JOSHUA 7 - PATHIEN LEKHABU THIENGTHO (BSI)

Akan Gitlohna leh Gawtna

¹ Himahleh Israel chate chun thilzek achun thil a sukhiel tau a; Juda phung a Zerah chapa Zabdi chapa Karmi, zie pa chapa Akan chun thilzek chuh a na la ta a, tichun Israel te chung achun Lalpa a lungna ta a.

² Chun, Joshua’n Jerikoh khuo a pat in Bethel suohlam Beth-aven kawma Ai khuo achun mi a sawl a, a kawm u ah, “Va chieh unla, gam hun en tiem u,” ti’n a gen a. Chun, mite chuh a va chieh to u a, Ai khuo chuh a va enthau a.

³ Chun, Joshua kawmah a vaikit u a, a kawmah, “Mi chengcheng in va do khel ngai puo’n a; mi sangnih ahim, sangthum ahim sawl inla, Ai khuo chuh do u hen; mi chengcheng va kisukchawl khel ngai puo’n a; khawpi neucha ahi ngâl a,” a tiu a.

⁴ Khutichun mipi lak ah mi sangthum ahim vel zie tak achun a va chieh u a, chun, Ai khuo mite masang achun a hung taisie tau a.

⁵ Chun, Ai khuo mite chun kulh kawtkhak bul apat in Sebarim tieng hiel in a delh u a, mi sawmthum leh gup a that u a, tichun Israel chate lunggil chuh a tui zo a, tui bang mai a hung hi tau a.

⁶ Chun, Joshua chun a puonhaw a bawtthêk a, Lalpa bawm masangah amah leh Israel upate chuh a mai u a lei si’n nitâk tiengin a khupbawk u a; a lu chung u ah leivui a buok u a.

⁷ Chun, Joshua chun, “Aw Lalpa Pathien! Bang zieka Amor te khut a piek dinga Jordan nei puih kaih ahim? Jordan gâl lehlam a khan lung-awi takin a na um hi mai leng un!

⁸ Aw Lalpa, hiti a melmate delh a Israel te a taihsiet tâk mai u hi bang ka lawh ta die?

⁹ Kanaan te leh zie gama um chengcheng te hin heu untin, ei hun ûm untin, lei apat hin ka min uh hihmang kei ding ahiu hi; na min lopi tak hi bangti’n na hih ta die?” a ti a.

¹⁰ Chun, Lalpa chun Joshua kawmah, “Tho in, bang dinga khutia kha bawk zing na him?

¹¹ Israel te hin thil a hihkhiel uh ahi; ka thugawlh zawp dinga thu ka piek kha a bawhsieu a; thil thienglo kha a lau a ahi; gûk le a gu a, sel le a selguu a, a thuomphuo lak ngêi u ah a selguu hi.

¹² Zieziekchun a puo Israel chate’n a melmateu a zawh theih loh u kha, thil thienglo ana khawih tâk ziekun ahi melmate masang a a taihsiet uh; thil thienglo chuh na lak u apat a na sukbeih phawt loh u chun na lak u a hin um ta puo’ng ka.

¹³ Tho inla, mipite hi hih thiengtho phawt in, chun, a kawm u ah, ‘Zing a dingin kihihthiengtho un, Lalpa Israel Pathien in, Aw Israel haw, na lak u a hin thil thienglo a um hi, na lak u a thil thienglo hi na lâkdawk macheng un na melmateu hi zo thei puo’n lau.’

¹⁴ Khutichun, zing leh a chi a chi a na hung kilat dinguh ahi: chun, hiti hi hi’n tin, Lalpa’n kuo chi hileh a matdawk phawt chuh a nam nam a na hung kilat dinguh ahi; chun, Lalpa’n zie nam apat a mat pên chuh a inkuon a inkuon a na hung kilat kit dinguh ahi; chun,Lalpa’n inkuon a a matdawk te chuh a mimal a mimal a na hung kilat kit ding uh ahi.

¹⁵ Chun, hiti hi hi’n tin, kuole thil thienglo thil a na la tapoh chuh amah leh a neih chengcheng mei a hâltum suok ding hi’n a: Lalpa thugawlh a bawhsiet ziek in leh, Israel te laka thil gilo ngawlhuoi tak a hih ziekin, a tii, hun ti’n,” a ti a.

¹⁶ Khutichun Joshua chuh zingkal matak in a tho a, Israel te chuh a chi a chi’n a hun kilat sak a; chun, Juda chi chuh mat a hi tau a.

¹⁷ Chun, Juda chite chuh a hun kilat sak kit a; Zerah chi te chuh a hun man kit a; Zerah te inkuon chuh a mal mal in a hun kilat sak kit a; Zabdi chuh mat ahi a.

¹⁸ Chun, a inkawte chuh a mal a mal in a hun kilat sak kit a; tichun Juda nam a mi Zerah chapa Zabdi, zie pa chapa Karmi, zie pa chapa Akan chuh mat a hung hi tai.

¹⁹ Chun, Joshua chun Akan kawmah, “Ka chapa, Lalpa Israel te Pathien chuh pakchah aw; a masang a chun kiphuong mai in; na thilhih chuh ei hilh inla; ka kawmah hin îm hiel ki’n,” a ti a.

²⁰ Chun, Akan in Joshua chuh a dâwng a, a kawmah, “Lalpa Israel te Pathien chung achun thil ka na hihkhiel tai, ka thilhih chuh ziehi ahi:

²¹ Gâllâk laka van Babulon gam puon phatak leh, dangka sekel zanih leh, sana tang sekel sawmnga bûk ka mu a, ka deih bêka ka na la ta mai hi; ngaitie, ka puon-In sunga lei a selguk ahi a, a nuoi ah dangka chuh a um hi,” a ti a.

²² Khutichun, Joshua’n mite chuh a sawl a, puon-In sung achun a va tailut u a; a puon-In achun selguk ana hi ngût a, anuoi achun dangka chuh a um a;

²³ Tichun puon-In sung apat chun a la dawk u a, Joshua leh Israel chate chengcheng kawm achun a hun chawi u a; chun, amau chun Lalpa masangah a kawih u a.

²⁴ Chun, Joshua leh Israel te chengcheng chun Zerah chapa Akan chuh dangka te, puon te, sana tang te, chapate, a chanute, a bâwngchal te, a sabiltungte, a belamte, a puon-In te leh a neih chengcheng chu tawh a pui u a; Akor guom ah a puito u a.

²⁵ Chun, Joshua’n “Bangati a kei uh ei sulungkham na him? Lalpa’n tuni hin nang le hun sulungkham ding ahi,” a ti a, tichun Israel te chengcheng chun amah chuh suongin a sep lum u a; a neih chengcheng u leh a inkuon pihte chuh mei in a hâltum suok tau hi.

²⁶ Chun, a chung achun suong a tieng vum u a, tuni tiengin a um nalai hi; chun Lalpa’n a lungnatna nasatak chuh a kiheisan ta a, khutichun zie mun min ding chun Akor guom a tiu a, tuni tieng hin Akor guom tih ahi tai.