JOSHUA 4 - PATHIEN LEKHABU THIENGTHO (BSI)

Gilgal a Suong Sawmlenih

¹ Chun, hiti hi ahi a, Israel nam pumpi chuh Jordan lui a kaih suok kêi nung u chun Lalpa’n Joshua kawmah,

² “Mipite laka pan hin mi sawmlenih, phung tina mi khat zel teldawk inla,

³ a kawm u ah, ‘Jordan lui lai a, thiempute dinna lai taka suong khu sawmlenih puphei unla, giehmun, tuzan a na giehna ding u ah kawih un,’ ti’n thu pie’n,” ti’n a gen a.

⁴ Tichun Joshua chun Israel chate laka mi sawmlenih, phung tina mi khat zel a teldawkte chuh a sama,

⁵ a kawm u ah, “Lalpa na Pathien uh bawm masanga khan Jordan lui lailung ah chieh unla, Israel chate phung dungzui zelin, mitin in suong khat chiet na liengko un puu un.

⁶ Tichun ziehaw hi na lak u ah melchikna hung hi ding ahi a, tunung leh na chateu in, ‘Zie suonghaw hi bang etsakna ahi?’ ti a a hun dawt tieng u leh,

⁷ nangun a kawm u ah, ‘Lalpa thugawlh bawm masangah Jordan tui haw chuh a hung kang ta a; Jordan a kân lai in, Jordan lui tui haw chuh a hung kang a; tichun zie suonghaw hi Israel chate’n kumlekhuo a hetzingna ding ahi,’ na hun tih dinguh ahi,” a ti a.

⁸ Tichun, Israel chate chun Joshua’n a thupiek bang chun a hih u a, Israel chate phung zah, Jordan lui lai a suong sawmlenih a lau a; a giekna mun u ah a puphei u a, zie tak achun a kawih tau a.

⁹ Chun, thugawlh bawm zawn thiempute dinna lai tak, Jordan lui lai achun Joshua’n suong sawmlenih a phut a; ziehaw chuh tuni tiengin a um zing nalai hi.

¹⁰ Chun, Mosi’n chun Lalpa thupiek bang taka mipite kawma hih dinga Joshua thu a piek chuh a hih zawh suok kêi mau chun thiempu bawm zawn te chuh Jordan lui lai achun a ding zing u a; tichun mipite chuh a kinawh u a, a galkai tau a.

¹¹ Chun, hiti hi ahi a, mipi chengcheng chuh a galkaih zawh kêi phat u chun Lalpa bawm zawn thiempute chuh mipite masang achun a chieh tau a.

¹² Chun, Reuben suonte, Gad suonte, Manasseh nam kimkhatte chuh Mosi’n a kawm u a a na gen tâk bang khan Israel chate masang achun kigalthuom zo sa’n a galkai u a.

¹³ Tichun, gâlthuom a kithuom zo sa’n mi singli vel kido dingin Jerikoh phaizawl achun Lalpa masangah a galkai u a.

¹⁴ Zie ni chun Lalpa’n Joshua chuh Israel te chengcheng mitmuh achun a limbawl a; Mosi a kihchak mah bang u khan a damsung cheng chun a kihcha tau hi.

¹⁵ Chun, Lalpa’n Joshua kawm achun,

¹⁶ “Thiempute, thugawlh bawm zawnte kha Jordan lui apat hung pawt ding in thu pie’n,” a ti a.

¹⁷ Khutichun Joshua’n thiempute chuh, “Jordan lui apat chun hung pawt tau in,” ti’n thu a pie a.

¹⁸ Chun, hiti hi ahi a, thiempute, Lalpa thugawlh bawm zawn te chuh Jordan lui apat a hung pawt u a, a keng u a lui pang a hun tawh phet un, Jordan tui haw chuh a luon ngeina bangin a luong kit a, masanga bang khan a kuong chengcheng achun a luong let kit ta a.

¹⁹ Chun, tha khatna, ni sawm ni chun mipite chun Jordan lui a kân u a, Jerikoh suohlam panga Gilgal ah giehmun a guonggalh tau a.

²⁰ Chun, suong sawmlenih, Jordan lui apat a put dawk u chuh Joshua’n Gilgal achun a phut a.

²¹ Chun, Israel chate kawm achun, “Tunung a na suonteu in a pateu, ‘Zie suonghaw hi bang etsakna ahi?’ ti a a hun dawt tieng u leh,

²² ‘Israel te chun Jordan lui hi leichak ah a chieh kai uh ahi,’ ti a na suonteu chuh na hun hetsak dinguh ahi.

²³ Lalpa na Pathien un, Tuipi San ka galkaih macheng uh a a na hihkang bang khan, Lalpa na Pathien un Jordan lui hi na kaih macheng un na masang u ah a hihkang ahi tai.

²⁴ Leichung a namtin chengin Lalpa khut hi a na hât ahi tih a het theih u a, Lalpa na Pathien u chuh kumlekhuo a a kihchak theihna dingun,” ti’n a gen a.