpa na kawm u ah a um puoh a, na melmateu zawh dingin va kipielut kiu in.

⁴³ Tichun, Amalek te leh Kanaan te chun hun na kido pih un tin; chemzâm in hun that ding ahiu hi. Lalpa chuh na kiheimang san u a; a thu na zuih loh ziekun na kawm u a umlo ding ahi,” a ti a.

⁴⁴ Himahleh, Lalpa thuthun bawm leh Mosi chuh giehbuk apat kipandawk lo chun tânglam achun chieh a guo tei tei tau a.

⁴⁵ Khutichun, zie tânggam a um Amalek te leh Kanaan te chuh a hung suk u a, Hormah chan in a hun delh u a, a zo tau hi.