JOSHUA 8 - PATHIEN LEKHABU THIENGTHO (BSI)

Ai Khuo Lâkna leh Suksietna

¹ Chun, Lalpa’n Joshua kawmah, “Lau ki’n la, lungkie diek ki’n, galdo mi chengcheng na kawmah pui inla, kipan inla, Ai khuo ah chieh ah; Ai khuo lengpa leh a mite leh a khuo leh a gam chuh na khut ah ka hun pie tai.

² Jerikoh leh a lengpau chunga na hih bang khan Ai khuo leh a lengpau chung ah le na hih ding ahi; gâllâk leh ganchate mai chuh nanguh haw chan hi’n tin; khawpi chânggu ding a nung lam ah kawih in,” a ti a.

³ Khutichun Joshua leh galdo mi chengcheng chuh Ai khuo lama chieh ding chun a kipandawk tau a; Joshua chun, mihat hangsan singthum a teldawk a, zan in a sawldawk ta a.

⁴ A kawm u ah, “Ngaiun, khawpi nung lama khawpi do dingin chângguu in; khawpi apat a gamla taka chun chieh kiu unla, kisazo sa’n um zing un.

⁵ Chun, kei leh ka kienga um haw chengcheng hin khawpi chuh hun naih u’ng ka ting uh: chun hiti hi hi’n tin, tuma banga khah ei do ding a a hung pawt tieng u leh a masang u ah taisieu ung ka ting;

⁶ Tichun ei hun delh dingin hung pawt un tin, khawpi apat a gamla deuh a ka kidelh sak tieng u leh; amau chun, ‘tuma a bang khan I masang u ah a taisie kit tau hi,’ ti’n tin uh; tichun a masang u ah taisie’ng ka ting uh;

⁷ Chun, na chân guknau apat hung pawt un na tin, khawpi chuh la ding na hiu hi; Lalpa na Pathien un na khut u ah hun pie ding ahi.

⁸ Chun, hiti hi hi’n tin, khawpi chuh na lak tieng u leh, khawpi chuh hâl un; Lalpa’n thu a hun piek bang zelin na hih dinguh ahi. Ngaiun, thu ka hun piek na hiu hi,” ti’n thu a pie a.

⁹ Khutichun Joshua’n a sawldawk ta a, a chân gukna ding mun achun a chieh u a, Ai khuo tumlamah Bethel leh Ai khuo kikal achun a ngak tau a, Joshua chu vang zie zan chun mipite lak achun a giek hi.

¹⁰ Chun, Joshua chuh zingkal matak in a tho a, mipite chuh a kaikhawm a, amah leh Israel upate chu tawh mipite masang achun Ai khuo lam ah a chieh to tau a;

¹¹ Chun, a kawma galdo mi chengcheng chu tawh khawpi lutna lam achun a chieh to u a, Ai khuo mâllam pang achun a giek u a, Ai khuo tawh a kikal u ah chun guom a um hi.

¹² Chun, mi sangnga vel a pui a, khawpi tumlam pang Bethel leh Ai khuo kikal achun a chân gûk sak a.

¹³ Khutichun khawpi mâllam panga sepaihte panmun leh khawpi tumlam panga a chânggute panmun chuh a guo tûp a; chun, Joshua chuh zie zan chun guom achun a giek a.

¹⁴ Chun, Ai khuo lengpa chun Joshua leh a mite chuh a muh phetin kinlebuong in zingkal matak in a tho a, zie khawpi mite chuh amah leh a lawite chengcheng tawh, a mun guot Arabah zawn achun Israel te do dingin a pawt tau a, himahlele khawpi nung lam achun amah do dingin a chângguu hi tih a he puou a.

¹⁵ Chun, Joshua leh Israel te chengcheng chuh a taisie bang takin, gamthip lampi lam ah a tai u a.

¹⁶ Chun, khawpi a um chengcheng chuh amau haw delh dingin a kisam khawm u a; tichun Joshua chuh a delh u a, khawpi apan chun gamla deuh ah a taidawk tau a.

¹⁷ Chun, Ai khuo a mite leh Bethel khuo a mite chuh Israel te delh lo khat chale a um ta puou a; khawpi chuh khâk lo in a pawtsan u a, Israel te chuh a delh tau a.

¹⁸ Chun, Lalpa’n Joshua kawmah, “Na tiengcha chawih kha Ai khuo lam nga’n tungdawk in; na khut a hun pie ding ka hi,” a ti a. Tichun Joshua chun a tiengcha chawih chuh khawpi lam nga’n a vak tungdawk ta a.

¹⁹ Chun, a chânggute khah a umnau apat chun kintakin a hung pawt u a, a khut uh a hun tung u a, khawpi achun a lut u a, a la tau a; chun khawpi chuh a hâl pai tau hi.

²⁰ Chun, Ai khuo mite’n a nung lam u chuh a vak et u leh, ngaitie khawpi chuh meikhu van lama khu to vuohvuoh in a mu tau a, a khawilam lam ale taih theihna a nei ta puou a;

²¹ Joshua leh Israel te chengcheng a chânggute’n khawpi a lâk u a, khawpi a meikhu chieh to vuohvuoh a vak muh u chun a vaikit u a, Ai khuo mite chuh a that tau a.

²² Chun, khawpi sunga Israel chate um haw chuh a hung pawt u a, a hung do pih tau a. Khutichun Ai mite chuh a lai tak ah ûmchintuoh in a um tau a, abang a langkhat ah a um u a, abang a lehlam ah; tichun a that tau a, khat chale sit leh thahdawk mawngmawng a nei puou hi.

²³ Chun, Ai khuo lengpa chuh a hing in a man u a, Joshua kawmah a pui u a.

²⁴ Chun hiti hi ahi a, Israel te chun Ai khuo mite gamlak a um chengcheng chuh gamthip lama a va delh nau a a thah zawh u a, a bawn u a chemzâm a a thah chimit suok nung u chun, Israel te chengcheng chuh Ai khuo lam ah a vaikit u a, chemzâm in a va do u a.

²⁵ Chun, zie ni a Ai khuo mi a thah chengcheng chuh anu-apa’n singkhat leh sangnih ahiu hi.

²⁶ Chun, Joshua’n a tiengcha tundawkna khut chuh Ai mite chengcheng a sukmangthai macheng chun a latha diek puoi.

²⁷ Lalpa’n Joshua thu a piek a, hih ding a tih bang tak khan zie khawpi a ganchate, leh gâllâkte mai chuh Israel te chun amau haw chanvo dingin a la tau hi.

²⁸ Khutichun Joshua’n Ai khuo chuh a hâl a, kumlekhuo a dingin a sumang ta a. Tuni tiengin zie guol mah chun a um den tai.

²⁹ Chun, a lengpa chuh nitâk tiengin thinglek ah a khâi a. Ni tum ding kuon in Joshua’n thu a pie a, tichun a luong chuh thinglek apat a lathau a, khawpi kulh kawtkhak lutna ah a paih u a. A chung achun suong a sieh vum u chuh tuni tieng in a um nalai hi.

Vangsakna leh Hansie

³⁰ Chun, Joshua’n Ebal tângah Lalpa, Israel Pathien a ding in maichâm a siem a,

³¹ Mosi dân lehkhabu a zik bangin Lalpa suok Mosi’n Israel chate thu a na pieksa bangin, suong sêk loh, kuomah in thik ale a sukkhak ngeiloh mang in maichâm a siem a; zie tak achun Lalpa a dingin hâlmang thillat haw a lân a, chamna kithawihna’n a kithawi u a.

³² Chun zie tak achun Joshua’n Israel chate mitmuh ngêi ah Mosi’n ana zik khah suonghaw achun a zik sawn a.

³³ Chun, Israel chate chuh, a upateu, a lawiupateu, a vaihawmteu leh a lak u a gamdang mite chu tawh Lalpa Thugawlh bawm zawn te masang a chun, bawm pang tuok achun, Levi chi Thiempute chu tawh kimaingat in a ding u a. A kimkhatte chuh Gerizim tâng pang ah a um u a, akimkhatte chuh Ebal tâng pang ah a um u a; Lalpa suok Mosi’n Israel te’n vangsakna a neih ding phat u leh zie tawbang a hi hih dingin thu a piek masak ahi.

³⁴ Chun, zie zawh chun Dan thu chengcheng, vangsakna thu leh hansie lawhna thu chengcheng chuh, dân lehkhabu a kizik bang tak chun a sim dawk a.

³⁵ Mosi thupiek chengcheng chuh Israel te kikhawm khawm chengcheng leh, numeite leh naupang neucha chate leh a lak u a nam dangte zak achun Joshua’n simloh mawngmawng a nei puoi.