JOSHUA 21 - PATHIEN LEKHABU THIENGTHO (BSI)

Levi te Khawpihaw

¹ Tichun, Levi chi inkuon lawiupate chuh thiempu Eleazar kawm leh Nun chapa Joshua kawm leh Israel chate inkuon lawiupa haw kawm achun a va chieh u a;

² Kanaan gam a Shiloh khuo achun, “Lalpa’n Mosi mang in I chênna dinguh khawpi haw leh I gancha tatna dinguh ei pie dingin thu a na pie ta a puo,” ti’n a gen u a.

³ Khutichun Israel chate chun Lalpa thupiek bangin a chanvo uh apat inkuon lawiupate chuh a gancha tatna mun hawu tawh Levi chite a pieu a.

⁴ Chun, phunsân chuh Kohath mite inkuon chungah a kie ta a; tichun thiempu Aron suon Levi chi a mite chun phunsân in, Juda phungte chanvo apat, Simeon te chanvo apat leh Benjamin te chanvo apat in khawpi sawmlethum a chang ui.

⁵ Chun, Kohath suon dangte chun phunsân in, Ephraim suonte chanvo apat. Dan namte chanvo apat leh Manasseh nam kimkhat chanvo apat in, khawpi sawmlethum in a chang ui.

⁶ Chun, Gershon suonte chun, phunsân in Issakar suonte apat, Aser nam chanvo apat, Naphtali namte chanvo apat leh Bashan gama Manasseh nam kimkhatte chanvo apat in, khawpi sawmlethum a chang ui.

⁷ Chun, Merari suonte chun a inkuon dungzui zelin Reuben nam chanvo apat, Gad phung chanvo apat, Zebulun nam chanvo apat in khawpi sawmlenih a chang ui.

⁸ Tichun, Israel chate chun phunsân in, Lalpa’n Mosi mang a thu a piek bang khan Levi mite chuh khawpi haw leh a gancha tatna mun haw chuh a pieu hi.

⁹ Chun, zie khawpi amin kigen haw hih, Juda suonte chanvo apat leh Simeon nam suonte chanvo apat chun a pieu hi.

¹⁰ Ziehaw chuh Levi suonte, Kohath mi inkawte, Aron suon haw a ding ahi; phunsân chuh a chung u ah a kie masapen a.

¹¹ Chun, Juda thingtâng gama um Hebron khawpi neitu Anak pa Arba khawpi chuh a gancha tatna haw tawh a pie tau hi.

¹² Himahleh, khawpi kiengvel haw leh a khawpel haw chu vang Jephuneh chapa Kaleb chanvo dingin a pieu hi.

¹³ Khutibang chun, thiempu Aron suonte chuh, Libnah leh a kimvela gamte tawh mithatte kihumbitna khawpi dingin Hebron a pieu hi.

¹⁴ Chun, Jattir khuo a gancha tatna haw tawh, Eshtemoa khuo a gancha tatna haw tawh,

¹⁵ Holon khuo a gancha tatna mun haw tawh, Debir khuo a gancha tatna mun haw tawh,

¹⁶ Ain khuo a gantatna mun haw tawh, Juttah khuo a gancha tatna mun haw tawh, Beth-shemesh khuo a gancha tatna mun haw tawh; zie phungte nih chanvo apat khawpi kuo chuh a pieu a.

¹⁷ Chun, Benjamin te chanvo apat chun Gibeon khuo a gancha tatna mun haw tawh, Geba khuo a gancha tatna mun haw tawh,

¹⁸ Anathoth khuo a gancha tatna mun haw tawh, Almon khuo a gancha tatna mun haw tawh; khawpi lite chuh a pie a.

¹⁹ Aron suon thiempu haw khawpi chengcheng chuh khawpi sawmlethum a gancha tatna mun haw tawh.

²⁰ Chun, Kohath suonte, inkuon, Levi te, Kohath suon dang te chuleh a chanvo uh khawpi haw chuh Ephraim te chanvo apat in a muu a.

²¹ Chun, tuolthatte kihumbitna khawpi Ephraim tâng gama Shekem chuh a gancha tatna mun haw tawh, Gezer khuo a gancha tatna mun haw tawh,

²² Kibzaim khuo a gancha tatna mun haw tawh, Beth-horon khuo a gancha tatna mun haw tawh, khawpi haw li a pieu a;

²³ chun, Dan te chanvo apat Eitekeh khuo a gancha tatna mun haw tawh, Gibbethon khuo a gancha tatna mun haw tawh,

²⁴ Aijalon khuo a gancha tatna mun haw tawh, Gath-rimon khuo a gancha tatna mun haw tawh, khawpi li,

²⁵ Manasseh nam kimkhatte chanvo apat Taanak khuo a daikieng haw tawh, Gath-rimon khuo a gancha tatna mun haw tawh, khawpite nih.

²⁶ Kohath suon dang te phung khawpi haw chengcheng chuh khuo sawm ahi, a gancha tatna mun haw tawh.

²⁷ Chun, Gershon suonte, Levi phung te chuh Manasseh phung kimkhatte chanvo apat, tuolthatte kihumbitna khawpi Bashan gama Golan chuh a gancha tatna mun haw tawh, Be-eshterah khuo a gancha tatna mun haw tawh, khawpi nih a pieu a;

²⁸ chun, Issakar phung chanvo apat Kishion khuo a gancha tatna mun haw tawh, Deberath khuo a gancha tatna mun haw tawh,

²⁹ Jarmuth khuo a gancha tatna mun haw tawh, Engannim khuo a gancha tatna mun haw tawh, khawpi li;

³⁰ Aser nam chanvo apat Mishal khuo a gancha tatna mun haw tawh, Abdon khuo a gancha tatna mun haw tawh,

³¹ Helkath khuo a gancha tatna mun haw tawh, Rehob khuo a gancha tatna mun haw tawh, khawpi li;

³² chun Naphtali chanvo apat mi thatte kihumbitna khawpi Galili gama Kadesh chuh a gancha tatna mun haw tawh, Hamothdor khuo a gancha tatna mun haw tawh, Kartan khuo a gancha tatna mun haw tawh, khawpi haw thum ahi.

³³ Gershon mite a inkuon uh bang zel a a chanvo uh khawpi haw chengcheng chuh khawpi sawmlethum ahi, a gancha tatna mun haw tawh.

³⁴ Chun, Merari suonte inkuon, Levi te dang haw chuh Zebulun phung te chanvo apat Jokneam khuo a gancha tatna mun haw tawh, Kartah khuo a gancha tatna mun haw tawh,

³⁵ Dimnah khuo a gancha tatna mun haw tawh, Nahalal khuo a gancha tatna mun haw tawh, khawpi li ahi.

³⁶ Chun Reuben phung te chanvo apat Bezer khuo a gancha tatna mun haw tawh, Jahaz khuo a gancha tatna mun haw tawh,

³⁷ Kedemoth khuo a gancha tatna mun haw tawh, Mephaath khuo a gancha tatna mun haw tawh, khawpi li;

³⁸ Chun, Gad phung te chanvo apat, mi thatte kihumbitna khawpi, Gilead gama Ramoth khuo a gancha tatna mun haw tawh, Mahanaim khuo a gancha tatna mun haw tawh,

³⁹ Heshbon khuo a gancha tatna mun haw tawh, Jazer khuo a gancha tatna mun haw tawh, a bawn in khawpi li ahi.

⁴⁰ Ziehaw chengcheng chuh inkuon dang te Merari beh haw a inkuon uh bang zela a khawpi haw chuh ahi; tichun a chanvo u chuh khawpi sawmlenih ahi.

⁴¹ Chuleh, Israel suonte chanvo apat Levi te khawpi chengcheng chuh khawpi sawmli leh giet ahi, a gancha tatna mun haw tawh.

⁴² Zie khawpi haw chun a kimvel ah gancha tatna mun a nei chiet u a; khawpi chengcheng chuh khutibang chuh a hi vek hi.

Israel Chate Gam Luohna

⁴³ Khutichun, Lalpa’n a suonteu kawma kipautiema piek a na tiemna gam chengcheng chuh Israel chate chuh a pie a; tichun gam chuh a luoh u a, a chêng tau hi.

⁴⁴ Chun, Lalpa’n a suonteu kawma kipautiema a na tiem bang tak chun muntin ah chawlhdamna a pie a; Lalpa’n a melma teu chengcheng chuh a khut u a a piek ziekin, a melmateu chuh kuomah a masang u ah a pang thei mawngmawng a um puou hi.

⁴⁵ Tichun, Israel chate kawma Lalpa kipautiemna chengcheng khah, a bawnin a tung lo a um puoh a, a bawnin a tungkim suok kêi hi.