JOSHUA 5 - PATHIEN LEKHABU THIENGTHO (BSI)

Gilgal a Zektanna

¹ Chun, hiti hi ahi a, Jordan lui gal tumlam a um Amor lengte chengcheng leh tuipi panga um Kanaan te lengte chengcheng chun a kaih macheng u chun Lalpa’n Jordan tui haw chuh Israel chate masang achun a hihkang hi tih a na het un, Israel chate ziek chun a lunggilteu a tui zo ta a, lungkie lo himhim a um ta puou hi.

² Chun, zielai chun Lalpa’n Joshua kawmah, “Meisuong chemcha siem inla, Israel chate hi a zek uh, a nih veina tan sak in,” a ti a.

³ Khutichun, Joshua’n meisuong chemcha chuh a siem a, Israel chate chuh a zek vun mawng uh a tan sak tai.

⁴ Chun, Joshua’n a zek uh a tan ziek chuh ziehi ahi: Aigupta gam apat a hung pawt haw chengcheng, pasal galdo mite chengcheng kha Aigupta gam apat a a hung pawt nung u khan lamkal ah gamthip a khan a thi zo tau a.

⁵ Aigupta gam apat a pawt haw kha zek tansa ahiu a: amahvang chuh Aigupta gam apat a a pawt uh a gamthip a lamkal a piengte chengcheng kha zektan loh ahih ziekuh ahi.

⁶ Lalpa aw a ngaihthak nawp loh ziek u a mipi haw chengcheng, Aigupta gam apat hung pawt galdo mite na tieng a hih mangthai a a um suok tiengun Israel chate chuh gamthip ah kum sawmli zet a vak a vak u a: Lalpa’n a suonteu haw kawm a bâwngnawi leh khuoizu a luonna gam kipautiem a ei piek uh a na tiem kha, zie gam chuh mu lo dingin Lalpa’n a kawm u ah a kipautiem ahi.

⁷ Tichun a suonteu amau haw thasang a a tundawk chuh Joshua’n a zek uh a tan sak a: lamkal a khah a zek uh tan ahih loh ziek un, zektan loh ana hi zing ngâl u a.

⁸ Chun, hiti hi ahi a, mipite chengcheng zek a tan zawh u chun, a dam macheng u chun a giehmun u ah amau umna chiet achun a um u a.

⁹ Chun, Lalpa’n Joshua kawmah, “Tuni hin suok na hih ziek u a Aigupta te muhsitna cheng chuh nanguh apat in ka lamang tai,” a ti a. Khutichun zie mun chuh tuni tieng in Gilgal tih ahi tai.

¹⁰ Chun, Israel chate chuh Gilgal a a um sung u chun, zie tha, ni sawmleli ni chun Chiehkân Kut a mang u a.

¹¹ Chun, Chiehkân Kut zawh zing kit chun Kanaan gam a buh chângthâk chawl sawhloh leh kan thawh chuh a neu a.

¹² Chun, zie gam a buh a nek zingkal u a kipat chun manna chuh a kie ta puoh a; Israel chate chun manna chuh a mu kit diek ta puou a; tichun, zie kum chun Kanaan gam a buh leh bâl chuh a sên tau hi.

Joshua leh Chemzâm Chawipa

¹³ Chun, hiti hi ahi a, Joshua chuh Jerikoh khuo kawm a a um lai chun a khawdak a, a enviel a, chun, ngaitie, a masang cha achun mi khat a chemzâm zuk dawksa chawi a ana ding zing a mu a: a vak zuon a a kawmah, “Kei uh lama pang na him, ka melmateu lama pang?” a ti a.

¹⁴ Chun, amah chun, “Hilo e, Lalpa sepaihte lawiupa a hung ka hi zawi,” a ti a. Tichun Joshua chuh lei ah a khupbawk a, chibai a bûka, a kawmah, “Ka Lalpa’n a suok kawm ahin bang ahim gen ding a neih chuh?” a ti a.

¹⁵ Chun, Lalpa sepaihte lawiupa chun Joshua kawmah, “Na kêngpêk apat in na kengtawbek kha sut in; na dinna mun kha a thiengtho ahi,” a ti a. Chun, Joshua chun khutibang chun a hih ta a.