JOSHUA 2 - PATHIEN LEKHABU THIENGTHO (BSI)

Rahab leh Enthate

¹ Chun, Nun chapa Joshua chun, Shittim giehmun apat chun a gukcha a entha dingin mi nih a sawl a, “Chieh unla, a gam chuh phatak in va enthau inla, a bîk tak in Jerikoh khawpi chuh va enthau in,” a ti a. Amau chuh a chieh u a, nawhchizuok khat Rahab kiti In achun a lut u a, zie zan chun zie chun a giek tau a.

² Chun, mi’n, “Ngaitie, tuzan hin gam entha dingin Israel chate a hung ui,” ti’n Jerikoh khuo lengpa chuh a hilh u a.

³ Chun, Jerikoh khuo lengpa chun, “Na In a hung tung malzinte kha hun pui in; gam pumpi entha ding a hung ahiu hi,” ti a hilh dingin Rahab kawmah mi a sawl a.

⁴ Himahleh, numei chun mi nih te chuh a pui a, a selgu a; chun a kawm u ah, “Ahi, mite chuh ka kawmah a hung ngêi u a, himahlele khawi apat hung ahiu em vang ka he puoi.

⁵ Chun, khawthim a kulhkawtkhak khâk hun lai vel khan zie mite chuh a pawt kit tau a; khawilam a chieh ahi tau em ka he puoi: kintakin delh leu chun, delhpha nalai unla,” a ti a.

⁶ Himahlele, amahnu chun inchung ah a puito a, inchung a saikhau kung tien khawm laka chuh a selguk ahi ngâl a.

⁷ Tichun, mite chun Jordan lui lam ah, kaihmun tiengin a delh tau a; chun, a delhte chuh a pawt phet u chun kulh kawtkhak chuh a khâk tau a.

⁸ Chun, enthate chuh a ihmut mau in amahnu chuh inchung ah a kawm u ah a va chieh a;

⁹ Amau kawm achun, “Zie gam hi Lalpa’n a hun piek uh ahi ta a, na lauh-um nau hin ei delh khum ta a, zie gama chengcheng te hi na masang u ah a tui zo tau hi tih ka hêi.

¹⁰ Aigupta gam apat a na hung pawt u khan Lalpa’n Tuipi San kha a hun hihkang sak a, Jordan luigal a Amor te leng nih Sihon leh Og te chung a na hih dân teu, khati a na hih mangthai kêi tâk zieteu kha ka na za ngâl u a.

¹¹ Zie thu haw chuh ka na zak phet un ka lunggilteu chuh lauhna’n a dim zo ta a, nang haw ziek hin taisie lo mawngmawng a um puou; Lalpa na Pathien u chuh chunglam van leh nuoi lam lei a Pathien ahi ngâl a.

¹² Khutichun, na chung u ah hin ka hun lungsiet dân ka latsak ahi a, nang un le ka inkawte chung ah na lungsiet nau chuh hun latsak thuk unla,

¹³ ka nu leh ka pate, ka suohpihnute, ka suohpih te leh a neih tâk phawt uh chu hâwi unla; thihna lak apat a ka hinnau hi ei hukdawk sak dingin Lalpa min lo in lungsiet takin ka kawmah kipautiem unla, melchikna bang ahim khat ei bawlsak un,” a ti a.

¹⁴ Chun, mite chun a kawmah, “Ka thilhih u hi na gendawk loh ding chun na thih sik in thi’ng kau; tichun hiti hi hi’n tin, Lalpa’n gam ei hun piek tieng u leh hun lungsiet in na chung ah ginum takin hih ung kau,” a tiu a.

¹⁵ Khutichun amau chuh tukvan achun khauhuol in a tultha ta a: a In chuh khawpi kulh bâng chunga kisa ahi a, amah chuh khawpi sunga chêng ahi.

¹⁶ Chun, a kawm u ah, “Tâng lam zuonin chieh to un, khutilochun a hun delhte khan hun mu kha kha’n au; tak achun ni thum va kiselguu in; a hun delhte a hung vaihkit macheng un, zie zawh tieng chuleh chieh kit na’n lau,” a ti a.

¹⁷ Chun, mite chun a kawmah, “Nei kipautiem sakna hi phatak in vawp zing ung kau.

¹⁸ Ngaitie, zie gam hi ka hung lut tieng u leh zie patzang san hi nei tulthakna tukvan ahin a na kandên inla; chun, insung achun na kawmah na pate, na nute, na suohpihnute, na suohpihpa te, leh na pa inkawte chengcheng chuh na puihlut suok ding ahi.

¹⁹ Chun, hiti hi hi’n tin, kuole na kawtkhak apat khawlai a pawt tapoh chuh amah thiemlohna mawh chuh kipuok intin, keihaw vang thiemloh changin um puo’ng kau; kuo’n le insung a na kawma um tapohte chung a khut a thâk u chun, kei uh mawhpuok hi’n a.

²⁰ Amahvang chuh ka thilhih u hi na gendawk chun nei kipautiem saknau ahin thiemloh changin um puo’ng kau,” a tiu a.

²¹ Amah chun, “Na gen bang tak u chuh hi hen,” a ti a. Tichun a mau chuh a chieh sak a, a kikhen tau a; chun, amahnu chun, patzang san chuh tukvan achun a khaitha ta a.

²² Tichun, a pawtdawk u a, tâng achun a chieh u a, a delhte hung kileh kit ma cheng chun ni thum sung a va kisel tau a; tichun, a delhte haw chun lam tungtawn in a hawl u a, himahlele a mu zo puou a.

²³ Tichun, enthate nih chuh tâng apat chuh a chieh suk u a, Jordan lui chuh a kân u a. Nun chapa Joshua kawm chuh a tung u a; a chung u a thil tung chengcheng chuh a hilh tau hi.

²⁴ Chun, Joshua kawm achun, “Lalpa’n a gam pumpi chuh I khut u ah a pie kêi nai; zie mai chuh ahi puoh a, zie gam a chêngte chengcheng chun ei lau in I masang u ah a tuitha zo tau hi,” a tiu a.