JOSHUA 18 - PATHIEN LEKHABU THIENGTHO (BSI)

Gam Um nalaite Hawpna

¹ Chun, Israel suon mipite chengcheng chuh Shiloh khuo ah a kikhawm u a, zie tak achun kikhawp khawmna puon-In a zak uh a; gam chuh a thunuoi uh ah a hung um ta a.

² Chun, Israel suonte lak achun a chanvo dinguh a gam hawp nailoh nam sagih a um u a.

³ Tichun, Joshua’n Israel chate kawm achun, “Lalpa, na pilepu teu Pathien in a hun piek tâk uh gam hih bang chan ahim luoh lo a na muon naklai dinguh?

⁴ Phung tin apat mi thum zel kiteldawk unla; amau chuh sawl ing ka ting, amau chuh chieh to untin, gam chuh va tawh viel untin, a chanvo kham ding chiet uh va zik u hen la; chun, ka kawmah hungkit u hen.

⁵ Chun, hawp sagih in hawm phawt untin; Juda te chuh simlam ah a chanvo u ah um un au.

⁶ Chun, gam chuh mun sagih in va hawm unla, zie zik chuh ei hun pieu un: tichun zie tak ahin Lalpa Pathien masangah phun hun sân sak ing ka.

⁷ Levi te hin vang na lak uh ahin chanvo a nei puou a; Lalpa thiempu hihna hi a chanvo uh ahi ngâl a: chun, Gad te, Reuben te leh Manasseh nam kimkhatte khan vang Jordan gal suohlam akhan a chanvo u chuh Lalpa suok Mosi’n a na piek khah a na chang tau a,” a ti a.

⁸ Tichun, mite chuh a kipandawk tau a; chun gam chanchin va zik dawk ding te chuh Joshua’n, “Gam chuh va tawhtha tau inla, hun zik dawk unla, ka kawmah hun tun kit unla, zie Shiloh khuo ahin Lalpa masangah phun hun san sak ing ka,” ti’n thu a pie a.

⁹ Khutichun mite chuh a chieh u a, gam chuh a va tawhthau a, hawp sagih in a hawm u a, lehkhabu ah a khuo khuo’n a zik dawk u a, giehmun Shiloh achun Joshua kawmah a chieh kit tau hi.

¹⁰ Chun, Joshua’n Shiloh achun Lalpa masangah phun a na san sak a: zie tak achun Israel chate chuh Joshua’n a kikhen dân bang zel un gam chuh a hawm ta a.

Benjamin te Gam

¹¹ Chun, phunsân chuh Benjamin suonte phung ah a inkuon uh bang zelin a chung u ah a kie ta a: chun, a gam u chuh Juda suonte leh Joseph suonte kikal chuh ahi.

¹² Chun, mâllam panga a gamgiu chuh Jordan apat in ahi; chun, gamgi chuh Jerikoh pang ah mâllam pang ah a chieh to zel a, chun, tumlam panga tâng gam ah a chieh to zel a; chun, gamgi chuh Beth-aven gamthip ah a tâwp hi.

¹³ Chun, gamgi chuh zie apan chun Luz lam ah, Luz (zie chuh Bethel ahi) sîk ah, simlam pang ah a chieh zel a; chun, gamgi chuh Beth-horon thangnung simlam panga tâng zul ah Ataroth-adar ah a kum suk a.

¹⁴ Chun, zie apat chun gamgi chuh a chieh zel a, simlam Beth-horon zawna um tâng a kipatin tuisuohgiet ning chuh simlam pang ah a kuolkhum a. Chun, a suokdawkna chuh Kiriath-jearim kiti Judate khawpi Kiriath-baal ahi a, zie chuh tumlam panga gamgi ahi.

¹⁵ Chun, simlam panga gamgi chuh Kiriath-jearim tâwp apat in ahi, zie chuh tumlam ah a pawt a, Nephtoah luicha achun a chieh zel a.

¹⁶ Chun, gamgi chuh Rephraim mâllam pang guom a Hinnom chapa phaizawl bul a tâng tâwp achun a chieh suk a; tichun Jebus te sîk ah, simlam panga Hinnom phai ah a chieh suk a, Enrogel ah a kum suk hi.

¹⁷ Chun, mâllam zuonin a chieh a, En-shemesh ah a chieh a, Adummim chieh tohna chung zawn Geliloth ah a chieh a; chun, Reuben chapa Bohan Suong ah a pawt a.

¹⁸ Chun, Arabah sîk mâllam pang ah a chieh zel a, Arabah ah a chieh suk a.

¹⁹ Chun, gamgi chuh Beth-hogla sîk, mâllam pang ah a chieh zel a, chun, gamgi tawpna chuh Jordan sim tâwp, Tuisuohgiet Al mâllam lui kawi ah ahi, zie chuh simlam gamgi ahi. Jordan chuh suohlam panga gamgi ahi.

²⁰ Zie chuh Benjamin suonte a inkuon uh bang zel a a chanvo uh gam in a huop sung chuh ahi.

²¹ Tichun, Benjamin suonte a inkuon uh bang zela a khawpi teu chuh Jerikoh, Beth-hoglah, Emekkeziz,

²² Beth-arabah, Zemariam, Bethel,

²³ Avvim, Parah, Ophrah,

²⁴ Kepharammoni, Ophni, Geba, khawpi sawmlenih a khawpel te tawh.

²⁵ Gibeon, Ramah, Berot,

²⁶ Mizpeh, Kephirah, Mozah,

²⁷ Rekem, Irpeel, Taralah,

²⁸ Zela, Ha-eleph, Jebus (zie chuh Jerusalem ahi), Gibeah leh Kiriath-Jearim haw ahi; khawpi haw sawmleli leh a khawneu haw tawh. Benjamin suonte a inkuon uh bang zela a chanvo dinguh a piek chuh ziehi ahi.