JOSHUA 6 - PATHIEN LEKHABU THIENGTHO (BSI)

Jerikoh Kulh Suksietna

¹ Chun, Jerikoh kulh kawtkhak chuh Israel chate ziekin a kikhak chak kêi a: kuomah a pawt puou a, kuomah a lut diek puou hi.

² Chun, Lalpa’n Joshua kawmah, “Entie, Jerikoh leh a lengpau leh a mihat hangsante hi na khut ah ka hun pie tai.

³ Chun, galdo mite chengcheng hin khawpi hih kimvel in khatvei na chieh kimvel dinguh ahi. Khutibang chun ni gup na bawl dinguh ahi.

⁴ Chun, thiempu sagih in Thugawlh bawm masang lam ah belamchal ki pengkun sagih chawi untin, chun, a ni sagih ni chun khawpi chuh sagih vei kimvel suok un na tin uh, chun, thiempute’n pengkun chuh mût un au.

⁵ Chun, hiti hi hi’n tin, belamchal ki a mût git phat u a, pengkun gi na zak tieng u leh, mipi chengcheng ngeih tak in kiko u hen; tichun khawpi kulh chuh chim gui gui intin, mipite chuh amau mazawn chiet ah chun lut to un au,” a ti a.

⁶ Chun, Joshua chun thiempute chuh a sama, a kawm u ah, “Thugawlh bawm hi zawn unla, thiempu sagih in Lalpa bawm masang lam a chun belamchal ki pengkun sagih chawi u hen,” a ti a.

⁷ Chun, amah chun mipite kawm achun, “Chieh zel unla, khawpi chuh kimvel suok un, chun, kigalthuom haw kha Lalpa bawm masang lam ah chieh zel u hen,” a ti a.

⁸ Khutichun Joshua’n thu a piek guol chun, Lalpa thugawlh bawm masanga belamchal ki pengkun sagih chawi thiempu sagih te a chieh zel u a, pengkun a mût u a: Lalpa thugawlh bawm in a zui a.

⁹ Chun, kigalthuomhaw chuh pengkun mût thiempute masang achun a chieh u a, a nungdalte chun bawm chuh a zawn u a, thiempute chun chieh kawmin pengkun a mût zel u a.

¹⁰ Chun, Joshua’n mipite chuh, “Kiko ding thu ka hun piek masang in kiko kiu unla, pau le pau kiu un,” ti’n thu a pie a.

¹¹ Khutichun Lalpa thugawlh bawm chuh khawpi kimvel in khatvei a kimvel pih u a; chun, giehmun achun a chieh u a, giehmun achun a giek kit tau a.

¹² Chun, Joshua chuh zingkal matak in a tho a, thiempute chun Lalpa thugawlh bawm chuh a zawn u a.

¹³ Lalpa thugawlh bawm masang achun belamchal ki pengkun sagih chawi thiempute sagih kha a chieh zel u a, pengkun a mût u a; chuleh, kigalthuom haw chuh a masang u ah a chieh zel u a; a nungdalte chun Lalpa bawm a zawn uh a, thiempute chun a chieh kawm un pengkun a mût zel u a.

¹⁴ Chun, a ni nih ni chun khawpi chuh khatvei a chieh kimvel suok kit u a, giehmun achun a vaikit u a; khutibang chun ni gup sung a hih u a.

¹⁵ Chun, hiti hi ahi a, a ni sagih ni chun zingkal matak in a tho u a, ahih dân ngeina bangun sagih vei a kimvel suok u a: zie ni zieng chun khawpi chuh sagih vei a kimvel suok u a.

¹⁶ Chun, hiti hi ahi a, a sagih veina a thiempute’n pengkun a vak mût u chun Joshua’n mipite kawmah, “Kiko un, Lalpa’n khawpi hi a hun pie tai.

¹⁷ Khawpi leh a sunga thil um chengcheng hih Lalpa kawma piek ahi tai; Rahab nawhchizuoknu leh a In a a kawma um haw cheng vang chuh hing hawih ding ahi, I mi sawlteu kha ana selguk ziekin.

¹⁸ Nanguh vang chuh thil zek lak achun kikiengkawih kêi un, khutilochun thil zek chuh la kha’n lau, chun, Israel te giehmun ah hun chawi un na tin uh, buoina leh lungzînna tun sak kha’n lau.

¹⁹ Chun, dangkaguote, sanate, sumeng leh thik belte vang chuh Lalpa chanvo ahi suok kêi hi; Lalpa sum in a kawih ding ahi,” a ti a.

²⁰ Khutichun, mipite chuh a kiko u a, thiempute chun pengkun chuh a mût u a, mipite chun zie chuh a zak phet un ngeih tak in a kiko zuoh zuoh u a, chun kulh bâng chuh a chim ta a. Tichun mipite chuh amau mazawn chiet achun a chieh to u a, khawpi achun a lut u a, khawpi chuh a la tau a.

²¹ Chun, khawpi sunga mi chengcheng, numei leh pasal, a têk a khang leh bâwngchal haw, belam haw, sabiltung haw tawh chemzâm in a that suok kêi u a.

²² Chun, Joshua’n mi nih gam va enthate kawm achun, “Nawhchizuoknu In akhun va lut unla, a kawma na kipautiem bang u khan, zie numei chuh a neih chengcheng tawh va puidawk un,” a ti a.

²³ Khutichun entha tangvalte chuh a va lut u a, Rahab tawh, a pa tawh, a nu tawh, a suohpihnu tawh, a neih chengcheng te chu tawh a va puidawk u a, a inkuonpih a unau chengcheng le a va puidawk u a; Israel te giehmun pawlam ah a um sak tau a.

²⁴ Tichun, khawpi chuh a sunga thil um chengcheng pum in mei in a hâltum u a; dangkaguo haw, sana haw, sumeng haw leh thik bel haw mai chuh Lalpa sumbawm ah a kawih tau hi.

²⁵ Amahvang chuh Rahab nawhchizuoknu leh a neih chengcheng leh a pa inkawte chuh Joshua’n a hing hawih suok a; tichun Israel te lak ah chun tuni tiengin ana tel zing tau hi; Joshua’n Jerikoh khuo entha dinga a mi sawlte kha ana selguk ziekin.

²⁶ Zie hun lai chun Joshua’n, “Zie Jerikoh khawpi hun tungdawk kit taphawt chuh Lalpa masangah hansie dawl in um hen; a cha masapen in a suongphum chuh lem intin, a chapa neupen in a kulh kawtkhak te chuh tungdawk in a,” ti’n amau chuh a vau a.

²⁷ Khutichun Lalpa chuh Joshua kawmah a um a; chun, a gam pumpi achun a min a hung thang ta a.